نئی دہلی: سپریم کورٹ نے دہلی کے جنتر منتر پر جولائی میں ہوئے کاکروچ جنتا پارٹی (CJP) کے طلبہ احتجاج کے دوران تشدد کی جانچ کے لیے قائم اعلیٰ اختیاراتی تحقیقاتی کمیٹی (HPEC) کی تشکیل نو کی درخواست مسترد کردی۔ عدالت نے کہا کہ کمیٹی نے ابھی حال ہی میں اپنا کام شروع کیا ہے۔ چیف جسٹس آف انڈیا سوریا کانت، جسٹس جوی مالیا باگچی اور جسٹس وی موہنا پر مشتمل بنچ نے کہا کہ کمیٹی کے خلاف اٹھائے گئے اعتراضات اس مرحلے پر قیاس آرائیوں پر مبنی اور قبل از وقت ہیں۔ بنچ نے اپنے حالیہ حکم میں کہا، ’’ہمیں افسوس کے ساتھ یہ کہنا پڑ رہا ہے کہ HPEC پر اس انداز میں سوالات اٹھائے گئے ہیں جو قبل از وقت اور عجلت پر مبنی ہے۔‘

‘ بنچ نے واضح کیا کہ کمیٹی کا مقصد منصفانہ، شفاف اور غیر جانب دارانہ تحقیقات کے ذریعے عدالت کی مدد کرنا ہے، نہ کہ کسی ایک فریق کے مفادات کی حمایت کرنا۔ عدالت نے کہا، ’’سب کو یہ سمجھنا ہوگا کہ HPEC اس عدالت کی مدد کے لیے اعلیٰ ترین معیار کی منصفانہ اور شفاف تحقیقات اور غیر جانب دارانہ طریقہ کار کے ساتھ قائم کی گئی ہے۔ HPEC ہمارے سامنے موجود کسی ایک فریق کے مفاد کی نمائندگی کے لیے نہیں بنائی گئی ہے۔‘‘ پانچ رکنی کمیٹی 18 اگست کو

سپریم کورٹ کے سابق جج جسٹس آر سبھاش ریڈی کی سربراہی میں قائم کی گئی تھی۔ کمیٹی جنتر منتر اور دیگر مقامات پر مظاہرین کے خلاف پولیس کی مبینہ ضرورت سے زیادہ طاقت کے استعمال کے ساتھ ساتھ سکیورٹی اہلکاروں کے خلاف مبینہ تشدد کے الزامات کی بھی جانچ کر رہی ہے۔ HPEC کو اپنی تحقیقات کی رپورٹ براہ راست سپریم کورٹ میں پیش کرنی ہے اور اسے عدالت کی نگرانی میں کام کرنا ہے۔ اپنے تازہ حکم میں سپریم کورٹ نے کمیٹی کی تحقیقات کا دائرہ کار

اور طریقہ کار بھی طے کیا۔ عدالت نے HPEC کو ہدایت دی کہ وہ ابتدائی طور پر پیلٹ گنوں کے استعمال، نشانہ بنا کر تشدد، خواتین مظاہرین کو ہراساں کرنے اور کسی بھی فریق کی جانب سے ضرورت سے زیادہ تشدد اور املاک کو نقصان پہنچانے کے الزامات کی جانچ کرے۔ بنچ نے واضح کیا کہ وسیع تر آئینی سوالات پر عدالت مناسب مرحلے پر غور کرے گی۔ کمزور گواہوں کے تحفظ کے لیے سپریم کورٹ نے ہدایت دی کہ ان کی شناخت خفیہ رکھی جائے اور ان کے بیانات و شواہد کو ’’انتہائی رازداری‘‘ کے ساتھ محفوظ رکھا جائے۔

عدالت نے یہ امکان بھی ظاہر کیا کہ گواہوں کے لیے ایک الگ آن لائن پورٹل بنایا جا سکتا ہے، جہاں وہ خفیہ طور پر دستاویزات اور شواہد جمع کرا سکیں گے۔ بنچ نے مزید واضح کیا کہ نوڈل وکیل صرف سپریم کورٹ کی معاونت کریں گے اور HPEC، عدالت اور فریقین کے درمیان رابطے کا ذریعہ نہیں ہوں گے۔ سینئر وکیل ڈاکٹر مونیکا گوسین اور ایڈووکیٹ آن ریکارڈ سی سلیمان کو امیکس کیوری مقرر کیا گیا ہے، جو فریقین کے درمیان آزاد ثالث کے طور پر کام کریں گے۔ HPEC کو ایک رکن سکریٹری مقرر کرنے اور اپنی پہلی رپورٹ جلد از جلد پیش کرنے کی بھی ہدایت دی گئی ہے۔ بنچ نے 14 سالہ ایک خاتون مظاہرین اور اس کے خاندان کی سلامتی سے متعلق خدشات پر بھی الگ سے غور کیا۔

عدالت کے سامنے یہ بتایا گیا کہ مبینہ طور پر ان کی جان کو دھمکیاں دی گئی ہیں، جس سے ان کی سلامتی کے حوالے سے ’’سنگین اور مسلسل خدشات‘‘ پیدا ہوئے ہیں۔ دہلی پولیس کی جانب سے مبینہ طور پر ذمہ دار افراد کے خلاف کارروائی نہ کیے جانے کے الزامات کا نوٹس لیتے ہوئے عدالت نے پولیس کو خطرے کا جائزہ لینے اور بچی و اس کے خاندان کو ضروری تحفظ فراہم کرنے کی ہدایت دی۔ عدالت نے حکم دیا، ’’ہم دہلی پولیس کو ہدایت دیتے ہیں کہ وہ خطرے کا جائزہ لے اور مذکورہ بچی اور اس کے خاندان کی حفاظت یقینی بنانے کے لیے ضروری تحفظ فراہم کرے۔

اس کے ساتھ ان سماج دشمن عناصر کے خلاف جلد از جلد تحقیقات کرے جو مبینہ طور پر اسے اور اس کے خاندان کو دھمکیاں دے رہے یا ہراساں کر رہے ہیں۔‘‘ اس سے قبل سپریم کورٹ نے CJP احتجاج سے وابستہ 14 سالہ لڑکی کو مبینہ طور پر دھمکانے اور اس کے گھر پر پتھراؤ کیے جانے کے الزامات کا سنجیدہ نوٹس لیا تھا۔ عدالت نے کہا تھا کہ کسی بھی شخص کو فوجداری کارروائی آگے بڑھانے پر کسی نابالغ یا اس کے خاندان کو خوف زدہ کرنے کی اجازت نہیں دی جا سکتی۔ دہلی پولیس کو آئندہ سماعت سے قبل اس معاملے پر اسٹیٹس رپورٹ بھی داخل کرنے کی ہدایت دی گئی ہے۔ اگلی سماعت 9 اکتوبر کو ہوگی۔ سپریم کورٹ میں زیر سماعت درخواستوں کے ایک مجموعے میں دہلی کے جنتر منتر پر احتجاج کے دوران پولیس کی مبینہ زیادتی کے علاوہ بہار اور ملک کے دیگر حصوں میں مسابقتی امتحانات، جن میں NEET بھی شامل ہے، میں مبینہ بے ضابطگیوں اور سوالیہ پرچوں کے افشا کے خلاف ہونے والے مظاہروں سے متعلق معاملات بھی شامل ہیں۔