نئی دہلی،: ملک کی بڑی فضائی کمپنی انڈیگو نے جمعہ کے روز کہا کہ مائیکروسافٹ کی خدمات میں جاری عالمی خلل سے اس کی پروازوں کا آپریشن متاثر نہیں ہوا ہے۔ ایئرلائن کے مطابق اس کا کسٹمر سپورٹ نظام بھی معمول کے مطابق کام کر رہا ہے، جس میں مصنوعی ذہانت (اے آئی) پر مبنی معاون سروس ’6E اسکائی‘ بھی شامل ہے۔ ایئرلائن نے سوشل میڈیا پلیٹ فارم ایکس پر ایک پوسٹ میں بتایا کہ مائیکروسافٹ کی عالمی سروس میں خرابی کے باعث ای میل کے ذریعے صارفین کو مدد فراہم کرنے کا نظام متاثر ہوا ہے، تاہم پروازوں کی آمد و رفت معمول کے مطابق جاری ہے اور صارفین کی معاونت کے دیگر تمام ذرائع پوری طرح فعال ہیں۔

انڈیگو نے کہا، ’’مائیکروسافٹ کی عالمی سروس میں جاری خلل کے باعث ای میل سپورٹ متاثر ہو رہی ہے، لیکن انڈیگو کی پروازوں کا آپریشن معمول کے مطابق جاری ہے اور صارفین کی معاونت کے دیگر تمام ذرائع پوری طرح کام کر رہے ہیں۔ ہماری اے آئی معاون سروس ’6E اسکائی‘ چوبیس گھنٹے بلا تعطل خدمات فراہم کر رہی ہے اور صارفین کے سوالات کے جوابات دے رہی ہے، تاکہ انہیں ضرورت کے وقت مطلوبہ مدد مل سکے۔‘‘ ایئرلائن نے مزید کہا کہ اس کی پروازوں اور کاروباری سرگرمیوں پر کوئی اثر نہیں پڑا ہے۔ صارفین سے مسلسل رابطہ رکھنے اور انہیں بروقت اطلاعات فراہم کرنے کے انتظامات بھی کیے گئے ہیں، تاکہ وہ اپنے سفر کے دوران تازہ ترین معلومات سے باخبر رہیں۔

خبر رساں ادارے رائٹرز کے مطابق جمعرات کے روز مائیکروسافٹ کی خدمات میں پیدا ہونے والی خرابی کے باعث آؤٹ لک، ٹیمز اور مائیکروسافٹ 365 کی دیگر سروسز 5 گھنٹے سے زیادہ وقت تک متاثر رہیں۔ اس سے ہزاروں صارفین کے علاوہ اوپن اے آئی اور اینتھروپک کی جانب سے استعمال کیے جانے والے اے آئی سروس کنیکٹرز بھی متاثر ہوئے۔ ڈاؤن ڈیٹیکٹر کے اعداد و شمار کے مطابق آؤٹ لک سروس میں خرابی کی شکایات جمعرات کو مشرقی امریکی وقت کے مطابق دوپہر تقریباً 1 بجے بڑھ کر 1,38,058 تک پہنچ گئی تھیں، تاہم شام تک ان کی تعداد گھٹ کر 34,490 رہ گئی۔

اسی طرح شام 5 بج کر 47 منٹ تک مائیکروسافٹ 365 سے متعلق شکایات کم ہوکر تقریباً 13,000 رہ گئیں، جبکہ ٹیمز کے 763 صارفین نے مسائل کی اطلاع دی۔ مائیکروسافٹ کی اس عالمی سروس بندش سے دنیا بھر میں فضائی کمپنیوں کا کام کاج بھی متاثر ہوا ہے، جس کے بعد ہندوستان کی کئی بڑی ایئرلائنز نے مسافروں کے لیے ضروری ہدایات جاری کی ہیں۔ دریں اثنا، سائبر سکیورٹی کے ماہر پون دگل نے مائیکروسافٹ کی عالمی سروس میں پیدا ہونے والے خلل پر تشویش ظاہر کرتے ہوئے کہا ہے کہ اسے محض تکنیکی خرابی سمجھ کر نظر انداز نہیں کیا جانا چاہیے۔ ان کے مطابق سائبر حملے، سکیورٹی میں نقب یا سائبر دہشت گردی کے امکان کو بھی مکمل طور پر خارج نہیں کیا جا سکتا۔

اے این آئی سے بات کرتے ہوئے دگل نے کہا، ’’مائیکروسافٹ اس وقت پوری دنیا کی توجہ کا مرکز بنا ہوا ہے، کیونکہ اس کے سرور، ای میل اور دیگر پلیٹ فارم تک رسائی ممکن نہیں ہو پا رہی ہے۔ کمپنی نے سائبر حملے کے امکان کو مسترد کیا ہے اور کہا ہے کہ وہ اس مسئلے کا حل تلاش کرنے کی کوشش کر رہی ہے۔ لوگ تشویش میں ہیں اور انٹرنیٹ پر بہت سے لوگ کہہ رہے ہیں کہ اب چھٹی منانے کا وقت آگیا ہے، کیونکہ ای میل کام نہیں کر رہی ہے۔‘‘ انہوں نے اس واقعے کے ممکنہ اسباب اور اس کے سکیورٹی سے متعلق پہلوؤں پر مزید توجہ دینے کی ضرورت پر بھی زور دیا۔