توتوکڈی: نائب صدر جمہوریہ سی پی رادھا کرشنن نے کہا ہے کہ وزیر اعظم نریندر مودی کا بنیادی اصول معاشی ترقی کے ذریعے غربت کا خاتمہ کرنا ہے۔ انہوں نے گزشتہ ایک دہائی کے دوران ہندوستان کی معاشی ترقی کی تعریف کرتے ہوئے کہا کہ ملک نے تیز رفتار اور ہمہ گیر ترقی کی سمت میں اہم پیش رفت کی ہے، جس کے نتیجے میں وہ دنیا کی چوتھی سب سے بڑی معیشت بن گیا ہے۔ نائب صدر نے یہ بات تمل ناڈ مرکنٹائل بینک (ٹی ایم بی) کے 105ویں یومِ تاسیس کی تقریبات سے خطاب کرتے ہوئے کہی۔ انہوں نے ہندوستان کی معاشی ترقی میں ایک صدی سے زیادہ عرصے تک بینک کے کردار کو سراہا۔

ساتھ ہی انہوں نے بینکوں پر زور دیا کہ وہ مالیاتی شمولیت کو مزید مضبوط بنائیں، کاروباری افراد، چھوٹی اور درمیانے درجے کی صنعتوں، کسانوں اور خواتین کی قیادت والے کاروباری اداروں کی مدد کریں اور 2047 تک ترقی یافتہ ہندوستان کے خواب کو پورا کرنے میں اپنا کردار ادا کریں۔ جمعرات کو وی او چدمبرم کالج میں منعقدہ تقریب سے خطاب کرتے ہوئے نائب صدر نے کہا کہ جب نریندر مودی نے وزیر اعظم کا عہدہ سنبھالا تھا تو بہت سے لوگوں کو عالمی معاشی درجہ بندی میں ہندوستان کی پوزیشن کا علم نہیں تھا، لیکن ان کا وژن ہندوستان کو ایک ترقی یافتہ ملک بنانا تھا۔

انہوں نے کہا کہ ہندوستان دنیا کی تیسری سب سے بڑی معیشت بننے کی سمت میں آگے بڑھ رہا ہے۔ ایک وقت تھا جب عالمی معیشت میں ہندوستان کی حیثیت کو زیادہ اہمیت نہیں دی جاتی تھی، لیکن اب ملک پانچویں مقام سے آگے بڑھ کر چوتھے مقام پر پہنچ چکا ہے اور جلد ہی تیسری سب سے بڑی معیشت بن جائے گا۔ تمل ناڈ مرکنٹائل بینک کے بارے میں بات کرتے ہوئے نائب صدر نے کہا کہ اس کے سفر کا ذکر کرتے ہوئے نادر برادری کی خدمات کو نظر انداز نہیں کیا جا سکتا۔ انہوں نے کہا کہ دنیا تیزی سے ایک عالمی گاؤں میں تبدیل ہو رہی ہے، اس لیے معاشی ترقی ایسی ہونی چاہیے جس کا فائدہ معاشرے کے تمام طبقات کو پہنچے اور کوئی بھی پیچھے نہ رہ جائے۔

تمل ناڈ مرکنٹائل بینک نے خود کو ایک ایسے ادارے کے طور پر ترقی دی ہے جو معاشرے کے ہر طبقے کی خدمت کرتا ہے۔ انہوں نے کہا کہ یہ بینک اب ایک جامع مالیاتی ادارہ بن چکا ہے، جو تمام طبقات کو خدمات فراہم کرنے کے ساتھ کاروباری افراد، چھوٹے تاجروں اور دیگر لوگوں کی حوصلہ افزائی بھی کرتا ہے۔ نائب صدر رادھا کرشنن نے توتوکڈی کے وی او چدمبرم کالج میں منعقدہ ڈائمنڈ جوبلی تقریبات اور سابق طلبہ کے اجتماع میں بھی شرکت کی۔ ی

ہ وہی کالج ہے جہاں سے انہوں نے تعلیم حاصل کی تھی۔ اس موقع پر انہوں نے اپنے کالج کے زمانے کو یاد کرتے ہوئے کہا کہ انہیں ان اساتذہ کی یاد آج بھی تازہ ہے جنہوں نے ان کی شخصیت کی تشکیل میں اہم کردار ادا کیا۔ ان میں پرنسپل سوبیا پلئی، پالانی یا پلئی، پروفیسر نیسٹر، کامراج، رامانجم، پیریا نایگم، چندر شیکھر اور سندر لنگم شامل تھے۔ انہوں نے کہا کہ کمیونزم، سوشلزم اور سرمایہ داری جیسے نظریات پر ان کے اساتذہ کی دی ہوئی وضاحتیں آج بھی انہیں اچھی طرح یاد ہیں۔