نئی دہلی: الیکشن کمیشن آف انڈیا نے منگل کو راجیہ سبھا کی 11 نشستوں کے لیے دو سالہ انتخابات اور مغربی بنگال کی ایک خالی نشست پر ضمنی انتخاب کے پروگرام کا اعلان کر دیا۔ اس کے ساتھ ہی اتر پردیش، بہار، مہاراشٹر اور کرناٹک کی قانون ساز کونسلوں کی 28 نشستوں کے لیے بھی دو سالہ انتخابات کا شیڈول جاری کیا گیا ہے۔ یہ انتخابات گریجویٹ اور ٹیچر حلقوں سے ہونے ہیں۔ الیکشن کمیشن کی جانب سے جاری سرکاری نوٹیفکیشن کے مطابق راجیہ سبھا کی 11 نشستوں میں سے 10 اتر پردیش اور ایک اتراکھنڈ کی ہے۔ موجودہ ارکان کی مدت پوری ہونے کے بعد یہ نشستیں نومبر میں خالی ہوں گی۔

اس کے علاوہ مغربی بنگال میں راجیہ سبھا کی ایک خالی نشست پر ضمنی انتخاب ہوگا۔ یہ نشست ٹی ایم سی کی رکن پارلیمنٹ رکمنی ملک کے استعفے کے بعد خالی ہوئی ہے۔ راجیہ سبھا انتخابات کے لیے 29 ستمبر کو نوٹیفکیشن جاری کیا جائے گا، جبکہ نامزدگی داخل کرنے کی آخری تاریخ 6 اکتوبر مقرر کی گئی ہے۔ کاغذات نامزدگی کی جانچ 7 اکتوبر کو ہوگی اور امیدوار 9 اکتوبر تک اپنی نامزدگی واپس لے سکیں گے۔ تمام متعلقہ نشستوں کے لیے 16 اکتوبر کو صبح 9 بجے سے شام 4 بجے تک ووٹنگ ہوگی، جبکہ ووٹوں کی گنتی اسی دن شام 5 بجے شروع کی جائے گی۔

اتر پردیش سے ریٹائر ہونے والے راجیہ سبھا ارکان میں مرکزی وزیر ہردیپ سنگھ پوری کے علاوہ ارون سنگھ، برج لال، بی ایل ورما، رام گوپال یادو، نیرجا شیکھر، گیتا عرف چندر پربھا، رام جی، سیما اور ڈاکٹر دنیش شرما شامل ہیں۔ اتراکھنڈ سے نریش بنسل کی مدت مکمل ہو رہی ہے۔ الیکشن کمیشن نے ہدایت دی ہے کہ راجیہ سبھا انتخابات میں بیلٹ پیپر پر امیدواروں کے حق میں ترجیحات درج کرنے کے لیے صرف ریٹرننگ افسران کی جانب سے فراہم کیے جانے والے مقررہ معیار کے جامنی رنگ کے اسکیچ پین استعمال کیے جائیں گے۔

چار ریاستوں میں قانون ساز کونسل کی 28 نشستوں پر انتخابات الیکشن کمیشن نے الگ حکم نامے میں چار ریاستوں کی قانون ساز کونسلوں کی 28 نشستوں کے لیے بھی دو سالہ انتخابات کا اعلان کیا ہے۔ ان میں اتر پردیش کی 11، بہار کی 8، مہاراشٹر کی 5 اور کرناٹک کی 4 نشستیں شامل ہیں۔ اتر پردیش میں قانون ساز کونسل کی 11 نشستوں میں 5 گریجویٹ اور 6 ٹیچر حلقوں کی نشستیں ہیں۔ بہار میں 8 نشستوں میں 4 گریجویٹ اور 4 ٹیچر حلقے شامل ہیں۔

مہاراشٹر کی 5 نشستوں میں 3 گریجویٹ اور 2 ٹیچر حلقے ہیں، جبکہ کرناٹک کی 4 نشستوں میں 2 گریجویٹ اور 2 ٹیچر حلقے شامل ہیں۔ قانون ساز کونسل کے انتخابات کے لیے بھی 29 ستمبر کو نوٹیفکیشن جاری ہوگا۔ نامزدگی داخل کرنے کی آخری تاریخ 6 اکتوبر، کاغذات کی جانچ 7 اکتوبر اور نامزدگی واپس لینے کی آخری تاریخ 9 اکتوبر ہوگی۔ تمام 28 نشستوں کے لیے 23 اکتوبر کو صبح 8 بجے سے شام 4 بجے تک ووٹنگ ہوگی، جبکہ ووٹوں کی گنتی 27 اکتوبر کو کی جائے گی۔