نئی دہلی: مرکزی حکومت نے ڈیجیٹل پرسنل ڈیٹا پروٹیکشن (ڈی پی ڈی پی) ایکٹ 2023 کے تحت کنسینٹ منیجرز کی رجسٹریشن کا عمل شروع کردیا ہے۔ اس کے تحت کم از کم 2 کروڑ روپے کی خالص مالیت رکھنے والی اہل ہندوستانی کمپنیاں رجسٹریشن کے لیے درخواست دے سکتی ہیں۔ الیکٹرانکس اور انفارمیشن ٹیکنالوجی کی وزارت (MeitY) کی جانب سے ہفتہ کے روز جاری سرکاری بیان کے مطابق رجسٹریشن کا یہ نظام 13 نومبر 2026 سے نافذ ہوگیا ہے۔ وزارت نے کہا ہے کہ اہل ہندوستانی کمپنیاں اب dpbi.gov.in کے ذریعے کنسینٹ منیجرز کے طور پر رجسٹریشن کے لیے درخواست دے سکتی ہیں۔
اس کے لیے کم از کم 2 کروڑ روپے کی خالص مالیت کی شرط مقرر کی گئی ہے۔ اس عمل کے تحت وزارت کے سکریٹری ایس کرشنن نے ایک آن لائن پورٹل کا افتتاح کیا، جس کے ذریعے اہل کمپنیاں ڈیٹا پروٹیکشن بورڈ آف انڈیا کے پاس اپنی درخواستیں جمع کراسکتی ہیں۔ کنسینٹ منیجرز افراد کو اس بات کا اختیار فراہم کریں گے کہ کمپنیاں ان کے ذاتی ڈیٹا کا استعمال کس طرح کریں۔ اس مقصد کے لیے انہیں ایک ایسا پلیٹ فارم فراہم کیا جائے گا جہاں وہ اپنی رضامندی دے سکیں، اس کا جائزہ لے سکیں اور ضرورت پڑنے پر اسے واپس بھی لے سکیں۔
وزارت نے کنسینٹ منیجر کے کردار کی وضاحت کرتے ہوئے کہا کہ یہ ایک ایسا ادارہ ہوگا جو ڈیٹا پروٹیکشن بورڈ آف انڈیا کے ساتھ رجسٹرڈ ہوگا اور ایک قابل رسائی، شفاف اور باہمی طور پر مربوط پلیٹ فارم کے ذریعے افراد کو اپنے ڈیٹا کے استعمال سے متعلق رضامندی دینے، اس کا انتظام کرنے، جائزہ لینے اور واپس لینے کی سہولت فراہم کرے گا۔ نئے نظام کے تحت ہندوستان میں رجسٹرڈ وہ کمپنیاں درخواست دینے کی اہل ہوں گی جن کے پاس مناسب تکنیکی، انتظامی اور مالی صلاحیت موجود ہو اور جن کی خالص مالیت کم از کم 2 کروڑ روپے ہو۔ ڈیٹا پروٹیکشن بورڈ مقررہ شرائط کی بنیاد پر درخواستوں کا جائزہ لے گا اور اہلیت کے معیار پر پورا اترنے والی کمپنیوں کو منظوری دے سکتا ہے۔
رجسٹرڈ کنسینٹ منیجرز کے نام بورڈ کی ویب سائٹ پر عوام کے لیے دستیاب ہوں گے۔ وزارت کے مطابق یہ اقدام ہندوستان کے ڈیجیٹل ڈیٹا پروٹیکشن قانون کے مرحلہ وار نفاذ کا حصہ ہے، جس کا مقصد افراد کو اپنی ذاتی معلومات پر زیادہ اختیار اور کنٹرول فراہم کرنا ہے۔ یہ پیش رفت نومبر 2025 میں ڈی پی ڈی پی رولز کے نوٹیفکیشن کے بعد سامنے آئی ہے، جس میں ڈیٹا پروٹیکشن قانون کو مختلف مراحل میں نافذ کرنے کا طریقہ کار وضع کیا گیا تھا۔
