نئی دہلی: دہلی ہائی کورٹ نے جمعہ کو انڈین یوتھ کانگریس (آئی وائی سی) کی اس درخواست پر فوری سماعت سے انکار کردیا، جس میں چیف الیکشن کمشنر گیانیش کمار کے خلاف جنتر منتر پر مجوزہ احتجاج کی اجازت دینے سے دہلی پولیس کے انکار کو چیلنج کیا گیا ہے۔ عدالت نے کہا کہ اس معاملے کی سماعت پیر کو ہوگی۔ درخواست پر فوری سماعت کے لیے سینئر وکیل سنجے گھوش نے قائم مقام چیف جسٹس نتن واسودیو سامبرے کی سربراہی والی ڈویژن بنچ کے سامنے معاملہ پیش کیا۔

گھوش نے فوری سماعت کی درخواست کرتے ہوئے کہا کہ عرضی دو دن پہلے داخل کی گئی تھی، تاہم عدالت نے جمعہ کو اس پر سماعت کرنے سے انکار کردیا۔ قائم مقام چیف جسٹس نے کہا، ’’اتنی جلدی کیوں ہے؟ ہم اس معاملے کی سماعت پیر کو کریں گے۔‘‘ یہ درخواست انڈین یوتھ کانگریس کے قومی صدر ادے بھانو چِب کی جانب سے دائر کی گئی ہے۔

اس میں دہلی پولیس کے یکم اکتوبر کے اس حکم کو چیلنج کیا گیا ہے، جس کے ذریعے تنظیم کو احتجاج کرنے کی اجازت دینے سے انکار کردیا گیا تھا۔ درخواست کے مطابق، انڈین یوتھ کانگریس نے 25 ستمبر کو دہلی پولیس سے تقریباً 100 سے 150 افراد کی شرکت کے ساتھ پُرامن احتجاج کرنے کی اجازت مانگی تھی۔ تنظیم نے کہا تھا کہ وہ سکیورٹی، ٹریفک کے انتظام اور امن و امان برقرار رکھنے سے متعلق تمام شرائط پر عمل کرنے کے لیے تیار ہے۔ عرضی میں کہا گیا ہے کہ بار بار رابطہ کرنے کے باوجود پولیس نے اپنے فیصلے سے یکم اکتوبر کو آگاہ کیا، جو احتجاج کی مجوزہ تاریخ بھی تھی۔

انڈین یوتھ کانگریس کا مؤقف ہے کہ پولیس کو عوامی اجتماعات کو منظم کرنے کا اختیار حاصل ہے، لیکن کسی مخصوص پروگرام کے حالات کا جائزہ لیے بغیر احتجاج پر مکمل پابندی نہیں لگائی جاسکتی۔ تنظیم نے یہ بھی دلیل دی ہے کہ احتجاج کی اجازت سے انکار کرکے آئین کی دفعہ 19(1)(اے) اور 19(1)(بی) کے تحت حاصل بنیادی حقوق کی خلاف ورزی کی گئی ہے۔ ان دفعات کے تحت شہریوں کو اظہارِ رائے کی آزادی اور پُرامن طور پر جمع ہونے کا حق حاصل ہے۔ درخواست میں احتجاج اور عوامی اجتماعات سے متعلق رہنما اصولوں کو مبینہ طور پر بغیر مناسب غور و فکر کے لاگو کرنے کے طریقے کو بھی چیلنج کیا گیا ہے۔ یہ عرضی وکیل روپیش سنگھ بھدوریا کے ذریعے دائر کی گئی ہے۔