نئی دہلی: میونسپل کارپوریشن آف دہلی (ایم سی ڈی) کی اسٹینڈنگ کمیٹی کی چیئرپرسن ستیہ شرما نے بتایا کہ سردیوں سے پہلے آلودگی پر قابو پانے اور صفائی کے اقدامات تیز کر دیے گئے ہیں۔ ایم سی ڈی کی تقریباً 6127 کلومیٹر سڑکوں کی دستی صفائی 57 ہزار کے قریب صفائی متروں کے ذریعے کی جا رہی ہے۔

انہوں نے بتایا کہ اس سال ایم سی ڈی نے 1202 کلومیٹر سڑکوں کی دوبارہ تعمیر اور مضبوطی کا کام شروع کیا ہے، جبکہ اپریل سے اگست کے درمیان سڑکوں پر موجود 6797 گڑھے بھی بھرے گئے ہیں۔ 18 مئی کو شروع کی گئی خصوصی صفائی مہم کے تحت اب تک تقریباً 2900 میٹرک ٹن گاد اور مٹی ہٹائی جا چکی ہے۔ ایم سی ڈی 66 مکینیکل صفائی مشینوں کا استعمال کر رہی ہے، جو روزانہ تقریباً 180 ٹن دھول جمع کرتی ہیں۔ مزید 70 مشینیں خریدنے کی تجویز ہے، جبکہ 40 اضافی مشینوں کے لیے ٹینڈر بھی جاری کیا گیا ہے۔ اس کے علاوہ ایک ہزار کچرا اٹھانے والی مشینیں بھی تعینات کرنے کا منصوبہ ہے۔

ایم سی ڈی نے سڑکوں پر 167 پانی کے چھڑکاؤ والے آلات اور 28 موبائل اینٹی اسموگ گنز بھی تعینات کی ہیں۔ مزید 20 اینٹی اسموگ گنز تعمیراتی و انہدامی ملبے کی تنصیبات، کچرا ڈمپنگ مقامات اور ویسٹ ٹو انرجی پلانٹس میں نصب ہیں، جبکہ ایم سی ڈی کی بلند عمارتوں میں 15 اینٹی اسموگ گنز لگائی گئی ہیں۔ مزید 12 اسپرنکلر اور اینٹی اسموگ گنز بھی خریدی گئی ہیں۔

موسم سرما کے ایکشن پلان کے تحت مشترکہ نگرانی کرنے والی ٹیمیں فصلوں اور دیگر حیاتیاتی مواد جلانے، تعمیراتی و انہدامی کاموں سے پیدا ہونے والی دھول، غیر مجاز ایندھن کے استعمال اور تعمیراتی و انہدامی ملبہ غیر قانونی طور پر پھینکنے کے خلاف سخت کارروائی کریں گی۔ ایم سی ڈی کے مطابق دہلی آلودگی کنٹرول کمیٹی (ڈی پی سی سی) کی جانب سے نشان زد 46 آلودگی کے حساس مقامات پر بھی خصوصی نظر رکھی جا رہی ہے۔

اس مقصد کے لیے 11 ریونیو اضلاع میں نوڈل افسران اور نگرانی کرنے والی ٹیمیں تعینات کی گئی ہیں۔ ایم سی ڈی نے شہر میں سبزہ بڑھانے کی مہم بھی تیز کر دی ہے۔ اپریل سے اگست کے درمیان 4 لاکھ 282 پودے لگائے گئے، جن میں ایک لاکھ 26 ہزار 866 درخت، 2 لاکھ 69 ہزار 882 جھاڑیاں اور 3534 بانس کے پودے شامل ہیں۔ اس کے علاوہ نشان زد 8 لاکھ 68 ہزار 958 مربع میٹر بنجر اور غیر آباد علاقوں کو سبز بنانے کا ہدف بھی حاصل کر لیا گیا ہے۔ ستیہ شرما نے کہا کہ ایم سی ڈی صرف ہنگامی اقدامات پر انحصار نہیں کرے گی، بلکہ موسم سرما کے پورے عرصے میں سڑکوں کی دیکھ بھال، دھول پر قابو پانے، صفائی، سبزہ بڑھانے اور آلودگی کے ذرائع کے خلاف مسلسل اور سخت کارروائی جاری رکھی جائے گی۔