نئی دہلی: بھارتی فضائیہ کے سربراہ ایئر چیف مارشل اے پی سنگھ نے ہفتہ کو کہا کہ تیجس لڑاکا طیارے کے ایم کے-1 اے ورژن کی فراہمی میں تاخیر توقع سے زیادہ ہوئی ہے۔ انہوں نے یہ بھی کہا کہ بھارتی فضائیہ طیارے کے ایم کے-2 ورژن کی طرف بھی دیکھ رہی ہے تاکہ موجودہ صلاحیتوں میں موجود خلا کو پُر کیا جا سکے۔

ہندوستان ایروناٹکس لمیٹڈ (ایچ اے ایل) کی جانب سے ایل سی اے ایم کے-1 اے کی فراہمی میں تاخیر پر جرمانے سے متعلق سوال کے جواب میں ایئر چیف نے کہا کہ دفاعی منصوبوں میں تاخیر ہو سکتی ہے، لیکن موجودہ تاخیر خاصی زیادہ ہے۔ انہوں نے کہا، ’’ایسا ہوتا ہے کہ آپ کسی چیز کی منصوبہ بندی کرتے ہیں، لیکن اس میں تاخیر ہو جاتی ہے۔ لیکن اس بار تاخیر بہت زیادہ ہوئی ہے۔ ہم ایم کے-2 کی طرف بھی دیکھ رہے ہیں۔

یہ تمام منصوبے موجودہ صلاحیتوں میں موجود خلا کو پُر کرنے میں مدد کریں گے۔‘‘ بھارتی فضائیہ کے 94ویں یومِ تاسیس کے موقع پر منعقدہ پریس کانفرنس میں اے پی سنگھ نے دفاعی پیداوار میں خود انحصاری کی اہمیت پر بھی زور دیا۔ انہوں نے کہا کہ دنیا میں جاری تنازعات اور عالمی سپلائی چین میں رکاوٹوں کے درمیان ہندوستان کو بیرونی ذرائع پر اپنا انحصار کم کرنے کی ضرورت ہے۔

انہوں نے کہا، ’’آج کے وقت میں خود انحصاری ایک ضروری تقاضا ہے۔ ہمارے لیے یہ ضرورت بن چکی ہے۔ آتم نربھرتا ہمارے لیے ضروری ہے۔‘‘ ایئر چیف نے دفاعی شعبے میں خود انحصاری کے لیے جاری مقامی منصوبوں کا ذکر کرتے ہوئے ایل سی اے پروگرام کے ایم کے-1 اے اور ایم کے-2 ورژن کے ساتھ ساتھ ایڈوانسڈ میڈیم کامبیٹ ایئرکرافٹ (اے ایم سی اے) پروگرام کا بھی حوالہ دیا۔ انہوں نے مقامی دفاعی منصوبوں کے بارے میں کہا، ’’ہماری شمولیت مسلسل ہے اور مکمل تعاون فراہم کیا جا رہا ہے۔‘‘