ممبئی: کاکروچ جنتا پارٹی کے بانی ابھیجیت دپکے نے بدھ کو اعلان کیا کہ گاندھی جینتی کے موقع پر 2 اکتوبر سے ممبئی کے شیواجی پارک سے ’’جیل بھرو آندولن‘‘ شروع کیا جائے گا۔ انہوں نے الزام لگایا کہ الیکشن کمیشن کا طریقۂ کار ملک کے مفاد میں نہیں ہے۔ ممبئی پہنچنے کے بعد دپکے نے کہا کہ احتجاجی تحریک 2 اکتوبر کو شیواجی پارک سے شروع ہوگی۔ انہوں نے تمام سیاسی جماعتوں سے اپیل کی کہ وہ اس احتجاج میں شامل ہوں۔ انہوں نے الیکشن کمیشن کی مبینہ ’’آمریت‘‘ کو تشویش کا معاملہ قرار دیتے ہوئے دعویٰ کیا کہ ملک میں تبدیلی لانے کے لیے اجتماعی کوششوں کی ضرورت ہے۔
این سی پی (ایس پی) کے سربراہ شرد پوار کی جانب سے انتخابات میں مصنوعی ذہانت (اے آئی) کے مبینہ غلط استعمال سے متعلق دیے گئے بیان کی حمایت کرتے ہوئے دپکے نے کہا کہ انتخابی عمل سے جڑے خدشات کا حل تلاش کرنے کے لیے سب کو متحد ہونا چاہیے۔ دپکے نے اعلان کیا کہ گاندھی جینتی کے موقع پر جیل بھرو آندولن شروع کیا جائے گا اور سیاسی جماعتوں کے ساتھ ساتھ عام لوگوں سے بھی اس تحریک میں شامل ہونے کی اپیل کی۔ یہ اعلان انتخابی فہرستوں کی خصوصی گہری نظرثانی (ایس آئی آر) اور چیف الیکشن کمشنر گیانیش کمار کے استعفے کے مطالبے کو لے کر حزب اختلاف کے احتجاج میں تیزی کے درمیان سامنے آیا ہے۔
اس سے قبل منگل کو مہاراشٹر نونرمان سینا (ایم این ایس) کے سربراہ راج ٹھاکرے اور یو بی ٹی سینا کے سربراہ ادھو ٹھاکرے نے مشترکہ پریس کانفرنس کی تھی۔ دونوں رہنماؤں نے اعلان کیا کہ الیکشن کمیشن کے خلاف 4 اکتوبر کو احتجاجی مارچ نکالا جائے گا، جو بائیکلہ سے شروع ہوکر بی ایم سی ہیڈکوارٹر تک جائے گا۔ راج ٹھاکرے نے کہا، ’’4 اکتوبر کو مشترکہ احتجاجی مارچ نکالا جائے گا۔ یہ مارچ بائیکلہ سے بی ایم سی ہیڈکوارٹر تک جائے گا۔ یہ احتجاج الیکشن کمیشن کے خلاف ہوگا۔‘‘ ایم این ایس سربراہ نے کہا کہ ان کی پارٹی کئی برسوں سے الیکٹرانک ووٹنگ مشینوں (ای وی ایم) اور الیکشن کمیشن کے کام کرنے کے طریقے پر سوال اٹھاتی رہی ہے۔
انہوں نے کہا، ’’کئی برسوں سے ہم مسلسل ای وی ایم اور الیکشن کمیشن کے من مانی اقدامات پر سوال اٹھاتے رہے ہیں، لیکن اب تک کوئی حل نہیں نکلا ہے۔‘‘ راج ٹھاکرے نے مزید کہا، ’’میں تمام سیاسی جماعتوں کو اس احتجاجی مارچ میں شامل ہونے کی دعوت دینا چاہتا ہوں۔‘‘ انہوں نے الیکشن کمیشن کے خلاف کاکروچ جنتا پارٹی کی مجوزہ ’’جیل بھرو آندولن‘‘ کی بھی حمایت کی۔
