نئی دہلی: ہندوستان کے چیف جسٹس سوریا کانت نے سپریم کورٹ کے احاطے میں دہلی حکومت کے صحت مرکز (ڈی جی ایچ ایس) کے توسیعی حصے کا افتتاح کیا۔ اس موقع پر انہوں نے صحت کی سہولتوں کی اہمیت پر زور دیا۔ افتتاح کے بعد ذرائع ابلاغ سے بات کرتے ہوئے جسٹس سوریا کانت نے جدید طبی مرکز قائم کرنے میں تعاون کے لیے دہلی حکومت اور اس کے محکمۂ صحت کا شکریہ ادا کیا۔

انہوں نے کہا، ’’دہلی حکومت اور اس کے محکمۂ صحت کے تعاون سے آج ہم نے وکلا برادری کے ارکان، اپنے عملے اور وکلا سے وابستہ ملازمین کے لیے ایک بہت اچھے طبی مرکز کا افتتاح کیا ہے۔‘‘ نئے مرکز میں دستیاب طبی سہولتوں کی تفصیلات بتاتے ہوئے چیف جسٹس نے کہا کہ یہاں آیورویدک، ہومیوپیتھک اور ایلوپیتھک طریقۂ علاج کی سہولت موجود ہے۔

اس کے علاوہ ایکس رے اور خون کی جانچ جیسی بنیادی تشخیصی سہولتیں بھی فراہم کی گئی ہیں۔ انہوں نے مزید کہا، ’’اس مرکز کی سب سے اچھی بات یہ ہے کہ مولانا آزاد انسٹی ٹیوٹ آف ڈینٹل سائنسز اور رام منوہر لوہیا اسپتال جیسے خصوصی طبی اداروں سے براہِ راست رابطے کا انتظام کیا گیا ہے۔ یہاں الٹراساؤنڈ کی سہولت بھی موجود ہے۔‘

‘ جسٹس سوریا کانت نے صحت کو ایسا معاملہ قرار دیا جس میں کسی قسم کا سمجھوتہ نہیں کیا جا سکتا۔ انہوں نے خوشی کا اظہار کیا کہ وکلا برادری اور ان سے وابستہ ملازمین کی ایک طویل عرصے سے زیرِ التوا مانگ پوری ہو گئی ہے۔ انہوں نے کہا، ’’مجھے بہت خوشی ہے کہ وکلا برادری کے ارکان اور ان سے وابستہ ملازمین کی دیرینہ مانگ کو پورا کرتے ہوئے ایک بہت اچھی طبی سہولت فراہم کی گئی ہے۔ اس کے لیے میں دہلی حکومت اور اس کام میں شامل تمام افراد کا شکریہ ادا کرتا ہوں۔‘‘