کونو نیشنل پارک میں بوٹسوانا سے لائی گئی چیتا نے 4 بچوں کو جنم دیا

Story by  اے این آئی | Posted by  [email protected] | Date 20-11-2026
کونو نیشنل پارک میں بوٹسوانا سے لائی گئی چیتا نے 4 بچوں کو جنم دیا
کونو نیشنل پارک میں بوٹسوانا سے لائی گئی چیتا نے 4 بچوں کو جنم دیا

 



بھوپال: مدھیہ پردیش کے وزیر اعلیٰ موہن یادو نے شیورپور ضلع کے کونو نیشنل پارک میں بوٹسوانا سے لائی گئی مادہ چیتا کے 4 بچوں کی پیدائش پر خوشی کا اظہار کرتے ہوئے اسے ریاست کے لیے فخر کا لمحہ قرار دیا ہے۔ وزیر اعلیٰ نے جمعہ کو سوشل میڈیا پلیٹ فارم ایکس پر ایک پوسٹ میں بتایا کہ ڈھائی سالہ مادہ چیتا ’کومگ 3‘ نے جنگل میں 4 بچوں کو جنم دیا ہے۔ اس پیدائش کے ساتھ ہی ہندوستان میں چیتوں کی مجموعی تعداد بڑھ کر 62 ہوگئی ہے، جن میں 43 چیتے ہندوستان میں پیدا ہوئے ہیں۔

موہن یادو نے اپنی پوسٹ میں کہا کہ یہ پروجیکٹ چیتا کے لیے ایک تاریخی اور قابل فخر کامیابی ہے۔ انہوں نے وزیر اعظم نریندر مودی کی قیادت میں جنگلی حیات کے تحفظ کے لیے ہندوستان کی کوششوں کو سراہتے ہوئے اس منصوبے سے وابستہ ماہرین، ڈاکٹروں اور محکمہ جنگلات کے اہلکاروں کو مبارکباد دی۔ اس سے قبل مرکزی وزیر ماحولیات، جنگلات و موسمیاتی تبدیلی بھوپیندر یادو نے بھی سوشل میڈیا پر اس خبر کا اعلان کرتے ہوئے اسے پروجیکٹ چیتا کے لیے ایک اہم سنگ میل قرار دیا تھا۔ انہوں نے بتایا کہ بوٹسوانا سے لائی گئی ڈھائی سالہ مادہ چیتا ’کومگ 3‘ نے قدرتی ماحول میں 4 صحت مند بچوں کو جنم دیا ہے۔

خاص بات یہ ہے کہ بوٹسوانا سے لائی گئی کسی مادہ چیتا کے بچوں کی پیدائش کا یہ پہلا واقعہ ہے۔ مرکزی وزیر کے مطابق، بچوں کی پیدائش سے پہلے یہ مادہ چیتا 4 ماہ سے زیادہ عرصے تک جنگل میں آزادانہ طور پر رہی۔ سال 2022 میں ہندوستان میں چیتوں کو دوبارہ آباد کرنے کا پروگرام شروع ہونے کے بعد قدرتی ماحول میں بچوں کی پیدائش کا یہ دوسرا ریکارڈ شدہ واقعہ ہے۔ بھوپیندر یادو نے کہا کہ چیتوں کی ہر نئی پیدائش ہندوستان میں ان کی قابل عمل آبادی بحال کرنے کی امید کو مضبوط کرتی ہے۔

انہوں نے پروجیکٹ چیتا کی کامیابی میں اہم کردار ادا کرنے والے منصوبے کے منتظمین، ویٹرنری ڈاکٹروں، جنگلات کے زمینی عملے اور دیگر اہلکاروں کی خدمات کو بھی سراہا۔ واضح رہے کہ ہندوستان میں چیتوں کو دوبارہ آباد کرنے کا منصوبہ 2022 میں شروع کیا گیا تھا۔ اس کے تحت افریقی ملک نمیبیا اور بعد میں جنوبی افریقہ سے بھی چیتے ہندوستان لائے گئے تھے۔ کونو نیشنل پارک اس منصوبے کا اہم مرکز ہے۔