نئی دہلی: سپریم کورٹ نے منگل کے روز برہن ممبئی میونسپل کارپوریشن (بی ایم سی) کی کمشنر اشونی بھیڑے کو بورولی میں مجوزہ بس اسٹیشن کے لیے مختص زمین سے تجاوزات نہ ہٹانے پر سخت سرزنش کی۔ عدالت نے اس معاملے میں اپنے احکامات پر عمل نہ کرنے پر ناراضگی ظاہر کی۔ عدالت نے اشونی بھیڑے کو وجہ بتاؤ نوٹس جاری کرتے ہوئے پوچھا ہے کہ ان کے خلاف توہین عدالت کی کارروائی کیوں نہ شروع کی جائے۔ اس کے ساتھ ہی نومبر کی ان کی تنخواہ روکنے کا حکم بھی دیا ہے۔

سپریم کورٹ نے اپنے احکامات پر عمل درآمد سے بچنے کی کوشش کرنے پر بی ایم سی پر 5 لاکھ روپے کا جرمانہ بھی عائد کیا ہے۔ اس معاملے کی سماعت چیف جسٹس سوریہ کانت، جسٹس جوئے مالیا باگچی اور جسٹس وی موہن پر مشتمل بنچ نے کی۔ بنچ نے تجاوزات ہٹانے کے لیے مزید 30 دن کی مہلت دینے کی بی ایم سی کی درخواست مسترد کر دی۔ عدالت کی سختی کے بعد بی ایم سی نے بدھ، 4 نومبر 2026 کو بورولی ایسٹ میں سوامی وویکانند روڈ پر واقع اس زمین سے تجاوزات ہٹانے کی کارروائی مکمل کر لی، جو ’بیسٹ‘ بس اسٹیشن کے لیے مختص ہے۔ اس کارروائی کے دوران 27 تجارتی ڈھانچے ہٹا دیے گئے۔

یہ زمین تقریباً 3,400 مربع میٹر پر مشتمل ہے اور اسے برہن ممبئی الیکٹرک سپلائی اینڈ ٹرانسپورٹ (بیسٹ) کے بس اسٹیشن کے لیے مختص کیا گیا تھا۔ یہ پلاٹ سوامی وویکانند روڈ پر بورولی ایسٹ میں واقع ہے، جس کا سروے نمبر 7 بی، سی ٹی ایس نمبر 15 اور ٹاؤن پلاننگ اسکیم-2 ہے۔ میونسپل کارپوریشن کے آر سینٹرل وارڈ کی جانب سے چلائی گئی اس مہم میں انجینئروں سمیت 70 ملازمین اور اہلکاروں نے حصہ لیا۔ تجاوزات کے تحت قائم تجارتی ڈھانچوں کو ہٹانے کے لیے 2 جے سی بی مشینوں اور 4 ڈمپروں کا استعمال کیا گیا۔ کارروائی کے دوران پولیس کی بھی تعیناتی کی گئی تھی۔