لکھنؤ: مرکزی وزیر ماحولیات، جنگلات و موسمیاتی تبدیلی بھوپیندر یادو نے جمعہ کو لکھنؤ میں اتر پردیش کے وزیر اعلیٰ یوگی آدتیہ ناتھ سے ملاقات کی اور ریاست کے ان علاقوں میں فضائی معیار بہتر بنانے کے لیے جاری اقدامات کا جائزہ لیا جو قومی دارالحکومت خطے (این سی آر) میں شامل ہیں۔ اس دوران کمیشن فار ایئر کوالٹی مینجمنٹ (سی اے کیو ایم) کی جانب سے کیے جا رہے اقدامات پر بھی تبادلہ خیال ہوا۔ ملاقات کے بعد صحافیوں سے بات کرتے ہوئے بھوپیندر یادو نے وزیر اعظم کی ’ایک پیڑ ماں کے نام‘ مہم کے تحت ریاست میں بڑے پیمانے پر شجرکاری کے لیے اتر پردیش حکومت کو مبارکباد دی۔

انہوں نے کہا، ’’میں اتر پردیش کے وزیر اعلیٰ کو مبارکباد دینا چاہتا ہوں کہ گزشتہ برسوں کے دوران ریاست بھر میں بڑی تعداد میں درخت لگائے گئے اور مقررہ ہدف سے بھی زیادہ شجرکاری کی گئی۔‘‘ نیشنل کلین ایئر پروگرام (این سی اے پی) کے تحت ریاست کی کارکردگی کا ذکر کرتے ہوئے انہوں نے کہا کہ صاف ہوا کے حوالے سے جن 130 شہروں کا جائزہ لیا گیا، ان میں لکھنؤ پہلے مقام پر رہا، جبکہ آگرہ اور اتر پردیش کے دیگر شہروں نے بھی اچھی کارکردگی کا مظاہرہ کیا۔ یادو نے بتایا کہ جائزہ اجلاس میں اتر پردیش کے این سی آر میں شامل آٹھ اضلاع میں فضائی آلودگی سے متعلق مسائل پر بات ہوئی، جن میں نوئیڈا، ہاپوڑ، غازی آباد، میرٹھ اور بلند شہر شامل ہیں۔

انہوں نے کہا، ’’سب سے پہلے ہم نے گاڑیوں سے ہونے والی آلودگی اور پرانی گاڑیوں کے مسئلے پر غور کیا۔ بسوں کے لیے نئی الیکٹرک گاڑی پالیسی کا بھی جائزہ لیا گیا۔ اس کے علاوہ سرٹیفکیٹس اور ایگریگیٹر گاڑیوں سے متعلق ضرورتوں اور گاڑیوں کی آلودگی سے نمٹنے کے لیے مزید مؤثر اقدامات پر بات ہوئی۔‘

‘ صنعتی آلودگی کے بارے میں یادو نے کہا کہ اس شعبے میں نمایاں پیش رفت ہوئی ہے۔ ان کے مطابق 80 فیصد صنعتوں میں فضائی آلودگی پر قابو پانے والے آلات نصب کیے جاچکے ہیں اور باقی صنعتوں کا بھی جائزہ لیا جا رہا ہے۔ انہوں نے بتایا کہ گرد و غبار سے ہونے والی آلودگی بھی اجلاس کا ایک اہم موضوع رہی۔ اس کے لیے سڑکوں کی مشینی صفائی اور گہری صفائی سے متعلق ایک ایکشن پلان پر تبادلہ خیال کیا گیا۔ مرکزی وزیر کے مطابق اجلاس میں سالڈ ویسٹ مینجمنٹ رولز اور کنسٹرکشن اینڈ ڈیمولیشن ویسٹ مینجمنٹ رولز پر عمل درآمد کا بھی جائزہ لیا گیا۔ اس سلسلے میں ہاؤسنگ سوسائٹیوں اور ماحولیات کی وزارت سمیت مختلف متعلقہ فریقوں سے مشاورت بھی کی جا رہی ہے۔ یادو نے بتایا کہ اس سے قبل ہریانہ اور دہلی کے وزرائے اعلیٰ کے ساتھ بھی اسی طرح کے جائزہ اجلاس کیے جاچکے ہیں۔

انہوں نے کہا، ’’اس بار ہم نے ہریانہ کے وزیر اعلیٰ نایب سنگھ سینی جی سے ملاقات کی اور دہلی کی وزیر اعلیٰ ریکھا گپتا جی سے بھی ملاقات کی۔ آج اتر پردیش کے وزیر اعلیٰ یوگی آدتیہ ناتھ جی سے ملاقات ہوئی۔ ہم پنجاب اور راجستھان کی حکومتوں اور وزرائے اعلیٰ سے بھی ملاقات کرکے اس کام کو آگے بڑھانا چاہیں گے۔‘‘ یادو نے مزید کہا کہ مرکز فصلوں کی کٹائی کے موسم سے قبل پرالی جلانے کے مسئلے سے نمٹنے کے لیے مرکزی وزیر شیوراج سنگھ چوہان کے ساتھ بھی کام کر رہا ہے۔ اس سلسلے میں متعلقہ ریاستوں کے وزرائے زراعت کے ساتھ تال میل کیا جا رہا ہے۔

انہوں نے بتایا کہ این سی آر خطے کی تمام میونسپل کارپوریشنوں کے لیے شہر کے لحاظ سے تفصیلی ایکشن پلان تیار کیا گیا ہے۔ یادو کے مطابق گزشتہ دسمبر سے اب تک 30 سے زیادہ اجلاس کیے جاچکے ہیں اور اب ہر ریاست کے لیے شہر کے مخصوص منصوبوں پر کام شروع کردیا گیا ہے۔ حال ہی میں این سی آر کے 63 چھوٹے شہروں کی پنچایتوں، ضلع پریشدوں، نگر پالیکاؤں اور میونسپل کارپوریشنوں کے سربراہوں کے ساتھ بھی ملاقات کی گئی۔ انہوں نے کہا کہ مقامی سطح پر منصوبوں پر عمل درآمد کی نگرانی کے لیے نوڈل افسران مقرر کرنے کی ہدایت دی گئی ہے۔