نئی دہلی،: دہلی کی ایک عدالت نے 2018 کے ہتک عزت معاملے میں یوٹیوبر دھرو راٹھی کے خلاف ضمانتی وارنٹ جاری کیے ہیں۔ یہ معاملہ وکاس سنکرتیائن عرف وکاس پانڈے کی جانب سے دائر کیا گیا تھا۔ عدالت کو بتایا گیا کہ سمن پہنچانے کے لیے جب عدالتی اہلکار دھرو راٹھی کی رہائش گاہ پر پہنچا تو وہاں تالا لگا ہوا تھا۔ عدالت نے عدالتی اہلکار کی رپورٹ کا نوٹس لیتے ہوئے دھرو راٹھی کے خلاف ضمانتی وارنٹ جاری کرنے کا حکم دیا۔

اب اس معاملے کی اگلی سماعت 31 اکتوبر کو ہوگی۔ یہ پیش رفت عدالت کی جانب سے گروگرام میں دھرو راٹھی کے پتے پر تازہ سمن جاری کیے جانے کے چند روز بعد ہوئی ہے۔ شکایت کنندہ نے عدالت سے درخواست کی تھی کہ عدالتی کارروائی سے متعلق نوٹس جلد پہنچانے کے اقدامات کیے جائیں۔ شکایت کنندہ کے وکیل نے عدالت کو بتایا تھا کہ دھرو راٹھی کو کئی برس سے سمن پہنچانے کی کوششیں کامیاب نہیں ہو سکی ہیں، کیونکہ وہ زیادہ تر بیرون ملک رہتے ہیں۔

عدالت اس سے قبل نوٹ کر چکی ہے کہ دھرو راٹھی کو پہلی مرتبہ جولائی 2019 میں سمن جاری کیا گیا تھا۔ عدالت نے وکاس پانڈے کو عدالتی اہلکار کے ساتھ جانے کی اجازت بھی دی تھی، تاکہ سمن پہنچانے کے عمل میں سہولت ہو سکے۔ ہتک عزت کا یہ معاملہ مئی 2018 میں دھرو راٹھی کی جانب سے اپ لوڈ کی گئی ایک ویڈیو سے متعلق ہے۔

الزام ہے کہ اس ویڈیو میں انہوں نے دعویٰ کیا تھا کہ بھارتیہ جنتا پارٹی (بی جے پی) کے انفارمیشن ٹیکنالوجی سیل نے وکاس پانڈے کو رشوت دینے کی کوشش کی تھی، تاکہ وہ دھرو راٹھی کو بدنام کریں۔ یہ ویڈیو دھرو راٹھی کے سوشل میڈیا اکاؤنٹ پر شیئر کی گئی تھی۔ بعد میں دہلی کے اُس وقت کے وزیر اعلیٰ اروند کیجریوال نے بھی اسے ری ٹویٹ کیا تھا۔ ویڈیو میں لگائے گئے الزامات اور اس کی تشہیر کے خلاف وکاس پانڈے نے دھرو راٹھی اور اروند کیجریوال، دونوں کے خلاف ہتک عزت کی کارروائی شروع کی تھی۔ اس تازہ عدالتی حکم سے کئی برس سے زیر التوا اس معاملے میں ایک اور پیش رفت ہوئی ہے۔ دھرو راٹھی کو سمن پہنچانے کی کوشش ناکام رہنے کے بعد عدالت نے اب ان کے خلاف ضمانتی وارنٹ جاری کرنے کی ہدایت دی ہے۔