ایودھیا: بالی ووڈ کے میگا اسٹار امیتابھ بچن نے ایودھیا ڈیولپمنٹ اتھارٹی کو ایودھیا میں مجوزہ دھرم شالہ کا نقشہ پیش کیا ہے۔ حکام کے مطابق اس دھرم شالہ کا نام ان کے والد اور معروف شاعر ہری ونش رائے بچن کے نام پر رکھا جائے گا۔ ایودھیا ڈیولپمنٹ اتھارٹی کے نائب چیئرمین انوراگ جین نے منگل کو بتایا کہ مجوزہ دھرم شالہ میں 20 سے زیادہ کمرے ہونے کا امکان ہے۔

یہاں ملک کے مختلف حصوں سے ایودھیا آنے والے عقیدت مندوں کے قیام اور دیگر ضروری سہولیات کا انتظام کیا جائے گا۔ جین نے صحافیوں سے کہا، ’’ملک بھر کی معروف شخصیات نے ایودھیا کو اس شاندار شکل دینے میں اپنا تعاون کیا ہے۔ اسی سلسلے میں معروف اداکار امیتابھ بچن نے بھی دھرم شالہ کے نقشے کی منظوری کے لیے درخواست دی ہے، جس میں 20 سے زیادہ کمرے ہوں گے۔‘‘

انہوں نے بتایا کہ اس تجویز کو اخبارات میں شائع کر دیا گیا ہے اور لوگوں سے اعتراضات طلب کیے گئے ہیں۔ جین نے کہا، ’’مقررہ مدت ختم ہونے کے بعد اس تجویز کا جائزہ لیا جائے گا اور ضابطوں کے مطابق منظوری دی جائے گی۔‘‘ مجوزہ دھرم شالہ ایودھیا میں امیتابھ بچن کی جانب سے خریدی گئی زمین پر تعمیر کیا جائے گا۔ جین نے کہا کہ اس سہولت سے دور دراز علاقوں سے ایودھیا آنے والے عقیدت مندوں کو منظم انداز میں رہائش فراہم کرنے میں مدد ملے گی۔