نئی دہلی: بالی ووڈ کے معروف اداکار امیتابھ بچن نے حالیہ بم دھماکے کی دھمکی کے بعد اپنے گھر ’جلسہ‘ سے باہر آ کر بلٹ پروف شیشے کے پیچھے سے بڑی تعداد میں جمع مداحوں کا استقبال کیا۔ حال ہی میں ممبئی کی میئر ریتو تاوڑے کو ایک ای میل بھیجی گئی تھی، جس میں امیتابھ بچن کی رہائش گاہ اور گلوکار دلجیت دوسانجھ کے کنسرٹ کے مقام پر بم دھماکے کرنے کی دھمکی دی گئی تھی۔

ای میل میں دعویٰ کیا گیا تھا کہ برہن ممبئی میونسپل کارپوریشن (بی ایم سی) کے صدر دفتر میں واقع میئر کے دفتر میں دوپہر 3 بج کر 11 منٹ پر دھماکہ ہوگا۔ اس دھمکی کے بعد عمارت کی تلاشی لی گئی، لیکن وہاں کوئی مشتبہ چیز نہیں ملی۔ امیتابھ بچن ہر اتوار کی طرح اس بار بھی اپنے گھر کے باہر جمع ہونے والے مداحوں سے ملنے کے لیے باہر آئے، تاہم اس موقع پر سکیورٹی کے سخت انتظامات کیے گئے تھے۔

ان کے بیٹے ابھیشیک بچن بھی ان کے ساتھ موجود تھے اور انہوں نے بھی مداحوں کا استقبال کیا۔ پولیس کے مطابق یہ ای میل نائب میئر سنجے گھاڑی کو بھی بھیجی گئی تھی۔ اس میں 31 اکتوبر کو ایک اسکول پر دستی بم سے حملے کی دھمکی دی گئی تھی، جبکہ امیتابھ بچن کے جوہو واقع گھر ’جلسہ‘ کو بھی 31 اکتوبر سے 27 نومبر کے درمیان نشانہ بنانے کی بات کہی گئی تھی۔

ای میل میں خالصتان کا حوالہ بھی دیا گیا تھا۔ اس میں دعویٰ کیا گیا تھا کہ 27 نومبر کو مہالکشمی ریس کورس کے علاقے میں گلوکار دلجیت دوسانجھ کے کنسرٹ کے دوران بھی حملہ کیا جائے گا۔ احتیاطی اقدام کے طور پر میئر کے دفتر، مہالکشمی ریس کورس، شہر کے اہم تعلیمی اداروں اور ای میل میں جن دیگر مقامات کا ذکر کیا گیا ہے، وہاں سکیورٹی اور نگرانی بڑھانے کی ہدایات جاری کر دی گئی ہیں۔