نئی دہلی
خام تیل کی قیمتوں میں نمایاں کمی اور امریکہ۔ایران مذاکرات کے حوالے سے عالمی سطح پر بہتر ہوتے ہوئے رجحان کے درمیان پیر کے روز ابتدائی کاروبار میں گھریلو شیئر بازاروں سینسیکس اور نفٹی میں زبردست تیزی دیکھی گئی۔ابتدائی کاروبار کے دوران 30 حصص پر مشتمل بی ایس ای سینسیکس 908.98 پوائنٹس کے اضافے کے ساتھ 76,317.85 کی سطح پر پہنچ گیا۔ اسی طرح 50 حصص پر مشتمل این ایس ای نفٹی 262.65 پوائنٹس چڑھ کر 23,977.70 پر ٹریڈ کر رہا تھا۔
سینسیکس میں شامل 30 کمپنیوں میں مہندرا اینڈ مہندرا، ایچ ڈی ایف سی بینک، بجاج فائنانس، بجاج فنسرو، لارسن اینڈ ٹوبرو اور انٹرگلوب ایوی ایشن (انڈیگو) کے حصص سب سے زیادہ فائدے میں رہے۔
دوسری جانب ٹاٹا کنسلٹنسی سروسز (ٹی سی ایس) اور سن فارما کے حصص میں کمی دیکھی گئی۔
بین الاقوامی معیار کے برینٹ خام تیل کے فیوچر معاہدوں میں 5.58 فیصد کی بڑی گراوٹ درج کی گئی، جس کے بعد اس کی قیمت 97.76 ڈالر فی بیرل تک آ گئی۔ایشیائی بازاروں میں جاپان کا نکی 225 اور چین کا ایس ایس ای کمپوزٹ انڈیکس بڑھت کے ساتھ کاروبار کرتے رہے، جبکہ جنوبی کوریا اور ہانگ کانگ کے بازار تعطیل کے باعث بند رہے۔ امریکی بازار جمعہ کے روز مثبت سطح پر بند ہوئے تھے۔
شیئر بازار کے اعداد و شمار کے مطابق غیر ملکی ادارہ جاتی سرمایہ کاروں (ایف آئی آئی) نے جمعہ کو خالص طور پر 4,440.47 کروڑ روپے مالیت کے حصص فروخت کیے تھے۔
جمعہ کے روز سینسیکس 231.99 پوائنٹس کے اضافے کے ساتھ 75,415.35 پر بند ہوا تھا، جبکہ نفٹی 64.60 پوائنٹس کی تیزی کے ساتھ 23,719.30 کی سطح پر بند ہوا تھا۔
