عاطرخان ۔ ایڈیٹر اِن چیف ، آواز دی وائس

محترم قارئین

ہمیں یہ اعلان کرتے ہوئے خوشی ہو رہی ہے کہ ہم اپنی نئی سیریز ’’میزان ۔ ایک نئے مسلم تصورِ فکر کی جانب‘‘ شروع کر رہے ہیں۔اس سیریز کا مقصد ہمارے عہد کے بعض انتہائی اہم اور سنجیدہ مسائل پر گفتگو کرنا ہے۔آخر ہندوستان کی ترقی کی کہانی میں مسلمان پیچھے کیوں رہ گئے ہیں؟ جب بھی ہم یہ سوال اٹھاتے ہیں تو عموماً اس کی ذمہ داری سیاست یا ملک کے نظامِ حکمرانی پر ڈال دیتے ہیں۔یہ حقیقت ہے کہ گزشتہ کئی دہائیوں میں بدلتی ہوئی سیاسی صورتِ حال کے باعث مسلمانوں نے خود کو حاشیے پر محسوس کیا ہے۔ لیکن یہ تصویر کا صرف ایک پہلو ہے۔

اگر سیاسی نمائندگی ہی کسی کمیونٹی کی حالت بہتر بنانے کا واحد حل ہوتی تو پاکستان اور بنگلہ دیش دونوں آج کہیں زیادہ بہتر حالت میں ہوتے۔ لیکن حقیقت ایسی نہیں ہے۔

حقیقت یہ ہے کہ مسلم کمیونٹی کو درپیش موجودہ مسائل کی ایک بڑی وجہ یہ بھی ہے کہ وہ تیزی سے بدلتی ہوئی سماجی، اقتصادی اور سیاسی حقیقتوں کے ساتھ اپنی رفتار برقرار نہیں رکھ سکی۔ 

ہندوستانی مسلمانوں کے پاس ہمیشہ ایک ایسا تعمیری فکری بیانیہ کم رہا ہے جو انہیں ترقی کی راہ پر تیزی سے آگے لے جا سکتا۔ شاید اب وقت آ گیا ہے کہ انہیں ایک نئی فکر اور نئے بیانیے کی ضرورت کو تسلیم کیا جائے۔

مسلمانوں نے سائنس دانوں، صنعت کاروں، ماہرین قانون، فنکاروں، سول سروس کے افسران، علما اور فوجیوں کی حیثیت سے نمایاں کامیابیاں حاصل کی ہیں، لیکن مجموعی تصویر میں یہ کامیابیاں ابھی بہت محدود ہیں۔

مسلمانوں کے بارے میں عوامی گفتگو بڑی حد تک خوف، شناخت اور تقسیم پر مبنی سیاست سے تشکیل پاتی رہی ہے۔ تعلیم، ادارہ سازی اور اقتصادی ترقی جیسے فوری اور بنیادی مسائل سیاسی بیان بازی کی کشمکش میں پسِ پشت چلے گئے ہیں۔

اس چیلنج کا جواب خود ترسی نہیں بلکہ ایماندارانہ خود احتسابی اور آگے بڑھنے کا عزم ہونا چاہیے۔

زیادہ تر ہندوستانی مسلمانوں کے لیے مذہب ان کی ذاتی شناخت کے ساتھ ساتھ سماجی شعور کی تشکیل میں بھی اہم کردار ادا کرتا ہے۔

یہ خصوصیت ان کی سب سے بڑی طاقت بن سکتی تھی، لیکن موجودہ دور کی حقیقتوں کے تناظر میں اسلامی تعلیمات کو سمجھنے اور ان کا اطلاق کرنے میں ناکامی نے ایک طرح کی جمود کی کیفیت پیدا کردی ہے۔

ایمان اور بنیادی دینی اقدار ابدی ہیں، لیکن قوانین، رسوم اور روایات ابدی نہیں ہوتیں۔ انہیں اپنے زمانے کی بدلتی ہوئی حقیقتوں کے ساتھ تبدیل ہونا چاہیے۔

ہماری مذہبی سمجھ بوجھ قرآن، سنت اور اسلامی علمی روایت سے براہِ راست استفادہ کرنے کے بجائے اکثر موروثی رسوم، مسلکی وابستگیوں اور ثقافتی طریقوں سے تشکیل پاتی رہی ہے۔

مذہبی مقاصد کے حصول میں انسانی افراد یا ادارے خود مذہبی متون سے زیادہ اہمیت اختیار کر گئے ہیں۔ یہی وجہ ہے کہ غلط فہمیاں برقرار رہیں، داخلی اختلافات گہرے ہوتے گئے اور بہت سے مسلمان اسلام کی اپنی متحرک فکری اور غوروفکر کی روایت سے بھی دور ہوتے گئے۔

اس کے نتائج ہمارے سامنے ہیں۔ تعلیمی ترقی ناکافی ہے، خواتین کی عوامی زندگی میں شرکت کی حوصلہ شکنی کی جاتی ہے اور معیاری ادارے قائم نہیں کیے جا سکے ہیں۔

ان کمزوریوں نے اقتصادی جمود کو بڑھایا ہے اور دیگر ہندوستانیوں کے درمیان مسلمانوں کے بارے میں منفی تصورات کو بھی مضبوط کیا ہے۔

یہ صورتحال ایک گہرا تضاد پیش کرتی ہے۔ ایک ایسی کمیونٹی جس نے ہندوستان کی آزادی کی تحریک، ادب، ثقافت، تعلیم، سائنس اور عوامی زندگی میں غیر معمولی خدمات انجام دیں، آج خود غیر یقینی، کم ہوتے ہوئے سماجی اعتماد اور وسیع پیمانے پر پائی جانے والی بداعتمادی کا سامنا کر رہی ہے۔

تقسیم، سخت گیر سوچ، مسلسل احساسِ محرومی اور مشترکہ ترقی کے وژن کی عدم موجودگی نے ہندوستانی مسلمانوں کی ترقی کو محدود کردیا ہے۔

جب سچر کمیٹی کی رپورٹ 2006 میں سامنے آئی تو اس میں ہندوستانی مسلمانوں کی تعلیمی، اقتصادی اور سماجی محرومی کی تفصیلات پیش کی گئیں۔رپورٹ نے اصلاحات کی فوری ضرورت پر زور دیا تھا۔

بدقسمتی سے اسے خطرے کی گھنٹی سمجھ کر سماجی تبدیلی کا لائحۂ عمل بنانے کے بجائے جلد ہی سیاسی کشمکش کا موضوع بنا دیا گیا۔تقریباً دو دہائیاں گزرنے کے بعد بھی ان میں سے بہت سے بنیادی مسائل برقرار ہیں۔

شناخت سے متعلق بحث نے تعلیم، کاروباری صلاحیت، ادارہ جاتی معیار اور سماجی اصلاح جیسے بنیادی تقاضوں کو پسِ پشت ڈال دیا ہے۔

ہندوستانی مسلمان کوئی یکساں کمیونٹی نہیں ہیں۔ ان کی زبانیں، نسلی پس منظر، ثقافتیں اور روایات مختلف ہیں۔ ایسی متنوع آبادی کو درپیش ہر مسئلے کا ایک ہی حل نہیں ہوسکتا۔ تاہم اس تنوع کے باوجود بہت سے بنیادی اور ساختی مسائل حیرت انگیز طور پر ایک جیسے ہیں۔

ہندوستانی جمہوریت نے ارتقا کی منازل طے کی ہیں، سیاسی حالات تبدیل ہوئے ہیں اور نئے سیاسی منظرنامے میں مسلم ووٹوں کا حساب مطلوبہ تعداد تک نہیں پہنچتا۔ان تبدیلیوں کے پیش نظر مسلم سوچ اور طرزِ فکر میں بھی نئی صورتِ حال کے مطابق تبدیلی ضروری ہے۔

واضح طور پر آنے والی دہائیوں میں مسلم کمیونٹی کا مستقبل سیاسی سرپرستی پر منحصر نہیں ہوگا بلکہ اس کا زیادہ انحصار تعلیم، فکری اعتماد، اقتصادی طاقت، ادارہ جاتی صلاحیت اور ملک کے ساتھ تعمیری وابستگی پر ہوگا۔ یہ تبدیلی کمیونٹی کے اندر سے ہی آنا ہوگی۔

اسی لیے موجودہ وقت ترقی کی ایک نئی زبان کا تقاضا کرتا ہے؛ ایسی زبان جو شاندار ماضی کی صرف یاد کے بجائے خود اعتمادی، احساسِ محرومی کے بجائے عزم، علامتی سیاست کے بجائے ادارہ سازی اور محاذ آرائی کے بجائے بامعنی شرکت کو فروغ دے۔

اسی یقین سے ’’میزان‘‘ کی بنیاد پڑتی ہے، جو آواز دی وائس کی جانب سے آج شروع کیا جانے والا ایک اہم ادارتی منصوبہ ہے۔

گزشتہ کئی برسوں کے دوران آواز دی وائس کی صحافت نے جان بوجھ کر ان روایتی اور گھسے پٹے تصورات سے آگے بڑھنے کی کوشش کی ہے جن کے ذریعے ہندوستانی مسلمانوں کو دیکھا اور سمجھا جاتا رہا ہے۔آج بھی مسلم کمیونٹی کی شناخت بڑی حد تک تنازع اور شناخت کی سیاست سے جوڑ دی جاتی ہے۔ ہندوستانی مسلمانوں کو اس تصور کو بدلنا ہوگا اور تقسیم کی سیاست کو مضبوط کرنے کے بجائے بنیادی طور پر کمیونٹی کی ادارہ سازی پر توجہ مرکوز کرنا ہوگی۔آواز دی وائس میں ہم نے تحقیق، شواہد، شمولیت اور فکری دیانت پر مبنی راستہ اختیار کیا ہے۔ ہمارا مقصد اختلافات کو گہرا کرنا نہیں بلکہ مکالمے کو فروغ دینا رہا ہے۔

کمیونٹی کے سامنے اصل چیلنج اسلام اور جدیدیت میں سے کسی ایک کا انتخاب کرنا نہیں ہے، بلکہ یہ دکھانا ہے کہ اسلام کے لازوال اخلاقی اصول اکیسویں صدی کی پیچیدہ حقیقتوں کے ساتھ بامعنی طور پر کس طرح رہنمائی کرسکتے ہیں۔

اسی طرح اپنے ہم وطنوں کے ساتھ زیادہ مضبوط تعلق اور مکالمے کی بھی ضرورت ہے۔ مستقبل تنہائی کے بجائے تعاون، شک کے بجائے مکالمے اور الگ تھلگ رہنے کے بجائے ملک کی تعمیر میں فعال شرکت کا تقاضا کرتا ہے۔

ہندوستان کی کثیرالجہتی جمہوریت ایسے مواقع فراہم کرتی ہے جن سے فائدہ صرف اعتماد، شرکت اور باہمی بھروسے کے ذریعے اٹھایا جاسکتا ہے۔

اسی وژن کے ساتھ ’’میزان‘‘ سیریز ہندوستان اور بیرونِ ملک کے ممتاز علما، مفکرین، ماہرین اور عوامی دانشوروں کے مضامین، گفتگو اور پوڈکاسٹ پیش کرے گی، تاکہ آج مسلم کمیونٹی کو درپیش اہم ترین سوالات کا جائزہ لیا جاسکے۔

اس سیریز کا مقصد ظاہری یا عارضی حل پیش کرنا اور نہ ہی سادہ اور آسان جواب دینا ہے۔ نہ ہی اس کا مقصد بدلتے ہوئے سیاسی رجحانات کے مطابق اسلام کی نئی تعریف کرنا ہے۔

اسلام اپنی اخلاقی اور روحانی بنیادوں کے اعتبار سے مکمل ہے۔ اسے مسلسل تجدید کی ضرورت نہیں، البتہ اس کی تعلیمات کو صحیح طور پر سمجھنے اور بدلتی ہوئی سماجی حقیقتوں پر ان کا درست اطلاق کرنے کی ضرورت  ہے۔

ماضی میں مسلمانوں نے قرآن کے ابدی پیغام اور نبی کریم ﷺ کی سنت سے وفادار رہتے ہوئے اپنے اپنے زمانے کے حالات کے مطابق اسلامی رہنمائی کی تشریح کی ہے۔

ہماری نسل بھی اسی سوچ، تدبر اور فکری وابستگی کی مستحق ہے، بلکہ اسے اس کی ضرورت ہے۔

میزان کے پیچھے بنیادی خیال ہندوستانی مسلمانوں کی ترقی اور بہبود کے لیے ایک تعمیری گفتگو کا آغاز کرنا ہے۔ یہ ایک دعوت ہے: زیادہ گہرائی سے سوچنے کی، ان موروثی تصورات پر سوال اٹھانے کی جو ہمیں مطمئن اور بے فکر بناتے ہیں، اسلام کی اخلاقی روح کو دوبارہ زندہ کرنے کی اور ہندوستان کے مستقبل کی تشکیل میں اپنا کردار ادا کرنے کی۔

ہزاروں نوجوان مسلمان خاموشی سے یونیورسٹیوں، اسٹارٹ اپس، سرکاری خدمات اور مختلف پیشوں میں نمایاں کامیابیاں حاصل کر رہے ہیں۔ ان کی کامیابیاں ثابت کرتی ہیں کہ کمیونٹی کو درپیش رکاوٹیں نہ مستقل ہیں اور نہ ناقابلِ عبور۔

جب ہندوستان 2047 تک ایک ترقی یافتہ ملک بننے کا ہدف حاصل کرنے کی کوشش کر رہا ہے تو ہندوستانی مسلمانوں کے پاس اس قومی سفر میں فعال کردار ادا کرنے کا موقع بھی ہے اور ذمہ داری بھی۔

کمیونٹی کو نئی نسل کے ایسے رہنماؤں کی ضرورت ہے جو صرف سیاست میں ہی نہیں بلکہ تعلیم، کاروبار، سائنس، قانون، میڈیا، سول سوسائٹی اور دینی علوم کے میدانوں میں بھی قیادت کرسکیں۔مستقبل کوئی ایسی چیز نہیں جو ہندوستانی مسلمانوں کے ساتھ محض پیش آئے گی۔ مستقبل ایسی چیز ہے جس کی تشکیل میں انہیں خود اپنا کردار ادا کرنا ہوگا۔

ہم اپنے قارئین کو دعوت دیتے ہیں کہ وہ ہماری تحریروں کے بارے میں اپنی رائے اور تجاویز ہمیں اس ای میل پر بھیجیں:

[email protected]