یونس علوی / نوح (ہریانہ)

ہریانہ کے ضلع نوح کی سیدہ زینب حسین اور ان کی خالہ سیدہ سعدیہ نے میڈیکل کالج میں داخلے کے لیے ہونے والا امتحان نیٹ 2025 کامیابی سے پاس کر کے نہ صرف اپنے خاندان بلکہ پورے علاقے کا نام روشن کر دیا ہے۔ یہ علاقہ نیتی آیوگ کی رپورٹ کے مطابق ملک کے سب سے پسماندہ علاقوں میں شمار ہوتا ہے۔ان نوجوان بچیوں کی کامیابی اس لیے بھی تاریخی حیثیت رکھتی ہے کہ یہ میوات کی علوی کمیونٹی سے تعلق رکھتی ہیں، جو مسلمانوں کا ایک سماجی طور پر پسماندہ ہے۔ زمین کی ملکیت، تعلیم اور خواتین کے بااختیار بنانے کے فقدان کے باعث علوی برادری میوات کی سب سے محروم کمیونٹیز میں سے ہے۔

سیدہ زینب حسین نے نیٹ 2025 میں 551 نمبر حاصل کر کے نئی تاریخ رقم کی ہے۔ وہ علوی کمیونٹی کی پہلی لڑکی بن گئی ہیں جس نے یہ قابلِ فخر امتحان کامیابی سے پاس کیا ہے۔اس برادری میں عموماً لڑکیوں کو پرائمری تعلیم کے بعد آگے پڑھنے کی اجازت نہیں دی جاتی، مگر زینب نے اس روایت کو توڑتے ہوئے یہ ثابت کر دیا کہ اگر ارادہ پختہ ہو تو کوئی بھی خواب پورا کیا جا سکتا ہے۔ دلچسپ بات یہ ہے کہ زینب نے تیسری کوشش میں کامیابی حاصل کی۔

زینب کی خالہ (والدہ کی بہن) سیدہ سادیہ نے بھی نیٹ 2025 میں 536 نمبر حاصل کر کے ثابت کر دیا کہ یہ محض اتفاقیہ کامیابی نہیں، بلکہ سماجی تبدیلی کی شروعات ہے۔زینب کے والد ذاکر حسین ہریانہ پولیس میں اسسٹنٹ سب انسپکٹر کے عہدے پر فائز ہیں اور ایس پی آفس نوح کی سکیورٹی برانچ میں تعینات ہیں۔ ان کا تعلق نوح کے قصبہ فیروزپور جھرکہ کے کامینڈا گاؤں سے ہے۔زینب کے دادا مرحوم جمیل احمد اسٹیٹ بینک آف انڈیا میں ہیڈ گارڈ تھے۔ ایسے درمیانے طبقے کے خاندان میں پرورش پانے والی زینب کی میڈیکل جیسے سخت مقابلے والے میدان میں کامیابی نہ صرف اس کی ذاتی جیت ہے بلکہ اس کے طبقے کی لڑکیوں کے لیے ایک مثال اور تحریک کا باعث بن چکی ہے۔

ذاکر حسین کے مطابق کہ زینب بچپن سے ہی پڑھائی میں ذہین رہی ہے۔ دو بار ناکامی کے باوجود اس نے ہار نہیں مانی، ہر ناکامی سے سبق سیکھا، آگے بڑھتی رہی اور اس بار نیٹ میں اچھے نمبر حاصل کر کے یہ ثابت کر دیا کہ اگر جذبہ سچا ہو تو کامیابی ضرور ملتی ہے۔اسی طرح سیدہ سادیہ بھی ایک متوسط طبقے کے خاندان سے تعلق رکھتی ہیں۔ ان کے والد حاجی اسرائیل 2016 میں میوات کے سول سرجن دفتر میں ڈرائیور کے عہدے سے ریٹائر ہوئے تھے۔ انہوں نے اپنی تمام بیٹیوں کو اچھی تعلیم دلانے میں کوئی کسر نہیں چھوڑی۔ذاکر حسین کے مطابق اگرچہ ان کی اہلیہ صرف میٹرک پاس ہیں، مگر ان کی تمام بہنیں ایم اے، ڈبل ایم اے کر رہی ہیں اور ان کا ایک بھائی ایم بی بی ایس کر رہا ہے۔

علوی کمیونٹی کی ممتاز شخصیات جیسے ضلع کونسلر صابر حسین، جکم علوی، غلام نبی آزاد، سید ذاکر حسین اور ماسٹر ناظم حسین نے زینب اور سادیہ کے گھر جا کر انہیں اور ان کے اہل خانہ کو مبارکباد دی۔نوح بار ایسوسی ایشن کے سابق صدر طاہر حسین روپڈیا نے دونوں لڑکیوں کے گھروں کے دورے کے بعد میڈیا سے گفتگو کرتے ہوئے کہا کہ نیٹ کا امتحان پاس کر کے ان بچیوں نے معاشرے کی دیگر لڑکیوں کے لیے نئی راہیں کھول دی ہیں۔ یہ ایک مثال بنے گی جو آنے والے وقت میں مشن کی شکل اختیار کرے گی۔انہوں نے مزید کہا، "میوات جیسے علاقے میں جہاں خاتون ڈاکٹروں کی شدید کمی ہے، جب ہماری اپنی بیٹیاں ڈاکٹر بنیں گی تو نہ صرف یہاں کی خواتین کا بہتر علاج کریں گی بلکہ معاشرے کی سوچ بھی بدل دیں گی۔سماجی ماہرین کے مطابق زینب اور سادیہ کی یہ کامیابی راجستھان کی مسلم اکثریتی میوات  U]o  میں خواتین کی تعلیم کے فروغ میں سنگ میل ثابت ہو گی۔