اونیکا مہیشوری / نئی دہلی

آج کے دور میں خصوصاً خواتین میں تمباکو نوشی کا رجحان بڑھتا جا رہا ہے۔ دنیا کے ہر کونے میں اس رجحان نے خطرے کی گھنٹی بجا دی ہے ،مسئلہ صرف سماجی یا اخلاقی نہیں رہا ہے بلکہ یہ  خواتین کی صحت پر کچھ اس طرح اثر انداز ہورہا ہے کہ  خواتین کے لیے ماں بننے کے امکانات کو بھی کم کررہا ہے ۔ آواز دی وائس نے  تمباکو نوشی مخالف عالمی دن کے موقع پر مشہور آئی وی ایف ماہر ڈاکٹر شاہدہ نغمہ  سے بات کی ۔اس بات اور باریکیوں کو جاننے کی کوشش کی ہے کہ  خواتین کو تمباکو نوشی سے کون سے سنگین طبی خطرات لاحق ہو سکتے ہیں۔ انہوں نے بتایا کہ تمباکو نہ صرف پھیپھڑوں اور دل کے لیے مضر ہے بلکہ یہ خواتین کی تولیدی صحت پر بھی منفی اثر ڈال سکتا ہے۔

تمباکو نوشی خواتین کی صحت کو مردوں کی نسبت کیسے مختلف اور زیادہ متاثر کرتی ہے؟

ڈاکٹر شاہدہ نے بتایا کہ اگر ہم خواتین میں تمباکو نوشی پر غور کریں، تو اس سے کئی قسم کے صحت کے خطرات بڑھ جاتے ہیں۔ سب سے پہلا خطرہ یہ ہے کہ بچہ دانی (یوٹرس) میں انفیکشن ہونے کے امکانات بڑھ جاتے ہیں۔ اس کے ساتھ ساتھ تمباکو جسم کے مدافعتی نظام (امیونٹی) کو بھی کمزور کرتا ہے کیونکہ یہ ایک امیونو سپریسنٹ کی طرح کام کرتا ہے۔ اس کے نتیجے میں جسم میں مختلف قسم کے انفیکشنز کے امکانات بڑھ جاتے ہیں۔

اگر ہم خواتین میں بانجھ پن (انفَرٹیلٹی) کے رجحان کو دیکھیں، تو یہ بھی تمباکو نوش خواتین میں زیادہ پایا گیا ہے۔ جب تمباکو نوشی کرنے والی خواتین اور نہ کرنے والی خواتین کا موازنہ کیا گیا تو واضح طور پر سامنے آیا کہ تمباکو استعمال کرنے والی خواتین میں بانجھ پن کی شرح کہیں زیادہ ہوتی ہے۔

تمباکو نوشی سے فالُوپین ٹیوبز (یعنی وہ نالیاں جن سے ہر مہینے انڈا گزر کر یوٹرس تک پہنچتا ہے) پر بھی برا اثر پڑتا ہے۔ اس کے نتیجے میں ایکٹوپک حمل (بچہ دانی کے باہر حمل ٹھہرنا)، اسقاط حمل (ابورشن)، اور دیگر حمل سے متعلق پیچیدگیاں بڑھ جاتی ہیں۔

اگر تمباکو نوشی کرنے والی خاتون حاملہ ہو بھی جائے، تب بھی کئی خطرات ہوتے ہیں، جیسے ۔ بچے کا وزن نارمل سے کم ہونا، حمل کے دوران پیچیدگیاں آنا اور قبل از وقت زچگی (ارلی لیبر) ہونا۔ یہ مسائل عام طور پر تمباکو نوش خواتین میں زیادہ دیکھے گئے ہیں۔

خواتین میں تمباکو کے خطرات سے متعلق کون کون سے عام مغالطے(myths) پائے جاتے ہیں؟

صرف سگریٹ نوشی ہی نقصان دہ نہیں بلکہ چبانے والا تمباکو بھی اتنا ہی نقصان دہ ہے، کیونکہ اس میں موجود نکوٹین بالآخر خون میں شامل ہو ہی جاتا ہے۔ اگر کوئی تمباکو چبا رہا ہے، تو وہ سیدھا خون میں جذب ہو رہا ہے۔ اور اگر کوئی سگریٹ نوشی کر رہا ہے، تو نکوٹین پھیپھڑوں کے ذریعے خون میں پہنچتا ہے۔

جو خواتین ماں بننے کی کوشش کر رہی ہیں، ان کے لیے تمباکو کا استعمال کتنی نقصان دہ ثابت ہو سکتا ہے؟

حمل کے دوران تمباکو نوشی بچے کی نشوونما کے لیے بہت نقصان دہ ہو سکتی ہے۔ جیسا کہ میں نے پہلے کہا، اس کا اثر نہ صرف ماں پر ہوتا ہے بلکہ بچے کی نشوونما پر بھی شدید اثر ڈالتا ہے۔ ماں کے معاملے میں پری-اکلیمپسیا (PIH) ہونے کے امکانات بڑھ جاتے ہیں اور قبل از وقت زچگی (پری ٹرم لیبر) کے چانسز بھی زیادہ ہو جاتے ہیں۔ بچے کے معاملے میں گروتھ ریٹارڈیشن یعنیFGR (فیٹل گروتھ ریسٹرکشن) کا امکان بڑھ جاتا ہے۔ بچہ کم وزن کے ساتھ پیدا ہو سکتا ہے اور ڈیلیوری وقت سے پہلے ہو سکتی ہے۔

کیا حمل کے کسی خاص مرحلے میں تمباکو کا اثر زیادہ شدید ہوتا ہے؟

حمل کی ابتدا میں، اگر ہم اسے تین حصوں میں تقسیم کریں ۔ پہلا ٹرائمسٹر، دوسرا ٹرائمسٹر اور تیسرا ٹرائمسٹر—
تو پہلا ٹرائمسٹر وہ وقت ہوتا ہے جب حمل ٹھہرنے سے لے کر تقریباً 12 ہفتے یعنی 3 ماہ کا عرصہ ہوتا ہے۔ اس دوران بچے کے اعضاء کی تشکیل ہو رہی ہوتی ہے۔

اگر اس وقت ماں کسی بھی قسم کے زہریلے مواد (ٹاکسنز) کے رابطے میں آتی ہے، تو اس کا براہِ راست اثر بچے پر پڑ سکتا ہے۔ خاص طور پر پہلے ٹرائمسٹر اور دوسرے ٹرائمسٹر کے آغاز میں اگر ماں تمباکو یا کسی اور نقصان دہ چیز کے رابطے میں آتی ہے، تو بچے میں پیدائشی نقائص(congenital malformations) کے امکانات بڑھ جاتے ہیں۔

اس وقت بچہ ایسی نقصان دہ چیزوں کے اثرات کے لیے انتہائی حساس ہوتا ہے، کیونکہ اسی وقت اس کے اہم اعضاء بن رہے ہوتے ہیں۔

کیا تمباکو نوشی ماہواری (پیریڈز) میں بے قاعدگی یا ہارمونی تبدیلیوں کا سبب بن سکتی ہے؟

اگر کوئی تمباکو ضرورت سے زیادہ استعمال کر رہا ہے، تو اس کے ماہواری کے دوران زیادہ درد ہونے کے امکانات ہو سکتے ہیں، اور اگر انفیکشن ہو جائے تو ہو سکتا ہے کہ ماہواری کم ہو جائے یا وقت پر نہ آئے۔

کیا پی سی او ایس(PCOS) یا اینڈومیٹریوسِس جیسی حالتوں میں تمباکو کا کردار ہو سکتا ہے؟

PCOS اورendometriosis میں، اگر کوئی تمباکو کا استعمال کر رہا ہے، تو ان کی علامات اور بگڑ سکتی ہیں۔PCOS میں ایسا زیادہ تحقیق میں نہیں دیکھا گیا، لیکن اگرendometriosis ہے، تو اس سے متعلق درد(pain) اور زیادہ بڑھ سکتا ہے، جیسا کہ کئی تحقیقی مقالات میں ثابت ہوا ہے۔

کیا آپ نے نوجوان خواتین میں تمباکو نوشی میں اضافہ دیکھا ہے؟ اس کی کیا وجوہات ہو سکتی ہیں؟

نوجوان خواتین میں تمباکو نوشی اب پہلے کے مقابلے میں زیادہ ہو گئی ہے۔ اس کے پیچھے کئی وجوہات ہو سکتی ہیں۔ ایک بڑی وجہ سماجی دباؤ یا پیر پریشر ہے۔ اگر کوئی خاتون کارپوریٹ سیکٹر میں کام کر رہی ہے اور اس کے آس پاس کا ماحول ایسا ہے، تو وہ اس ماحول کے مطابق خود کو ڈھالنے کی کوشش کرتی ہے۔ اسی کوشش میں بعض اوقات نئی عادتیں اپنا لی جاتی ہیں، جن میں تمباکو نوشی بھی شامل ہو سکتی ہے۔

اسی وجہ سے یہ دیکھا گیا ہے کہ خواتین میں تمباکو نوشی کا رجحان بڑھ رہا ہے۔ اس کے علاوہ آگاہی کی بھی کمی ہے ۔ بہت سی خواتین کو یہ علم نہیں ہوتا کہ تمباکو نوشی مستقبل میں ان کی تولیدی صحت یا امراضِ نسواں سے متعلق مسائل پر کیا اثر ڈال سکتی ہے۔

اسی لیے بعض اوقات لوگ اس کو سنجیدگی سے نہیں لیتے اور اسے صرف ایک فیشن یا رجحان کے طور پر اپنا لیتے ہیں۔ یہی وجوہات ہیں کہ خواتین میں تمباکو نوشی کا رجحان بڑھتا جا رہا ہے۔

خواتین میں تمباکو نوشی ترک کرانے کے لیے معالجین کا کیا کردار ہو سکتا ہے؟

خواتین میں تمباکو نوشی ترک کرانے کے لیے معالجین کا بہت اہم کردار ہو سکتا ہے کہ وہ اس بارے میں آگاہی پھیلائیں۔ چاہے وہ فزیشن ہوں، گائناکالوجسٹ ہوں یا ڈائٹیشین ۔ یہ سب مل کر ایک تعاون پر مبنی(collaborative)انداز میں مریض کو مشورہ دے سکتے ہیں۔ انہیں یہ سمجھایا جا سکتا ہے کہ تمباکو نوشی سے مستقبل میں تولیدی صحت، ماہواری اور دیگر امراض پر کیا اثرات مرتب ہو سکتے ہیں۔ اس طرح معالجین کا کردار اس سلسلے میں انتہائی اہم ہے۔

جو خواتین حاملہ ہیں اور تمباکو نوشی ترک کرنا چاہتی ہیں، ان کے لیے آپ کی کیا نصیحت ہے؟

جو خواتین حاملہ ہیں اور تمباکو چھوڑنا چاہتی ہیں، ان کے لیے ضروری ہے کہ جب وہ حمل کی منصوبہ بندی کر رہی ہوں، تب ہی سے ذہنی طور پر خود کو تیار کرنا شروع کر دیں۔

اگر وہ حاملہ ہونے کے بعد بھی تمباکو یا الکحل جیسی کسی چیز کا استعمال کر رہی ہیں، تو اس وقت انہیں سمجھانا اتنا آسان نہیں ہوتا۔

اگر جوڑا ساتھ ہے اور شوہر معاون(supportive) ہے، تو اس کا بہت فائدہ ہوتا ہے اور عورت کے لیے یہ عمل آسان ہو جاتا ہے۔

طویل مدتی طور پر ان کے لیے نفسیاتی مشاورت(psychological counseling) بھی کافی مؤثر ثابت ہو سکتی ہے۔

 تمباکو نوشی سے پرہیز پر آپ خواتین کو کیا پیغام دینا چاہیں گی؟

اگر آپ اپنی زندگی میں کوئی نئی چیز اپنا رہی ہیں، تو اس کے اثرات پر بھی غور کریں۔

34 سالہ ڈاکٹر شاہدہ نغمہ ایم بی بی ایس، ایم ایس، ڈی این بی، گولڈ میڈلسٹ ہیں اور سر گنگا رام اسپتال سے آئی وی ایف میں ایڈوانسڈ فیلوشپ یافتہ ماہر ہیں۔ انہوں نے وی ایم ایم سی اور صفدر جنگ اسپتال میں بھی خدمات انجام دی ہیں۔ ڈاکٹر نغمہ اس وقت بھارت آئی وی ایف، دہلی میں سینئر آئی وی ایف اسپیشلسٹ کے طور پر خدمات انجام دے رہی ہیں۔