نئی دہلی:ہندوستان کے مایہ ناز بلے باز ویرات کوہلی نے پیر کے روز ٹیسٹ کرکٹ سے ریٹائرمنٹ کا اعلان کر دیا، جس کے ساتھ ہی اس شاندار دور کا اختتام ہوا جس میں انہیں اس فارمیٹ کا نجات دہندہ تصور کیا گیا، خاص طور پر اس وقت جب دنیا بھر میں ٹی20 کرکٹ کا غلبہ بڑھ چکا تھا۔36 سالہ کوہلی، جنہوں نے اعتراف کیا کہ یہ فیصلہ آسان نہیں تھا، ہندوستان کی جانب سے 123 ٹیسٹ میچز میں میدان میں اترے، جن میں انہوں نے 9230 رنز بنائے، 30 سنچریوں کے ساتھ، اور اوسط 46.85 رہی۔ اب وہ صرف ون ڈے کرکٹ کھیلیں گے کیونکہ وہ پہلے ہی ٹی20 انٹرنیشنل سے ریٹائرمنٹ لے چکے ہیں۔

انہوں نے انسٹاگرام پر اپنے بیان میں کہاکہ  میں شکرگزاری سے بھرے دل کے ساتھ رخصت ہو رہا ہوں ۔ اس کھیل کے لیے ان لوگوں کے لیے جن کے ساتھ میدان میں وقت گزارا، اور ان ہر ایک شخص کے لیے جنہوں نے اس سفر میں مجھے پہچانا۔

انہوں نے مزید لکھاکہ آج سے 14 سال پہلے جب میں نے پہلی بار ٹیسٹ کرکٹ میں بلیو کٹ پہنی تھی، تو مجھے اندازہ نہیں تھا کہ یہ سفر مجھے کہاں لے جائے گا۔ اس نے مجھے آزمایا، نکھارا، اور وہ سبق سکھائے جو زندگی بھر میرے ساتھ رہیں گے۔کوہلی کا آخری ٹیسٹ دورہ آسٹریلیا تھا، جو کارکردگی کے لحاظ سے مایوس کن رہا ، اس میں وہ صرف ایک سنچری بنا سکے۔ وہ اپنے کیریئر کا اختتام 10,000 رنز کی حد سے خاصے پیچھے کر گئے، جو ایک وقت میں محض وقت کی بات سمجھی جا رہی تھی۔

اس کے باوجود، وہ ٹیسٹ کرکٹ کے ایک دیو قامت کھلاڑی کے طور پر رخصت ہو رہے ہیں۔ ان کے کیریئر میں سات ڈبل سنچریاں شامل ہیں — جو کسی بھی ہندوستانی بلے باز سے زیادہ ہیں، یہاں تک کہ سنیل گاوسکر (4)، سچن ٹنڈولکر (6)، وریندر سہواگ (6) اور راہول ڈریوڈ (5) جیسے لیجنڈز سے بھی آگے۔اس دور میں جب ٹی20 لیگز بین الاقوامی کرکٹ کا سب سے مقبول اور دیکھا جانے والا مظاہرہ بن چکی تھیں، کوہلی کی موجودگی نے شائقین کو ٹیسٹ کرکٹ سے جوڑے رکھنے میں اہم کردار ادا کیا۔اس بات کا اعتراف خود لیجنڈری ویسٹ انڈین بلے باز سر ویو رچرڈز نے کیا، جن سے کوہلی کا اکثر موازنہ کیا جاتا رہا ہے۔

اپنے الوداعی نوٹ میں کوہلی نے لکھا کہ سفید کٹ پہن کر کھیلنے کا تجربہ بہت ذاتی ہوتا ہے۔ خاموش محنت، لمبے دن، اور وہ چھوٹے چھوٹے لمحات جنہیں شاید کوئی نہ دیکھے مگر وہ ہمیشہ دل و دماغ میں محفوظ رہتے ہیں۔انہوں نے مزید کہاکہ جب میں اس فارمیٹ سے الگ ہو رہا ہوں، تو یہ آسان نہیں ہے — مگر درست لگتا ہے۔ میں نے اپنی پوری توانائی اس میں جھونک دی، اور اس نے مجھے اس سے کہیں زیادہ لوٹایا جس کی مجھے امید تھی۔میں ہمیشہ اپنی ٹیسٹ کرکٹ کو ایک مسکراہٹ کے ساتھ یاد رکھوں گا۔ویرات کوہلی کی ریٹائرمنٹ کے ساتھ ہی ہندوستانی ٹیسٹ کرکٹ سے بڑے ناموں کے رخصت ہونے کا سلسلہ جاری ہے۔ ان سے قبل دسمبر میں روی چندرن اشون اور پچھلے ہفتے روہت شرما بھی اس فارمیٹ کو خیرباد کہہ چکے ہیں۔