رانچی : جھارکھنڈ کے دیہی علاقوں سے کچھ ایسی کہانیاں نکل کر سامنے آئی ہیں جنہوں نے صرف سرکاری نوکری کا خواب نہیں دیکھا بلکہ اپنی بے سروسامانی، غربت، جسمانی معذوری اور سماجی دباؤ کو شکست دے کر اس خواب کو حقیقت میں بدل دیا۔ جے پی ایس سی امتحان میں کامیابی حاصل کرنے والے یہ نوجوان، صرف افسر نہیں بنے، بلکہ وہ اپنی زندگی کے ہر پہلو میں حقیقی ہیرو ثابت ہوئے۔

ببیتا پہاڑیا: پہاڑوں کی بیٹی، خوابوں کی فاتح

ڈمکا ضلع کے ایک چھوٹے سے گاؤں کی ببیتا پہاڑیا کا تعلق اس قبیلے سے ہے جسے ہندوستان کے سب سے پسماندہ قبائل میں شمار کیا جاتا ہے۔ پہاڑیا قبیلے کی زندگی آج بھی فطرت کے قریب، جنگل پر منحصر اور جدید دنیا سے بہت پیچھے ہے۔ ایسے میں جب ببیتا نے افسر بننے کا خواب دیکھا، تو یہ کسی معجزے سے کم نہیں تھا۔ببیتا کے والد ایک نجی اسکول میں ہیلپر ہیں، ماں گھریلو خاتون ہیں، اور بھائی پوسٹ آفس میں کام کرتا ہے۔ ایسے محدود وسائل میں جے پی ایس سی جیسے امتحان کی تیاری کرنا کسی پہاڑ سر کرنے سے کم نہیں تھا۔ ببیتا پر جب شادی کے لیے دباؤ پڑا، تو اس نے صاف انکار کرتے ہوئے کہا: "جب تک سرکاری نوکری نہ ملے، شادی نہیں کروں گی۔"جب 25 جولائی کو نتائج آئے اور ببیتا نے 337واں رینک حاصل کیا، تو گھر میں جشن کے لیے مٹھائی کے پیسے بھی نہ تھے۔ ایسے میں ببیتا کی ماں نے چینی سے لوگوں کا منہ میٹھا کیا۔ یہ وہ میٹھا لمحہ تھا، جو برسوں کی تلخیوں پر غالب آ گیا۔

وشنو منڈا: معذوری کو ہرا کر بنے مثال

رانچی کے تمر بلاک سے تعلق رکھنے والے وشنو منڈا پیدائشی معذور ہیں۔ ماں کے پیٹ میں ایک دوا کے اثر سے ان کے جسم کا ایک حصہ مکمل نشوونما نہیں پا سکا، لیکن ان کے حوصلے میں کبھی کوئی کمی نہ آئی۔ گھر کی غربت ایسی تھی کہ والد جمشیدپور میں دن کو مزدوری اور رات کو چوکیداری کرتے تھے۔وشنو نے نو سال تک جے پی ایس سی امتحان کی تیاری کی۔ کئی بار ناکامی کا سامنا کیا، لیکن ہار نہیں مانی۔ دن میں ٹیوشن پڑھاتے، رات کو قبائلی ہاسٹل میں رہ کر پڑھائی کرتے۔ جب کامیابی ملی، تو صبح چار بجے ان کی آنکھوں میں آنسو اور دل میں سکون تھا۔ وشنو نے نہ صرف امتحان پاس کیا، بلکہ ہزاروں نوجوانوں کو یہ سبق دیا کہ جسم کی کمزوری کبھی بھی خوابوں کی پرواز کو نہیں روک سکتی۔