سری نگر:جموں و کشمیر سے اس بار یونین پبلک سروس کمیشن کے منعقدہ آل انڈیا سول سروسز امتحان 2025 میں ریکارڈ 17 امیدواروں نے کامیابی حاصل کی ہے۔ یہ اس بات کی مثال ہے کہ مثبت حکومتی اقدامات کس طرح لوگوں کی تقدیر بدل سکتے ہیں۔ ان 17 امیدواروں میں سے 5 امیدوار پہاڑی برادری سے تعلق رکھتے ہیں جنہیں دو سال پہلے درج فہرست قبائل کا درجہ دیا گیا تھا۔اسی کے ساتھ 30 سالہ بصارت سے محروم نوجوان عرفان احمد لون نے بھی 957 ویں رینک حاصل کر کے اپنے گاؤں منزپورہ نائدکھئی ضلع بانڈی پورہ کا نام روشن کیا ہے۔

پہاڑی برادری کے جن پانچ امیدواروں نے سول سروسز امتحان میں کامیابی حاصل کی ان میں سوان شرما لمبیری نوشہرہ راجوری 148 ویں رینک۔ ڈاکٹر غلام مایا دین ملک راجوری 683 ویں رینک۔ آکاش جگگی پونچھ 747 ویں رینک۔ محمد اعجاز الرحمٰن منڈی پونچھ 869 ویں رینک۔ اور اظہر آصف خان اوڑی بارہمولہ 886 ویں رینک شامل ہیں۔

یہ تمام امیدوار لائن آف کنٹرول کے سرحدی علاقوں سے تعلق رکھتے ہیں اور انہیں مختلف محرومیوں کا سامنا رہا ہے۔یہ پہلا موقع ہے کہ مرکز کے زیر انتظام خطہ جموں و کشمیر کی پہاڑی برادری کے امیدواروں کا انتخاب محفوظ زمرے کے تحت ہوا ہے۔ اس سے قبل گوجر اور بکروال برادری کو سال 1991 میں درج فہرست قبائل کا درجہ دیا گیا تھا۔

جموں و کشمیر پہاڑی ٹرائبل فورم کے سربراہ سید شبیر احمد گیلانی نے فیس بک پر اپنے بیان میں اسے جموں و کشمیر کے پہاڑی قبائلی عوام کے لئے تاریخی لمحہ قرار دیا۔ انہوں نے کہا کہ اپنے آئینی حقوق کے حصول کے لئے پرامن اور پختہ جدوجہد کے بعد یہ کامیابی حاصل ہوئی ہے۔

انہوں نے کہا کہ حکومت ہند کے اس فیصلے سے ہماری نوجوان نسل کے لئے نئے مواقع کے دروازے کھل گئے ہیں۔ انہوں نے مزید کہا کہ جموں و کشمیر کی پہاڑی قبائلی برادری کے امیدواروں کی اس کامیابی سے یہ ثابت ہوتا ہے کہ ہماری برادری میں بے پناہ صلاحیت اور عزم موجود ہے۔ان کے مطابق یہ کامیابی صرف امیدواروں کی ذاتی کامیابی نہیں بلکہ پوری پہاڑی قبائلی برادری کے لئے فخر کا لمحہ ہے۔

دوسری جانب کشمیر میں لوگ عرفان احمد لون کو بھی مبارکباد دے رہے ہیں جنہوں نے اپنی جسمانی معذوری کو اپنی کامیابی کے راستے میں رکاوٹ نہیں بننے دیا۔ عرفان کے والد بشیر احمد لون نے میڈیا کو بتایا کہ ان کے بیٹے کی بینائی اسکول کے ابتدائی دنوں میں ایک حادثے میں چلی گئی تھی۔

بشیر احمد لون جموں و کشمیر حکومت میں ایک عارضی مزدور کے طور پر کام کرتے ہیں۔عرفان کی ایک آنکھ اس وقت متاثر ہوئی جب ایک ہم جماعت نے غلطی سے پنسل ان کی آنکھ میں چبھو دی۔ بعد میں ان کی دوسری آنکھ کی بینائی بھی ختم ہوگئی لیکن اس کے باوجود عرفان نے اپنی منزل حاصل کرنے کے لئے مسلسل محنت جاری رکھی۔ان کے والد کے مطابق وہ اپنے مقصد کے بارے میں زیادہ بات نہیں کرتے تھے بلکہ پوری توجہ پڑھائی پر دیتے تھے۔ ایک بار انہوں نے کہا تھا کہ جو لوگ اپنے ارادوں کے بارے میں زیادہ بات کرتے ہیں وہ کچھ حاصل نہیں کر پاتے۔

عرفان کی چھوٹی بہن شازیہ نے میڈیا سے گفتگو میں کہا کہ ان کے بھائی ہمیشہ محنتی رہے ہیں اور ان کا مقصد صرف یو پی ایس سی امتحان میں کامیابی حاصل کرنا تھا۔ان کے والد نے انہیں دہرادون کے نیشنل انسٹی ٹیوٹ فار ویژولی ہینڈی کیپڈ میں داخل کرایا جہاں انہوں نے 10 اور 12 جماعت کی تعلیم مکمل کی۔

بعد ازاں انہوں نے دہلی یونیورسٹی کے ہندو کالج سے گریجویشن کیا اور نئی دہلی کی جواہر لعل نہرو یونیورسٹی سے ماسٹر ڈگری حاصل کی۔اہل خانہ کے مطابق عرفان کو آکسفورڈ یونیورسٹی میں پی ایچ ڈی پروگرام کے لئے داخلے کی پیشکش بھی ملی تھی لیکن انہوں نے اس کے بجائے یو پی ایس سی امتحان کی تیاری کو ترجیح دی۔30 سالہ عرفان نے چوتھی کوشش میں یہ امتحان کامیابی کے ساتھ پاس کیا۔ اس وقت وہ دہلی میں لائف انشورنس کارپوریشن میں اسسٹنٹ ایڈمنسٹریٹو آفیسر کے طور پر خدمات انجام دے رہے ہیں۔

سونہ واری کے رکن اسمبلی ہلال اکبر لون نے عرفان کو مبارکباد دیتے ہوئے کہا کہ عرفان نے یو پی ایس سی امتحان میں کامیابی حاصل کر کے تاریخ رقم کی ہے۔انہوں نے کہا کہ عرفان نے کبھی اپنی کمزوری کو اپنی کامیابی کے راستے میں رکاوٹ نہیں بننے دیا۔انہوں نے مزید کہا کہ ان کی غیر معمولی محنت اور مستقل مزاجی مستقبل میں ہزاروں نوجوانوں کو بڑے خواب دیکھنے اور انہیں حقیقت میں بدلنے کی ترغیب دے گی۔