بھکتی چالک

مہاراشٹر کے ضلع سولاپور کی مالشیرس تحصیل کے تندلواڑی گاؤں کے قریب ایک ہولناک حادثے نے پورے علاقے کو سوگوار کر دیا۔ سدھاناتھ مندر سے درشن کرکے خوشی خوشی واپس لوٹنے والے عقیدت مندوں سے بھری ایک پک اپ گاڑی اچانک سڑک کنارے واقع ایک گہرے کنویں میں جا گری، جس سے چند لمحوں میں خوشیاں ماتم میں بدل گئیں۔

اس المناک حادثے میں 8 افراد ڈوب کر جاں بحق ہوگئے، تاہم اس مشکل گھڑی میں ایک نوجوان عرفان مجاور نے اپنی جان کی پروا کیے بغیر کنویں میں چھلانگ لگا کر کئی افراد کی جان بچا لی اور ایک حقیقی ہیرو بن کر سامنے آیا۔

حادثہ کیسے پیش آیا؟

یہ حادثہ مالشیرس تحصیل کے تندلواڑی گاؤں کے قریب پیش آیا۔ رنجنی گاؤں کے ایک ہی خاندان کے افراد ضلع ستارا کے علاقے مہسواڑ میں واقع سدھاناتھ مندر میں درشن کے لیے گئے تھے۔ درشن کے بعد وہ پک اپ گاڑی میں سوار ہو کر واپس اپنے گاؤں جا رہے تھے۔

شام تقریباً پانچ بجے جب گاڑی تندلواڑی کے قریب پہنچی تو اچانک ڈرائیور گاڑی پر قابو کھو بیٹھا۔ تقریباً 50 سے 60 کلومیٹر فی گھنٹہ کی رفتار سے چلنے والی گاڑی سیدھی سڑک کے کنارے واقع ایک بڑے اور کھلے کنویں میں جا گری۔

عرفان مجاور نے فوراً کنویں میں چھلانگ لگا دی

حادثے کے وقت تندلواڑی کا رہائشی نوجوان عرفان مجاور اپنی گاڑی میں پک اپ کے آگے سفر کر رہا تھا۔ ریئر ویو مرر میں اس نے دیکھا کہ پک اپ کنویں میں گر رہی ہے۔ اس نے ایک لمحہ بھی ضائع نہیں کیا، فوراً اپنی گاڑی روکی، اپنے والد کو فون کیا اور گاؤں کے نوجوانوں کو فوری طور پر جائے حادثہ پر پہنچنے کی ہدایت دی۔

اپنے ایک ساتھی کے ساتھ عرفان پانی سے بھرے کنویں میں کود گیا۔ کنویں کے گرد کوئی حفاظتی دیوار یا جنگلہ موجود نہیں تھا۔ اپنی جان کو خطرے میں ڈال کر اس نے ایک کے بعد ایک تین افراد کو پانی سے باہر نکالا۔

بعد ازاں دیگر گاڑیوں کے ڈرائیور اور مقامی دیہاتی بھی امدادی کارروائی میں شامل ہوگئے۔ سب کی بروقت کوششوں کے نتیجے میں 8 افراد کو زندہ بچا لیا گیا۔

"میری پہلی کوشش چار سالہ بچے کو بچانے کی تھی"

حادثے کی تفصیلات بیان کرتے ہوئے عرفان مجاور نے کہا:

"جب حادثہ ہوا تو مجھے لگا کہ گاڑی شاید الٹنے والی ہے، لیکن چند لمحوں بعد وہ سیدھی کنویں میں جا گری۔ کچھ لوگ اپنی مدد آپ کے تحت اوپر آنے میں کامیاب ہوگئے۔ ان میں ایک کمزور سا چار سالہ بچہ الٹا تیرتا ہوا نظر آیا۔ میری پہلی غوطہ اسی بچے کی طرف تھا۔ میں نے اسے اٹھایا، اس کے سینے پر دباؤ ڈالا اور اس کے منہ سے پانی نکالا۔ الحمدللہ میں اس بچے کی جان بچانے میں کامیاب ہوگیا۔"

انہوں نے مزید کہا:"گاؤں والوں کی مدد سے ہم نے خواتین، مردوں اور بچوں کو کنویں سے باہر نکالا۔ لیکن جو لوگ گاڑی کے ساتھ نیچے چلے گئے تھے انہیں بچانا ممکن نہ ہو سکا۔ بعد میں دو ٹریکٹر اور ایک جے سی بی مشین منگوائی گئی تاکہ گاڑی کو کنویں سے نکالا جا سکے۔ ہم نے اپنی پوری کوشش کی لیکن باقی لوگوں کی جانیں نہ بچا سکے۔"

عرفان کی گفتگو میں ان افراد کو نہ بچا سکنے کا دکھ صاف محسوس ہوتا ہے، تاہم حقیقت یہ ہے کہ ان کی اور مقامی دیہاتیوں کی فوری کارروائی نے آٹھ قیمتی جانوں کو بچا لیا۔ مہاراشٹر بھر میں عرفان مجاور کی بہادری اور انسان دوستی کی تعریف کی جا رہی ہے۔

آٹھ افراد کی المناک موت تمام کوششوں کے باوجود حادثے میں 8 عقیدت مند اپنی جانوں سے ہاتھ دھو بیٹھے۔ جاں بحق ہونے والوں میں خواتین اور کم عمر بچے بھی شامل ہیں۔

متوفین کے نام درج ذیل ہیں:

• اندوبائی دشرتھ باوچے (60)

• پوجا امول ستورے (23)

• پوجا بالاجی باوچے (27)

• اشونی سندیپ باوچے (27)

• سنسکار سندیپ باوچے (14)

• سنسکرتی سندیپ باوچے (14)

• آراو امول ستورے (8)

• سمرتھ بالاجی باوچے (6 ماہ)

ایک ہی خاندان کے آٹھ افراد کی موت کے بعد رنجنی گاؤں میں غم اور سوگ کی فضا چھائی ہوئی ہے۔

حادثے میں بچ جانے والے افراد

اس حادثے میں 8 افراد زندہ بچ گئے اور مختلف اسپتالوں میں زیر علاج ہیں۔

بچ جانے والوں میں شامل ہیں:

• ساگر ساوکر چوگلے (25)

• سندیپ دشرتھ باوچے (36)

• بالاجی دشرتھ باوچے (32)

• جیا بالاجی باوچے (4)

• آراو بالاجی باوچے (ڈھائی سال)

• ششی کلا پوپٹ جادھو (50)

• سدھیشور جادھو (40)

• اپوروا ستورے (11)

سولاپور دیہی پولیس کے سپرنٹنڈنٹ اتل کلکرنی کے مطابق زخمیوں کا علاج تندلواڑی اور پنڈھرپور کے اسپتالوں میں جاری ہے۔ پک اپ گاڑی کو کنویں سے نکال لیا گیا ہے جبکہ پولیس مزید تحقیقات کر رہی ہے۔

دیہاتیوں میں شدید غم و غصہ

ستارا-پنڈھرپور شاہراہ پر جاری سست رفتار تعمیراتی کام کی وجہ سے یہ سڑک خطرناک بن چکی ہے۔ سڑک کے کنارے موجود کنویں کے گرد کوئی حفاظتی دیوار یا ریلنگ موجود نہیں تھی۔

مقامی لوگوں کے مطابق صرف دو ہفتے قبل بھی ایک ٹیمپو اسی کنویں میں گر گیا تھا، تاہم خوش قسمتی سے اس وقت کوئی جانی نقصان نہیں ہوا تھا۔اس غفلت پر دیہاتیوں نے شدید ناراضی کا اظہار کرتے ہوئے مطالبہ کیا ہے کہ سڑک کے ٹھیکیدار کے خلاف غیر ارادی قتل کا مقدمہ درج کیا جائے۔

وزیراعظم اور وزیراعلیٰ کی جانب سے امداد کا اعلان

صدر جمہوریہ دروپدی مرمو، وزیر اعظم نریندر مودی اور مہاراشٹر کے وزیر اعلیٰ دیویندر فڑنویس نے اس افسوسناک حادثے پر گہرے رنج و غم کا اظہار کیا ہے۔

وزیر اعلیٰ فڑنویس نے جاں بحق افراد کے لواحقین کے لیے 5 لاکھ روپے فی کس مالی امداد کا اعلان کیا ہے۔

وزیر اعظم نریندر مودی نے بھی تعزیت کا اظہار کرتے ہوئے وزیر اعظم قومی ریلیف فنڈ (PMNRF) سے جاں بحق افراد کے اہل خانہ کے لیے 2 لاکھ روپے اور زخمیوں کے لیے 50 ہزار روپے امداد کا اعلان کیا ہے۔