باسط زرگر/ سری نگر

 فوجی نظم و ضبط کی بہترین مثال پیش کرتے ہوئے جموں و کشمیر لائٹ انفنٹری کے سات سو گیارہ نئے بھرتی ہونے والے اگنی ویروں کو سری نگر میں جے اے کے ایل آئی ریجیمینٹل سینٹر میں ہونے والی شاندار پاسنگ آؤٹ پریڈ میں باضابطہ طور پر فوج میں شامل کر لیا گیا۔

پریڈ میں ہم آہنگ قدموں کی چال اور روایتی عسکری تقاریب نے سب کی توجہ اپنی جانب کھینچ لی۔ اس موقع پر جموں و کشمیر کے وزیر اعلیٰ عمر عبداللہ نے بطور مہمان خصوصی شرکت کی اور مارچ پاسٹ کا سلام قبول کیا۔ ان کی موجودگی نے اس تقریب کی اہمیت میں مزید اضافہ کر دیا جو اگنی پتھ اسکیم کے تحت کئی ماہ کی سخت تربیت کے اختتام کا جشن تھا۔

اس موقع پر خطاب کرتے ہوئے عمر عبداللہ نے مشکل حالات میں تربیت مکمل کرنے پر نوجوان سپاہیوں کو مبارک باد دی اور نظم و ضبط پر مبنی تربیت دینے میں فوج کے کردار کو سراہا۔ انہوں نے کہا کہ اگنی ویروں کے اس نئے دستے کی شمولیت سے عملی تیاری میں اضافہ ہوگا اور خطے میں امن و استحکام کو تقویت ملے گی۔

تقریب میں سینئر فوجی افسران تربیت کار اور خوشی سے لبریز خاندانوں کے افراد بھی موجود تھے۔ اس دوران بھرتی ہونے والے نوجوانوں نے اپنی جنگی مہارت اسلحے کے استعمال کی مشق اور مجموعی جسمانی فٹنس کا عملی مظاہرہ کیا۔ پپنگ تقریب میں والدین نے اپنے بچوں کے کندھوں پر رینکس سجائے تو ماحول جذباتی مناظر سے بھر گیا۔ تقریب کا اختتام نمایاں کارکردگی دکھانے والے تربیت یافتہ جوانوں میں انعامات کی تقسیم اور اگنی پتھ اسکیم کے تحت نوجوان صلاحیتوں کی تربیت کے عزم کی تجدید پر ہوا۔