ارسلہ خان

آج ڈاکٹر فیاض احمد فیضی کا نام پسماندہ سماج کے لیے امید، جدوجہد اور تبدیلی کی علامت بن چکا ہے۔ ایک ایسے وقت میں جب حاشیے پر کھڑے طبقات کی آواز کو سنا نہیں جاتا تھا، تب ڈاکٹر فیضی نے نہ صرف اس آواز کو ایک پلیٹ فارم دیا بلکہ اسے پالیسی اور فیصلوں کی میز تک پہنچایا۔ وہ محض ایک آیوش معالج نہیں بلکہ ایک مصنف، مترجم، سماجی مفکر اور پسماندہ سماج کے لیے لڑنے والے ایک سچے مجاہد ہیں۔

سادگی، جدوجہد اور ماں کی قربانی سے جڑا سفر

اتر پردیش کے ضلع بلیا کے ایک سادہ پسماندہ خاندان میں پیدا ہونے والے ڈاکٹر فیضی کا بچپن تنگ دستی میں گزرا۔ ان کے والد انور علی ایک استاد تھے، جن سے انہوں نے سماج خدمت کا جذبہ پایا۔ گاؤں کی گلیوں میں بوری بچھا کر پڑھائی کرنا،جھولے میں کتابیں رکھ کر اسکول جانا،یہی سادگی اور جدوجہد ان کی زندگی کی بنیاد بنی۔ ان کی والدہ نادرہ خاتون کی مامتا اور قربانی نے انہیں کبھی ہارنے نہیں دیا۔ جب مالی تنگی نے راستہ روکا، تو ماں نے اپنے زیور تک بیچ دیے تاکہ بیٹے کی تعلیم نہ رکے۔ یہی ماں کی مامتا ان کے حوصلے کی سب سے بڑی طاقت بن گئی۔

اسکول کے دنوں میں ایک ذات پات پر مبنی واقعہ، جب ان کے ہم جماعتوں نے ان کے ساتھ بیٹھ کر کھانے سے انکار کیا، نے ان کے اندر سوالات کا طوفان برپا کر دیا۔ یہ صرف ذاتی توہین نہیں تھی، بلکہ پورے سماج کی خامیوں کو بے نقاب کرنے والا لمحہ تھا۔ وہیں سے انہوں نے فیصلہ کیا کہ وہ سب سے کمزور طبقے کی آواز بنیں گے، اور یہی فیصلہ ان کی زندگی کی سمت متعین کر گیا۔ 

ضلع غازی پور کے گاؤں محمدآباد سے دسویں جماعت تک تعلیم حاصل کرنے کے بعد اعلیٰ تعلیم کے لیے انہیں کئی مشکلات کا سامنا کرنا پڑا۔ لیکن ہر بار انہوں نے اپنی محنت، لگن اور ماں کے خوابوں کی طاقت سے خود کو ثابت کیا۔ آج وہ طب کے شعبے میں ایک معتبر نام ہیں، لیکن ان کی اصل شناخت وہ ہے جہاں وہ پسماندہ سماج کے لیے کھڑے ہوتے ہیں۔

 خواتین کے حقوق کے لیے جراتمند آواز

45 سالہ ڈاکٹر فیضی کی سوچ ہمہ گیر ہے—خصوصاً مسلم خواتین کے تعلق سے۔ انہوں نے تین طلاق جیسے حساس معاملے پر بے باکی سے موقف اختیار کیا اور مسلم خواتین کے لیے انصاف و مساوات کی آواز بلند کی۔ ان کا ماننا ہے کہ جب تک خواتین تعلیم یافتہ اور خودمختار نہیں ہوں گی، کوئی سماج حقیقی ترقی نہیں کر سکتا۔انہوں نے یکساں سول کوڈ (UCC) کی حمایت کرتے ہوئے اسے محروم طبقات، خصوصاً خواتین کے لیے ایک انصاف پسند قدم قرار دیا۔ وہ کہتے ہیں کہ قانون سب کے لیے ایک جیسا ہونا چاہیے تاکہ کسی کے ساتھ امتیاز نہ ہو۔

وقف ترمیمی قانون 2025 کی حمایت

ڈاکٹر فیضی نے وقف ترمیمی قانون 2025 کی حمایت کرتے ہوئے اسے پسماندہ سماج کے لیے ایک تاریخی موقع قرار دیا۔ ان کی کاوشوں کی بدولت آج وقف بورڈ میں بھی پسماندہ طبقات کو نمائندگی حاصل ہو رہی ہے—ایک ایسا خواب جو برسوں سے دیکھا جا رہا تھا، اب حقیقت بن رہا ہے۔یہ تبدیلی یوں ہی نہیں آئی۔ یہ اس جدوجہد، فکر اور عزم کا نتیجہ ہے جو ڈاکٹر فیضی جیسے رہنماؤں نے بنا تھکے، مسلسل جاری رکھی۔

دھمکیوں کے باوجود عزم پر قائم

ڈاکٹر فیضی کی صاف گوئی اور سماجی سرگرمیوں کی وجہ سے انہیں دھمکیاں بھی ملیں، مگر وہ نہ جھکے، نہ رکے۔ ماں کی فکرمندی اور سماج کے دباؤ کے باوجود وہ اپنے مؤقف پر ڈٹے رہے۔ ان کا ماننا ہے کہ سچ بولنا اور اس پر عمل کرنا ہی اصل قیادت ہے۔ ان کے لیے سماجی خدمت کوئی اختیار نہیں، بلکہ ان کا "دھرم" ہے۔

معالج کے ساتھ ساتھ تیز قلم کے مالک

ڈاکٹر فیضی صرف معالج ہی نہیں، ایک تیز نگار مصنف بھی ہیں۔ ان کے مضامین ملک کے معیاری رسائل و جرائد میں شائع ہوتے ہیں اور نیوز چینلوں پر ان کی رائے کو سنجیدگی سے سنا جاتا ہے۔ وہ صرف مسائل کی نشان دہی نہیں کرتے، بلکہ ان کا حل بھی پیش کرتے ہیں۔ اس وقت وہ پسماندہ سماج کی جدوجہد، حالت اور مستقبل پر ایک اہم کتاب پر کام کر رہے ہیں—جو نہ صرف تاریخ کا دستاویز بنے گی بلکہ نئی نسلوں کے لیے ایک رہنما بھی ہوگی۔

ایک فرد، ایک تحریک

ڈاکٹر فیضی نے یہ ثابت کر دیا کہ تبدیلی کے لیے بھیڑ کی ضرورت نہیں ہوتی—صاف نیت اور مضبوط ارادے والا ایک فرد بھی انقلاب لا سکتا ہے۔ انہوں نے پسماندہ سماج کو نہ صرف مرکزی دھارے سے جوڑا بلکہ انہیں خود اعتمادی اور حقوق کی زبان سکھائی

ڈاکٹر فیاض احمد فیضی کی زندگی اس بات کا ثبوت ہے کہ اصل سماجی خدمت وہی ہے جو سب سے کمزور فرد کو بھی برابری کا حق دلوائے۔ وہ نہ صرف پسماندہ سماج کی آواز بنے ہیں، بلکہ ایک تحریک کے معمار بھی ہیں۔ آج جب ملک شمولیت اور مساوات کی بات کرتا ہے، تب ڈاکٹر فیضی جیسے لوگ ہمارے لیے مثالی بن کر سامنے آتے ہیں—جدوجہد، فکر اور سماجی تبدیلی کے زندہ استعارے۔