منجیت ٹھاکر

میرا آبائی قصبہ جھارکھنڈ کا مادھوپور ایک پرسکون اور سست رفتار شہر ہے۔ اس کی فضا آر کے لکشمن کے مشہور سیریل مالگڈی ڈیز کے گاؤں مالگڈی سے ملتی جلتی ہے جو بلیک اینڈ وائٹ ٹیلی ویژن کے دور کا ایک معیاری اور مقبول سیریل تھا۔ مادھوپور اپنے مزاج میں سادہ اور دھیمے پن کا حامل ہے لیکن ثقافتی اور کھیلوں کی سرگرمیوں سے بھرپور رہتا ہے۔

وہاں کے نوجوانوں میں کرکٹ اور فٹبال دونوں مقبول ہیں۔ اگرچہ پورے بھارت میں کرکٹ کو ایک مذہب کی طرح مانا جاتا ہے لیکن مادھوپور میں بنگال کے قریب ہونے کی وجہ سے فٹبال بھی اتنا ہی پسند کیا جاتا ہے۔ لوگ مقامی فٹبال کلبوں کے میچ دیکھنے کے لیے ٹکٹ خریدتے ہیں۔

بھارت کے دیگر حصوں کی طرح مادھوپور میں بھی کرکٹ ایک جنون ہے۔ مگر میرے لیے کرکٹ صرف ایک کھیل نہیں تھا بلکہ اس نے مجھے مختلف مذاہب عقائد ذاتوں اور طبقوں کے لوگوں کے ساتھ ہم آہنگی کے ساتھ جینا سکھایا۔ اس نے مجھے یہ سبق دیا کہ مذہب اور ذات کے فرق سے اوپر اٹھ کر انسان کی صلاحیت اور خوبیوں کی قدر کی جائے۔

بارہویں جماعت مکمل کرنے کے بعد جب میں گھر واپس آیا تو مجھے احساس ہوا کہ میرے بڑے بھائی منگل ٹھاکر ایک قابل ذکر کرکٹر تھے۔ انہوں نے سرکاری ملازمت اختیار کرنے سے پہلے بین الاضلاعی سطح تک کرکٹ کھیلی تھی۔ ہمارے درمیان والے بھائی رتن ٹھاکر نے بھی شہر جا کر اعلیٰ تعلیم حاصل کرنے سے پہلے کلب سطح کی کرکٹ کھیلی اور بعد میں یونیورسٹی ٹیم کا حصہ بھی رہے۔

کرکٹ نے مجھے ذات پات اور مذہب سے بالاتر ہو کر انسانی صلاحیت کی قدر کرنا سکھایا۔https://t.co/IXSRI7DKIU#awazthevoice #India #UnityInDiversity pic.twitter.com/4aFf4phOXI

— mansooruddin faridi (@mfaridiindia) January 19, 2026

کرکٹ سے میری محبت مجھے اپنے بھائیوں سے وراثت میں ملی۔ بچپن میں تو میں کھیلتا ہی تھا لیکن بورڈنگ اسکول سے واپس آ کر بارہویں کا امتحان دینے کے بعد میں نے کرکٹ کو سنجیدگی سے اپنایا۔ میرے پاس کافی وقت تھا اور میں صبح دوپہر اور شام کرکٹ کھیلتا رہتا تھا۔

ان دنوں مادھوپور میں ایک معروف کرکٹ کلب ہوا کرتا تھا جس کا نام میں یہاں ظاہر نہیں کر رہا ہوں۔ شہر کے تمام نمایاں کرکٹر اس سے وابستہ تھے۔

میرا گھر درج فہرست ذاتوں اور دلتوں کی بستی کے قریب تھا۔ کچھ فاصلے پر ایک مسلم آبادی تھی جہاں زیادہ تر پسماندہ طبقے کے لوگ رہتے تھے۔ یہ مسلمان زیادہ تر کپڑے کے تاجر یا جولاہے تھے اور ہتھ کرگھا صنعت کے زوال کے بعد کولکاتا کے تاجروں کے لیے بڑی تعداد میں تیار کپڑے سینے لگے تھے۔

ہمارے محلے کے چند پرجوش کرکٹرز جن میں میں بھی شامل تھا اس مشہور کلب کے لیے کھیلنے کے خواہش مند تھے اور ہم اس کے میدان تک بھی گئے۔ میری ٹیم میں چند دلت کھلاڑی اور چار پانچ مسلمان دوست بھی شامل تھے۔

کلب میں زیادہ تر بنگالی بولنے والے اونچی ذات کے ہندو اور اشراف مسلمان تھے۔ انہوں نے صاف صاف کہا کہ میں تو کھیل سکتا ہوں لیکن میرے دوستوں کو اجازت نہیں دی جائے گی۔ انہوں نے حقارت کے ساتھ کہا کہ ہم ان نچلے درجے کے لوگوں کو اپنے ساتھ کھیلنے نہیں دیں گے۔

اس وقت مجھے سمجھ نہیں آیا کہ میں قابل قبول کیوں تھا اور میرے دوست کیوں نہیں۔ آخر میں ہولی اور عید سب کے ساتھ مناتا تھا۔ جب میرے دوستوں کو اجازت نہیں ملی تو میں وہاں کھیلنے کا سوال ہی نہیں تھا۔ ہم مایوس ہو کر واپس لوٹ آئے۔

شام کو جب میرے بھائی دفتر سے آئے تو انہوں نے پوچھا کہ میں کلب میں کھیلنے کیوں نہیں گیا۔ میں نے سارا واقعہ سنا دیا۔ میرے بھائی کو بہت دکھ ہوا۔ انہوں نے کہا کہ کیا انہوں نے تمہیں چیتھری کہا۔ مادھوپور میں ہریجن دلت اور پسماندہ مسلمانوں کو مقامی طور پر چیتھری کہا جاتا تھا جس کا مطلب پھٹے پرانے کپڑے پہننے والے لوگ ہوتا ہے۔

اسی شام میرے بڑے بھائی نے نیا قدم اٹھایا۔ انہوں نے میرے تمام دوستوں کے ساتھ ایک نئی کرکٹ ٹیم بنانے کا اعلان کیا۔ ہمارے پاس وسائل نہیں تھے صرف جذبہ تھا۔ ہمارے محلے میں آنچی دیوی گرلز ہائی اسکول کا ایک بڑا میدان تھا جہاں ہم نے پچ تیار کی۔ اسکول کی ہیڈ مسٹریس ہاشی راشی بوس نے ہمیں کھیلنے کی اجازت دے دی۔

میرے بھائی نے اس ٹیم کا نام چیتھری کرکٹ کلب رکھا جو بعد میں نیشنل رائزنگ کلب کہلایا مگر پرانا نام ہی پہچان بن گیا۔ تمام کھلاڑیوں نے حلف لیا کہ وہ میدان کے اندر اور باہر متحد رہیں گے۔

ہم نے اپنے کھلاڑیوں کو مشہور کرکٹرز کے نام دیے۔ کسی کو جے سوریا کسی کو معین خان کسی کو سعید انور تو کسی کو سری ناتھ اور پردیپ کہا جاتا تھا۔ دلچسپ بات یہ تھی کہ ہندو کھلاڑیوں کو مسلمان کرکٹرز کے نام دیے گئے اور مسلمانوں کو ہندو کرکٹرز کے نام۔

یہ کلب ہمیں صرف تفریح نہیں دیتا تھا بلکہ زندگی کے بڑے سبق بھی سکھاتا تھا کہ کھیل انسانوں کو بانٹنے کے لیے نہیں بلکہ جوڑنے کے لیے ہوتا ہے۔

ہماری ٹیم کا ایک مسلمان کھلاڑی عمران نامی آل راؤنڈر تھا جو بولنگ اور بیٹنگ دونوں کا آغاز کرتا تھا۔ ہم سب عید پر اس کے گھر جاتے اور سیویاں کھاتے۔ عیدالاضحی پر بریانی کھاتے تھے اور حقیقت یہ ہے کہ میری پہلی بریانی کی یاد بھی وہیں سے جڑی ہے۔

ہولی کے موقع پر میری ماں نے ہماری ٹیم کی میزبانی کی۔ سب نے املی کی چٹنی اور ملپوے شوق سے کھائے۔

میں ٹیم کا فاسٹ بولر تھا اور اکثر دوسرا اوور ڈالتا تھا۔ پہلا اوور عمران خان ڈالتا تھا۔

مجھے ٹیم میں کس نام سے پکارا جاتا تھا یہ راز ہی رہنے دیا جائے۔