عارف الاسلام: گوہاٹی 

جب اس کی عمر کے بچے ماں کی گود میں کھیلتے ہیں اس وقت آسام کا 5 سالہ بچہ عمر فاروق اپنی کمزوری کو طاقت میں بدل کر سب کو حیران کر رہا ہے۔ جسمانی معذوری کے ساتھ پیدا ہونے والے عمر فاروق نے حالیہ دنوں میں قومی اور بین الاقوامی سطح پر شاندار کارکردگی دکھاتے ہوئے تائیکوانڈو میں طلائی اور نقرئی تمغے حاصل کئے ہیں۔ تائیکوانڈو ایک ایسا کھیل ہے جس میں غیر معمولی جسمانی فٹنس اور پھرتی کی ضرورت ہوتی ہے۔ بلیک بیلٹ ہولڈر عمر فاروق مغربی آسام کے ضلع نلباڑی کے بلپار ناریکوچی گاؤں کے رہنے والے ہیں۔

سال 2020 میں پیدا ہونے والے عمر فاروق کی پیدائش کے وقت دونوں ٹانگیں 90 فیصد تک مڑی ہوئی تھیں۔ والدین اور گاؤں والوں کو لگتا تھا کہ وہ زندگی بھر چل بھی نہیں سکے گا۔ لیکن آج وہ نہ صرف چلتا اور دوڑتا ہے بلکہ ایک پیشہ ور کھلاڑی کی طرح کک بھی مارتا ہے۔ جب وہ تائیکوانڈو کے میدان میں اترتا ہے تو بالکل ایک عام بچے کی طرح دکھائی دیتا ہے۔ والدین کی محنت اور لگن کی بدولت اب وہ ریاستی قومی اور بین الاقوامی سطح پر تمغے جیتنے کے قابل ہو چکا ہے۔

مسئلہ پیدائشی تھا 

آواز دی وائس کو دیے گئے ایک خصوصی انٹرویو میں عمر فاروق کے والد جولُو علی نے کہا کہ عمر کی پیدائش 2020 میں ہوئی اور اس وقت اس کی دونوں ٹانگیں 90 فیصد مڑی ہوئی تھیں۔ شروع میں ہم بہت پریشان تھے کہ وہ کبھی چل نہیں سکے گا۔ پھر ہم نے اس کے علاج کا فیصلہ کیا۔ پہلے گواہاٹی میں علاج کرایا اور اس کے بعد نلباڑی کے ایک اسپتال میں اس کے اعضاء کا آپریشن ہوا۔ سرجری کے بعد دونوں ٹانگیں مکمل طور پر بے حرکت ہو گئی تھیں۔ لمبے عرصے تک پلاسٹر اور خاص جوتے لگے رہے۔ ان سب کے ہٹنے کے بعد بھی ٹانگوں میں طاقت واپس نہیں آئی۔ ڈاکٹر کے مشورے پر ہم نے اسے 2 سال 7 ماہ کی عمر میں تائیکوانڈو کی تربیت میں داخل کرایا۔

تربیت اور محنت 

عمر فاروق اس وقت رنگیا کے الہدایہ انٹرنیشنل پبلک اسکول میں یو کے جی کا طالب علم ہے۔ وہ بلپار ناریکوچی کے ایک غریب خاندان میں پیدا ہوا۔ گزشتہ 5 برسوں سے اس کے والدین اس کے لیے مسلسل جدوجہد کر رہے ہیں۔ رنگیا تائیکوانڈو کوچنگ سینٹر میں داخلے کے بعد اس کے والد جولُو علی ایک دن بھی ناغہ کیے بغیر اسے تربیت کے لیے لے جاتے ہیں۔ برسات کے موسم میں کچی سڑک کے باعث موٹر سائیکل یا کار سے جانا ممکن نہیں ہوتا اور سائیکل چلانا بھی مشکل ہو جاتا ہے۔ ایسے وقت میں وہ اکثر عمر کو کندھے پر اٹھا کر قومی شاہراہ تک لے جاتے ہیں پھر پبلک ٹرانسپورٹ کے ذریعے کوچنگ سینٹر پہنچتے ہیں۔

کوچ نے کہا 

رنگیا تائیکوانڈو کوچنگ سینٹر کے مالک اور چیف کوچ سجل گوہا نے کہا کہ جب اس کے والد اسے ڈھائی سال کی عمر میں میرے پاس لائے تو اس کی ٹانگوں میں راڈ لگی ہوئی تھی اور وہ ٹھیک سے چل بھی نہیں سکتا تھا۔ والدین نے اس کے لیے بہت جدوجہد کی۔ سرجری کے بعد ڈاکٹر نے اسے کسی اچھے کھیل میں شامل کرنے کا مشورہ دیا تھا۔ ابتدا میں میں نے اسے کئی دن تک ورزش اور بنیادی جسمانی مشقیں کروائیں۔ مسلسل دوڑ اور ورزش کے بعد میں نے اسے تائیکوانڈو کی بنیادی تربیت دینی شروع کی۔ آہستہ آہستہ تربیت کے ساتھ اب وہ بہت اچھا کھیلتا ہے۔ اس کی سب سے بڑی خوبی یہ ہے کہ وہ ہر کام پر پوری توجہ دیتا ہے اور بہت دلچسپی اور لگن سے سیکھتا ہے۔ اب وہ ریاستی اور قومی سطح کے ساتھ ساتھ بین الاقوامی سطح پر بھی طلائی اور نقرئی تمغے جیتنے کے قابل ہو چکا ہے۔

انہوں نے مزید کہا کہ آج اگر کوئی عمر کو دیکھے تو یقین ہی نہیں کرتا کہ وہ دونوں ٹانگوں کے 90 فیصد مڑے ہونے کے ساتھ پیدا ہوا تھا۔ وہ ڈھائی سال سے میرے کوچنگ سینٹر میں ہے اور اس مدت میں اس نے بلیک بیلٹ حاصل کر لی ہے۔ بلیک بیلٹ کے امتحان میں اس نے نہایت جرات مندانہ کارکردگی دکھائی۔ ہمیں صرف یہ افسوس ہے کہ اگر وہ دو ماہ پہلے بلیک بیلٹ حاصل کر لیتا تو کم عمر میں بلیک بیلٹ حاصل کرنے کا ریکارڈ گنیز بک میں درج ہو سکتا تھا۔ اس وقت وہ کم عمری میں بلیک بیلٹ حاصل کرنے والے آسام کے دوسرے بچے ہیں۔ موجودہ سطح کو دیکھتے ہوئے وہ 18 یا 19 سال کی عمر تک گرینڈ ماسٹر بن سکتا ہے اور اس کی صلاحیتوں کو دیکھ کر لگتا ہے کہ وہ اولمپک سطح تک بھی پہنچ سکتا ہے۔

قابل ذکر ہے کہ عمر فاروق جولائی میں دہلی میں ہونے والے قومی مقابلوں میں شرکت کے لیے دوبارہ جائے گا۔ کوچ کے مطابق وہ اس سال جنوبی کوریا میں منعقد ہونے والے جونیئر تائیکوانڈو اولمپکس میں بھی حصہ لے گا۔مقامی باشندہ محمد ریزیک علی نے کہا کہ میں اکثر ان کے گھر جاتا ہوں اور خاندان سے قریبی تعلق رکھتا ہوں۔ پیدائش کے وقت اس کی دونوں ٹانگوں کو دیکھ کر میں نے کبھی تصور بھی نہیں کیا تھا کہ وہ ایک دن چل سکے گا۔ لیکن آج وہ بین الاقوامی سطح کے کھیل میں حصہ لے رہا ہے اور تمغے جیت رہا ہے۔ دراصل اس کے والدین نے اس کے ساتھ بہت محنت اور جدوجہد کی ہے۔ ہم گاؤں والے بہت خوش ہیں اور اس کے روشن مستقبل کے لیے دعا گو ہیں۔