آواز دی وائس : نئی دہلی 

سال 2026 میں سائنس کے آسکر کے طور پر معروف بریک تھرو انعام آسام کے بیٹے ڈاکٹر اتانو ناتھ کو حاصل ہوا ہے۔ یہ اعزاز انہوں نے دنیا بھر کے 376 سائنس دانوں کے ساتھ مشترکہ طور پر حاصل کیا ہے جن میں تقریباً 11 ہندوستانی بھی شامل ہیں۔ وہ شمال مشرقی ہندوستان کے پہلے اور واحد سائنس دان ہیں جنہیں بنیادی طبیعیات کے اس اہم بریک تھرو انعام سے نوازا گیا ہے۔ اس سال یہ انعام CERN بروکہیون نیشنل لیبارٹری اور فرمیلائب کے میون جی 2 تحقیقی پروگرام کو دیا گیا ہے جو جدید طبیعیات میں ایک اہم سنگ میل مانا جاتا ہے۔

یہ انعام عالمی سطح پر سائنس کے سب سے بڑے اعزازات میں شمار ہوتا ہے اور اسے اکثر سائنس کا آسکر کہا جاتا ہے۔ ڈاکٹر اتانو ناتھ کا تعلق جنوبی آسام کے ضلع ہائیلاکاندی کے لالابازار سے ہے اور وہ اس وقت نلباری ضلع کے ٹیہو کالج میں طبیعیات کے اسسٹنٹ پروفیسر کے طور پر خدمات انجام دے رہے ہیں۔

ماہرین کے مطابق ان کی کامیابی نے نہ صرف ان کے آبائی علاقے بلکہ پورے خطے کے تعلیمی اور تحقیقی میدان میں فخر اور خوشی کا ماحول پیدا کیا ہے۔ وہ ایک تعلیمی گھرانے سے تعلق رکھتے ہیں اور ان کے والدین بھی اساتذہ رہے ہیں۔ اس کامیابی کو آسام اور شمال مشرقی ہندوستان کے تعلیمی حلقوں کے لیے ایک اہم لمحہ قرار دیا جا رہا ہے۔

ڈاکٹر ناتھ نے اپنی ابتدائی تعلیم سلچر کے گروچرن کالج سے حاصل کی۔ اس کے بعد انہوں نے کولکاتا کے ایس این بوس نیشنل سینٹر فار بیسک سائنسز سے ماسٹرز مکمل کیا اور ممبئی کے ٹاٹا انسٹی ٹیوٹ آف فنڈامنٹل ریسرچ میں اعلیٰ تعلیم حاصل کی۔ 2013 میں انہوں نے اٹلی کی نیپلز فیڈریکو سیکنڈ یونیورسٹی میں پی ایچ ڈی کے لیے داخلہ لیا اور 2016 میں کوانٹم کروموڈائنامکس کے شعبے میں ڈاکٹریٹ مکمل کی۔

بعد میں وہ میون جی 2 تجربے سے وابستہ ہوئے اور فرمیلائب میں بین الاقوامی ٹیم کے ساتھ کام کیا۔ انہوں نے لیزر کیلیبریشن سسٹم پر اہم کام انجام دیا جو تجرباتی درستگی کے لیے نہایت اہم تھا۔ وہ 2020 تک اس پروگرام کا حصہ رہے۔ہندوستان واپس آنے کے بعد انہوں نے آئی آئی ٹی گوہاٹی میں پوسٹ ڈاکٹریٹ تحقیق کی اور نیوٹرینو تجربات میں بھی حصہ لیا۔ 2022 میں انہوں نے ٹیہو کالج میں بطور اسسٹنٹ پروفیسر ذمہ داری سنبھالی۔

یہ انعام 2012 میں بریک تھرو پرائز فاؤنڈیشن کی جانب سے شروع کیا گیا تھا جس کے بانیوں میں سرگئی برن مارک زکربرگ اور دیگر عالمی شخصیات شامل ہیں۔ اس انعام کی مجموعی رقم 3 ملین امریکی ڈالر ہے اور اسے سائنسی دنیا کا ایک باوقار اعزاز مانا جاتا ہے۔

ماہرین کے مطابق یہ تحقیق میون نامی بنیادی ذرہ کی مقناطیسی خصوصیات پر مبنی ہے۔ میون کو الیکٹران کا بھاری رشتہ دار سمجھا جاتا ہے اور اس کی حرکت کو انتہائی درستگی کے ساتھ ناپا جاتا ہے۔ اگر نظریہ اور تجربہ میں فرق سامنے آئے تو یہ نئی طبیعیات یا نامعلوم قوتوں کی طرف اشارہ ہو سکتا ہے۔ اسی لیے میون جی 2 پروگرام کو جدید طبیعیات میں ایک نہایت اہم تجربہ تصور کیا جاتا ہے۔