کییف/ آواز دی وائس

روس نے یوکرین کے توانائی پلانٹس پر سیکڑوں ڈرونز اور درجنوں میزائلوں سے حملہ کیا ہے۔ حکام نے جمعرات کو اس کی تصدیق کی۔ ادھر، یوکرین کے صدر زیلینسکی وائٹ ہاؤس میں امریکی صدر ڈونالڈ ٹرمپ سے ملاقات کے دوران مزید امریکی فضائی دفاعی نظام اور طویل فاصلے تک مار کرنے والے میزائلوں کی فراہمی کی درخواست کرنے کی تیاری کر رہے ہیں۔

یوکرین کی قومی توانائی آپریٹر کمپنی "یوکرین انیرگو" نے بتایا کہ ڈرون اور میزائل حملوں کے بعد آٹھ یوکرینی علاقوں میں بجلی منقطع کرنی پڑی۔

ملک کی سب سے بڑی نجی توانائی کمپنی ڈی ٹی ای کے نے دارالحکومت کییف میں بجلی گل ہونے کی اطلاع دی اور کہا کہ حملوں کے باعث اسے وسطی پولٹاوا علاقے میں قدرتی گیس کی پیداوار روکنی پڑی۔ زیلینسکی نے بتایا کہ روس نے رات بھر میں یوکرین پر 300 سے زیادہ ڈرونز اور 37 میزائل داغے۔ انہوں نے روس پر الزام لگایا کہ وہ کلسٹر ہتھیاروں کا استعمال کر رہا ہے اور بجلی کے نظام کی مرمت میں مصروف ایمرجنسی عملے اور انجینئروں کو نشانہ بنانے کے لیے ایک ہی ہدف پر بار بار حملے کر رہا ہے۔

زیلینسکی نے ٹیلیگرام پر کہا کہ اس موسم میں روسی روزانہ ہمارے توانائی کے ڈھانچے پر حملے کر رہے ہیں۔ ان کے جمعہ کو وائٹ ہاؤس کے اوول آفس میں صدر ٹرمپ سے ملاقات سے قبل جمعرات کو امریکہ پہنچنے کی امید ظاہر کی گئی ہے۔ کییف کے حکام کا کہنا ہے کہ یوکرین امریکہ سے کروز میزائل، فضائی دفاعی نظام اور مشترکہ ڈرون پیداوار کے معاہدے کی خواہش رکھتا ہے۔

زیلینسکی یہ بھی چاہتے ہیں کہ ماسکو پر سخت بین الاقوامی اقتصادی پابندیاں عائد کی جائیں۔

یہ دورہ ایسے وقت ہو رہا ہے جب اس بات کے آثار ہیں کہ صدر ٹرمپ امریکہ کی قیادت میں جاری امن کوششوں میں تعطل توڑنے کے لیے روسی صدر ولادیمیر پیوٹن پر دباؤ بڑھانے کی سمت بڑھ رہے ہیں۔