نیویارک: نیویارک سٹی کے میئر ظہران ممدانی کو ورلڈ حجاب ڈے کے موقع پر حجاب کو “عقیدت، شناخت اور فخر کی علامت” قرار دینے والی ایک سرکاری پوسٹ کے باعث سخت عوامی اور عالمی تنقید کا سامنا کرنا پڑ رہا ہے۔ یہ پوسٹ میئر کے دفتر برائے امورِ مہاجرین کی جانب سے شیئر کی گئی تھی، جس میں کہا گیا تھا کہ “آج ہم دنیا بھر کی اُن مسلم خواتین اور بچیوں کے عقیدے، شناخت اور فخر کا جشن منا رہے ہیں جو حجاب پہننے کا انتخاب کرتی ہیں۔ یہ عقیدت کی ایک طاقتور علامت اور مسلم ورثے کی نمائندگی ہے۔

تاہم، اس پیغام کو ایران میں لازمی حجاب کے خلاف جاری احتجاجی تحریک کے تناظر میں شدید ردِعمل کا سامنا کرنا پڑا، جہاں خواتین کو حجاب پہننے سے انکار پر گرفتاری، تشدد اور حتیٰ کہ ہلاکتوں کا سامنا کرنا پڑا ہے۔ سماجی کارکنوں اور مبصرین نے مؤقف اختیار کیا کہ یہ پوسٹ ایران میں خواتین کو درپیش زمینی حقائق کو نظر انداز کرتی ہے اور ایک ایسے وقت میں حجاب کا جشن منانا حساسیت سے عاری عمل ہے۔

ایرانی نژاد امریکی صحافی اور انسانی حقوق کی کارکن مسیح علی نژاد نے میئر کو براہِ راست مخاطب کرتے ہوئے سخت الفاظ میں تنقید کی۔ انہوں نے لکھا: “مسٹر ظہران ممدانی، واقعی؟ اس وقت؟ مجھے نیویارک جیسے خوبصورت شہر میں رہتے ہوئے اذیت محسوس ہو رہی ہے، جب آپ ورلڈ حجاب ڈے منا رہے ہیں اور میرے زخمی وطن ایران میں خواتین کو حجاب اور اس کے پیچھے موجود اسلامی نظریے کو مسترد کرنے پر قید، گولیوں اور موت کا سامنا ہے۔

مسیح علی نژاد نے الزام عائد کیا کہ میئر کی یہ پوسٹ دراصل ایران میں جبر کے نظام کے ساتھ خاموش ہم آہنگی کے مترادف ہے اور انہوں نے اسے شرمناک قرار دیا۔ فرانسیسی مصنف اور سماجی کارکن برنارڈ ہنری لیوی نے بھی پوسٹ کے وقت اور پیغام دونوں پر سوال اٹھاتے ہوئے کہا کہ “جب ایران میں ہزاروں خواتین محض حجاب نہ پہننے پر قید، تشدد اور قتل کا سامنا کر رہی ہیں، تو ایسے میں ورلڈ حجاب ڈے منانا کیسے درست ہو سکتا ہے؟

ترک نژاد امریکی ماہرِ معاشیات اور سیاسیات تیمور کوران نے بھی اس پیغام کو کئی حوالوں سے نامناسب قرار دیا۔ دلچسپ امر یہ ہے کہ یہ ردِعمل میئر ظہران ممدانی کے سابقہ بیانات سے متصادم نظر آتا ہے، جن میں وہ اسلاموفوبیا کے خلاف کھل کر بات کرتے رہے ہیں۔ گزشتہ برس انہوں نے انکشاف کیا تھا کہ 11 ستمبر کے حملوں کے بعد ان کی خالہ نے حجاب پہننے کے باعث خود کو غیر محفوظ محسوس کیا اور سب وے میں سفر کرنا چھوڑ دیا تھا۔

انہوں نے یہ بھی کہا تھا کہ سیاست میں قدم رکھنے کے بعد انہیں اپنے مذہبی عقیدے کو نجی رکھنے کا مشورہ دیا گیا تھا۔ ورلڈ حجاب ڈے سے متعلق یہ تنازع ایک بار پھر اس بحث کو سامنے لے آیا ہے کہ مذہبی شناخت کے اظہار اور جبری مذہبی قوانین کے درمیان فرق کو عالمی سطح پر کس طرح سمجھا اور پیش کیا جانا چاہیے۔