.jpg "طلاق کے بعد ملینڈا کی دولت 73 ارب ڈالرز تک ہونے کا امکان ہے")
واشنگٹن
بل گیٹس اور ان کی اہلیہ ملینڈا گیٹس کے درمیان گزشتہ 3 مئی کو ہونے والی علیحدگی کے بعد خواتین کی ترقی کی پرزور حامی ملینڈا گیٹس دنیا کی دوسری امیر ترین خاتون بن سکتی ہیں، جن کی دولت 73 ارب ڈالرز تک ہونے کا امکان ہے۔
واشنگٹن کی کنگ کاؤنٹی کی اعلیٰ عدالت میں دائر طلاق کی درخواست میں ملینڈا گیٹس نے کہا تھا کہ بل گیٹس سے ان کی شادی 'ناقابل تلافی حد تک ٹوٹ پھوٹ' کا شکار ہے، جبکہ عدالت سے جوڑے کے 146 ارب ڈالرز کے اثاثے تقسیم کرنے کا مطالبہ کیا گیا۔ ان اثاثوں کی 50-50 تقسیم کا امکان زیادہ ہے کیونکہ طلاق کی درخواست میں یہ بھی انکشاف کیا گیا ہے کہ 1994 میں شادی کے بندھن میں بندھنے والے اس جوڑے نے شادی سے قبل معاہدہ نہیں کیا تھا اور واشنگٹن ریاست کے قانون کے تحت جوڑوں میں طلاق ہونے پر اثاثے مساوی بنیادوں پر تقسیم کردیئے جاتے ہیں۔
اگر ایسا ہوتا ہے تو ملینڈا گیٹس دنیا کی دوسری امیر ترین خاتون بن جائیں گی اور ان سے آگے 67 سالہ فرانسوئس بیتھنکورٹ میئرز ہوں گی جو 83 ارب ڈالرز کی مالک ہیں۔
تاہم بل گیٹس اس سے زیادہ بلکہ دنیا کے امیر ترین شخص ہوسکتے تھے اگر وہ کم از کم 45 ارب ڈالرز بل اینڈ ملینڈا گیٹس فاؤنڈیشن کے ذریعے فلاحی کاموں کے لیے عطیہ نہ کرتے۔ طلاق کی رپورٹس کے بعد یہ سوال بھی سامنے آیا ہے کہ اس فاؤنڈیشن کے ذریعے جوڑے کے فلاحی اقدامات کا مستقبل کیا ہوگا۔ اس فاؤنڈیشن کو دیگر مخیر افراد سے بھی عطیات ملتے ہیں جن میں متعدد ارب پتی شخصیات کے ساتھ برطانوی حکومت بھی شامل ہے۔
— Bill Gates (@BillGates) May 3, 2021
اگرچہ بل اور ملینڈا گیٹس کا کہنا ہے کہ وہ فاؤنڈیشن کی سربراہی جاری رکھیں گے مگر کچھ ماہرین کے مطابق طلاق کے بعد دونوں کے مختلف خیالات اس ادارے کی سمت پر اثرات مرتب کرسکتے ہیں۔
