تہران: ایران اور اسرائیل کے درمیان جاری حالیہ 12 روزہ جنگ میں ایران کو شدید جانی نقصان اٹھانا پڑا ہے۔ سرکاری میڈیا کے مطابق، ملک بھر میں کم از کم 1060 افراد جان کی بازی ہار چکے ہیں۔

فرانسیسی خبر رساں ادارے اے ایف پی کے مطابق، ایرانی فاؤنڈیشن آف شہدا اور سابق فوجیوں کے امور کے سربراہ سعید اوہادی نے سرکاری ٹی وی کو انٹرویو دیتے ہوئے کہا:
"شہدا کے حوالے سے آج رات تک ہم نے ملک بھر میں 1060 پیاروں کو سپردِ خاک کیا ہے۔"

تاہم ایرانی میڈیا نے یہ واضح نہیں کیا کہ ہلاک شدگان میں کتنے عام شہری اور کتنے فوجی اہلکار شامل ہیں۔یاد رہے کہ اسرائیل نے 13 جون سے ایران پر فضائی حملے شروع کیے تھے، جو لگاتار 12 دن تک جاری رہے۔ ان حملوں میں اعلیٰ ایرانی فوجی کمانڈروں، ایٹمی سائنس دانوں اور درجنوں عام شہریوں کی جانیں گئیں۔

ایران کے صدر مسعود پزشکیان نے پیر کو نشر ہونے والے ایک انٹرویو میں دعویٰ کیا کہ اسرائیل نے ان کی جان لینے کی کوشش کی۔امریکی اینکر ٹکر کارلسن کے سوال پر کہ "کیا آپ کو لگتا ہے اسرائیل نے آپ کو قتل کرنے کی کوشش کی؟"، صدر نے جواب دیا:
"جی ہاں، انہوں نے کوشش کی۔ انہوں نے اقدام کیا، لیکن ناکام رہے۔"

اس سے قبل 16 جون کو اسرائیلی وزیر اعظم بن یامین نیتن یاہو نے اس امکان کو رد نہیں کیا کہ ایران کے سپریم لیڈر آیت اللہ علی خامنہ ای کو قتل کرنے کی کوشش کی جا سکتی ہے، اور کہا کہ ایسا کرنے سے ’تنازعہ ختم‘ ہو سکتا ہے۔

اسی دوران سابق امریکی صدر ڈونلڈ ٹرمپ نے دعویٰ کیا تھا کہ انہوں نے اسرائیل کو آیت اللہ خامنہ ای کو قتل کرنے سے روکنے کے لیے ویٹو کا استعمال کیا۔ایرانی عدلیہ کے مطابق، جنگ کے ابتدائی دنوں میں 900 سے زائد افراد مارے گئے تھے، تاہم تازہ اعداد و شمار 1060 تک پہنچ چکے ہیں۔

اسرائیلی حملوں کے جواب میں ایران نے بھی کئی بار ڈرون اور میزائل حملے کیے، جن میں اسرائیلی حکام کے مطابق 28 افراد ہلاک ہوئے۔اس 12 روزہ جنگ میں امریکہ نے بھی حصہ لیا اور فردو، اصفہان، اور نطنز میں موجود ایرانی جوہری تنصیبات کو نشانہ بنایا۔ یہ حملے ایسے وقت میں کیے گئے جب ایران اور امریکہ 12 اپریل سے شروع ہونے والے نئے جوہری مذاکرات کے ایک اور مرحلے کی تیاری کر رہے تھے۔ایران کے جوابی حملوں سے اسرائیل میں بھی خاصا جانی اور مالی نقصان ہوا، تاہم اس جنگ نے خطے کو مزید کشیدگی کی طرف دھکیل دیا ہے۔