کاراکاس : وینزویلا میں اقتدار اور سلامتی کے حوالے سے ایک بڑا پیش رفت سامنے آئی ہے۔ امریکہ کی جانب سے صدر نکولس مادورو اور ان کی اہلیہ کو حراست میں لیے جانے کے بعد ملک کی سپریم کورٹ نے نائب صدر ڈیلسی روڈریگز کو قائم مقام صدر مقرر کر دیا ہے۔

امریکی صدر ڈونالڈ ٹرمپ نے اس بات کی تصدیق کی ہے کہ امریکی خصوصی دستوں نے مادورو اور ان کی اہلیہ کو گرفتار کر لیا ہے۔ انہیں نارکو ٹیررازم سے متعلق الزامات کا سامنا کرنے کے لیے نیو یارک کی فیڈرل عدالت میں پیش کیا جائے گا۔

ایک خبر رساں ایجنسی کے مطابق، وینزویلا کی سپریم کورٹ کی آئینی بینچ نے ہفتہ کے روز حکم جاری کرتے ہوئے کہا کہ نکولس مادورو کی عدم موجودگی میں ڈیلسی روڈریگز ملک کی قائم مقام صدر ہوں گی۔ عدالت نے کہا کہ یہ قدم انتظامی تسلسل اور قوم کے مجموعی دفاع کو یقینی بنانے کے لیے ضروری ہے۔

عدالت نے یہ بھی واضح کیا کہ وہ آئندہ اس معاملے پر قانونی ڈھانچے کے حوالے سے غور کرے گی، تاکہ ریاست کے تسلسل، حکومت کے انتظام اور خودمختاری کا تحفظ کیا جا سکے۔ ڈیلسی روڈریگز (56) کی پیدائش 18 مئی 1969 کو وینزویلا کے دارالحکومت کاراکاس میں ہوئی۔

وہ بائیں بازو کے رہنما اور سابق گوریلا جارج انتونیو روڈریگز کی بیٹی ہیں، جنہوں نے 1970 کی دہائی میں انقلابی تنظیم لیگا سوشلسٹا کی بنیاد رکھی تھی۔ ڈیلسی روڈریگز کو نکولس مادورو کی سب سے قابلِ اعتماد رہنماؤں میں شمار کیا جاتا ہے۔ وہ اپنے بھائی جارج روڈریگز، جو وینزویلا کی نیشنل اسمبلی کے سربراہ ہیں، کے ساتھ مل کر طویل عرصے سے حکومت کی اہم پالیسیوں پر کام کرتی رہی ہیں۔

ڈیلسی روڈریگز نے اپنے سیاسی کیریئر میں حکومت کے کئی اہم عہدوں پر خدمات انجام دی ہیں۔ 2013 سے 2014 تک وہ وزیرِ اطلاعات و مواصلات رہیں، اس کے بعد 2014 سے 2017 تک انہوں نے وزیرِ خارجہ کی ذمہ داریاں سنبھالیں۔ 2017 میں انہیں حکومت نواز آئین ساز اسمبلی کا سربراہ مقرر کیا گیا، جس نے مادورو حکومت کی پالیسیوں کو آگے بڑھانے میں اہم کردار ادا کیا۔

جون 2018 میں ڈیلسی روڈریگز کو وینزویلا کی نائب صدر مقرر کیا گیا۔ بعد ازاں اگست 2024 میں انہیں وزارتِ تیل کی اضافی ذمہ داری سونپی گئی، جہاں انہوں نے امریکہ کی بڑھتی ہوئی پابندیوں کے درمیان ملک کی سب سے اہم صنعت کو سنبھالنے اور مستحکم رکھنے کی کوشش کی۔