نئی دہلی: موڈیز ریٹنگز نے منگل کے روز کہا ہے کہ زیادہ تر بھارتی مصنوعات پر امریکی محصولات (ڈیوٹی) کی شرح میں کمی محنت پر مبنی شعبوں، جیسے جواہرات و زیورات، ٹیکسٹائل اور ملبوسات کے لیے ایک مثبت پیش رفت ہے۔

امریکی صدر ڈونلڈ ٹرمپ نے پیر کے روز وزیراعظم نریندر مودی سے ٹیلی فون پر گفتگو کے بعد اعلان کیا تھا کہ بھارت اور امریکا ایک تجارتی معاہدے پر متفق ہو گئے ہیں، جس کے تحت واشنگٹن بھارتی اشیا پر عائد جوابی محصولات کو موجودہ 25 فیصد سے کم کرکے 18 فیصد کر دے گا۔ موڈیز نے اپنے بیان میں کہا کہ اس تجارتی معاہدے سے امریکا کو ہونے والی بھارتی اشیا کی برآمدات میں دوبارہ تیزی آئے گی۔

بھارت کے لیے امریکا بدستور سب سے بڑی اشیا برآمدی منڈی ہے۔ ریٹنگ ایجنسی کے مطابق، کم محصولات جواہرات و زیورات، ٹیکسٹائل اور ملبوسات جیسے محنت پر مبنی شعبوں کے لیے فائدہ مند ثابت ہوں گے، جو بھارت کے نمایاں برآمدی شعبوں میں شامل ہیں۔

تاہم موڈیز نے وضاحت کی کہ دواسازی اور صارفین کی الیکٹرانکس، جو دیگر دو بڑے برآمدی شعبے ہیں، پہلے ہی امریکا کی جانب سے عائد 50 فیصد کے بلند محصولات سے مستثنیٰ تھے، اس لیے محصولات میں حالیہ کمی کا ان پر نمایاں اثر پڑنے کا امکان نہیں ہے۔

موڈیز نے یہ بھی کہا کہ اگرچہ بھارت نے حالیہ مہینوں میں روس سے خام تیل کی خریداری میں کمی کی ہے، تاہم اس بات کا امکان کم ہے کہ وہ فوری طور پر روسی تیل کی خرید مکمل طور پر بند کر دے، کیونکہ ایسا کرنا بھارت کی اقتصادی ترقی میں رکاوٹ بن سکتا ہے۔ موڈیز کے مطابق، اگر بھارت مکمل طور پر غیر روسی تیل کی طرف منتقل ہوتا ہے تو دیگر ذرائع سے سپلائی محدود ہو سکتی ہے اور قیمتوں میں اضافہ ہو سکتا ہے، کیونکہ بھارت دنیا کے سب سے بڑے تیل درآمد کنندگان میں سے ایک ہے۔