واشنگٹن: امریکہ اور سوویت یونین (موجودہ روس) کے درمیان کئی دہائیوں تک ایٹمی جنگ کا خطرہ رہا، اور کیوبا میزائل بحران جیسے مواقع پر یہ کشیدگی خطرناک حد تک پہنچ گئی تھی۔ اس تناؤ کو کم کرنے کے لیے 1970 کی دہائی سے دونوں ملکوں نے کئی اہم معاہدے کیے، جن میں 1987 کا درمیانے فاصلے کے جوہری ہتھیاروں کا معاہدہ (INF) بھی شامل تھا، جس کے تحت ایک مکمل قسم کے جوہری میزائل ختم کیے گئے۔

یہ معاہدہ 2019 میں ختم ہو گیا جب امریکہ نے اس سے علیحدگی اختیار کر لی۔ اب، منگل کے روز روس نے بھی اس معاہدے کے تحت اپنے اوپر عائد خودساختہ پابندیاں ختم کرنے کا اعلان کر دیا ہے۔ اس کے بعد امریکہ اور روس کے درمیان اب صرف ایک بڑا جوہری کنٹرول معاہدہ "نیو اسٹارٹ" باقی رہ گیا ہے، جو فروری 2026 میں خودبخود ختم ہو جائے گا۔

ماہرین کے مطابق یہ معاہدہ بھی خطرے میں ہے۔ ایٹمی ہتھیاروں کے کنٹرول کے ماہر الیگزینڈر بالفرس، جو بین الاقوامی اسٹریٹجک اسٹڈیز انسٹی ٹیوٹ (IISS) سے منسلک ہیں، کہتے ہیں:ضروری نہیں کہ ان معاہدوں کا خاتمہ جوہری جنگ کے امکانات میں اضافہ کرے، لیکن یہ انہیں کم بھی نہیں کرتا۔ اگرچہ امریکہ اور روس ابھی بھی بین الاقوامی سطح پر ایٹمی ہتھیاروں کے عدم پھیلاؤ کے معاہدوں کا حصہ ہیں، مگر باہمی تعلقات میں غیر یقینی صورتحال اور معاہدوں میں کمی عالمی سطح پر تشویش کا باعث بن رہی ہے۔

بدھ کو جب امریکہ کی جانب سے جاپانی شہر ہیروشیما پر ایٹم بم گرائے جانے کی 80 ویں برسی منائی گئی، تو اس سانحے میں بچ جانے والے افراد نے دنیا کے رہنماؤں کی جانب سے جوہری ہتھیاروں کو روک تھام کے لیے ضروری قرار دینے پر مایوسی اور تشویش کا اظہار کیا۔ آج بھی دنیا میں سب سے زیادہ جوہری ہتھیار امریکہ اور روس کے پاس ہیں۔

فیڈریشن آف امریکن سائنٹسٹس (FAS) کے مطابق، 1986 میں سوویت یونین کے پاس 40,000 سے زائد جوہری وار ہیڈز تھے جبکہ امریکہ کے پاس 20,000 سے زیادہ۔ مختلف کنٹرول معاہدوں کے ذریعے ان ہتھیاروں کی تعداد میں خاصی کمی کی گئی۔ مارچ 2025 میں FAS کے اندازے کے مطابق، روس کے پاس کل 5,459 جوہری ہتھیار (چاہے تعینات ہوں یا نہ ہوں) ہیں جبکہ امریکہ کے پاس 5,177۔ یعنی دونوں ممالک کے پاس مجموعی طور پر دنیا کے 87 فیصد جوہری ہتھیار موجود ہیں۔

مئی 1972 میں، کیوبا میزائل بحران کے دس سال بعد، امریکہ اور سوویت یونین نے پہلا بڑا معاہدہ ‘اسٹریٹجک آرمز لیمیٹیشن ٹاکس-1’ (SALT-1) کیا، جس میں میزائل، بمبار طیاروں اور آبدوزوں کی تعداد محدود کی گئی۔ اسی سال ‘اینٹی بیلسٹک میزائل’ (ABM) معاہدہ بھی ہوا، جو میزائل دفاعی نظام پر پابندیاں لگاتا تھا۔ 1987 میں، سوویت لیڈر میخائل گورباچوف اور امریکی صدر رونالڈ ریگن نے INF معاہدے پر دستخط کیے، جس کے تحت 500 سے 5,500 کلومیٹر مار کرنے والے میزائلوں پر پابندی عائد کی گئی۔

امریکی صدر ڈونلڈ ٹرمپ نے اپنے دور میں اس معاہدے سے امریکہ کو الگ کر لیا، یہ کہتے ہوئے کہ روس اس کی خلاف ورزی کر رہا ہے۔ روس نے اس الزام کی تردید کی۔ ٹرمپ حکومت نے یہ بھی کہا کہ چین اور ایران جیسے ممالک اس معاہدے کا حصہ نہیں تھے، جبکہ ان کے پاس ایسی میزائلیں موجود ہیں۔ روس نے ابتدائی طور پر اس معاہدے پر عمل جاری رکھنے کا عندیہ دیا، لیکن حال ہی میں اس نے باضابطہ طور پر اس عزم کو ختم کر دیا۔

اس سے قبل، روس نے یوکرین پر ’اوریشنک‘ ہائپر سونک میزائل کا تجربہ کیا تھا، جسے رواں سال کے آخر تک بیلاروس میں تعینات کیا جائے گا۔ 1991 میں START-I معاہدہ ہوا، جس کے تحت دونوں ممالک نے اپنی جوہری صلاحیتوں کو محدود کیا۔ یہ معاہدہ اب ختم ہو چکا ہے۔

اس کے بعد START-II پر بھی دستخط ہوئے، لیکن وہ کبھی نافذ نہیں ہوا۔ 2001 میں نائن الیون حملوں کے بعد امریکہ کی اسٹریٹجک ترجیحات میں تبدیلی آئی۔ 2002 میں صدر جارج بش نے ABM معاہدے سے امریکہ کو نکال لیا، یہ کہتے ہوئے کہ یہ امریکہ کو ایران اور شمالی کوریا جیسے ممالک کے حملوں سے بچانے میں رکاوٹ ہے۔

روس نے اس پر شدید ردعمل ظاہر کیا، اور خدشہ ظاہر کیا کہ امریکہ ایسا دفاعی نظام تیار کرے گا جو روس کی ایٹمی صلاحیت کو ناکارہ بنا دے گا۔ اب امریکہ اور روس کے درمیان صرف ’نیو اسٹارٹ‘ معاہدہ باقی ہے، جس پر 2010 میں دستخط ہوئے تھے۔ اس میں دونوں ملکوں کے ایٹمی ہتھیاروں اور میزائلوں کی تعداد پر پابندیاں لگائی گئی تھیں، اور انسپیکشن کا نظام قائم کیا گیا تھا۔ مگر اب یہ معاہدہ بھی تقریباً غیر مؤثر ہو چکا ہے۔

رائل یونائیٹڈ سروسز انسٹی ٹیوٹ (RUSI) کے ماہرِ دفاع سدھارتھ کوشل کے مطابق، روس نے یوکرین پر حملے کے بعد اس معاہدے میں اپنی شرکت معطل کر دی، اور انسپیکشن کا عمل رک گیا۔ اگرچہ روس کا کہنا ہے کہ وہ اب بھی اس کی شرائط پر عمل کر رہا ہے۔

ماہرین کے مطابق INF اور نیو اسٹارٹ جیسے معاہدوں نے یورپ میں کشیدگی کم کرنے میں کردار ادا کیا۔ مگر ان معاہدوں کے خاتمے سے پرانے سرد جنگ کے حریفوں کے درمیان پھر سے تناؤ بڑھنے کا خطرہ پیدا ہو گیا ہے۔ اس کے ساتھ ہی دنیا میں درمیانے فاصلے کی روایتی (غیر جوہری) میزائلوں کی طرف دلچسپی میں اضافہ ہو رہا ہے۔

امریکہ یورپ اور بحرالکاہل کے علاقوں میں ایسی میزائلیں نصب کرنے کی منصوبہ بندی کر رہا ہے۔ حالیہ اسرائیل-ایران تنازع میں بھی ان میزائلوں کا استعمال دیکھنے میں آیا۔ سدھارتھ کوشل کے مطابق، مستقبل قریب میں امریکہ اور روس کے درمیان کسی نئے جوہری معاہدے کا امکان کم ہے، کیونکہ اس کے لیے درکار باہمی اعتماد موجود نہیں ہے۔