نیویارک:امریکہ کے صدر ڈونلڈ ٹرمپ کی جانب سے عائد کردہ درآمدی محصولات کو سپریم کورٹ کی طرف سے غیر آئینی قرار دیے جانے کے بعد ان محصولات کی واپسی (ریفنڈ) کے لیے دعوے داخل کرنے کا عمل پیر سے شروع ہو رہا ہے۔

‘امریکی کسٹمز اینڈ بارڈر پروٹیکشن (سی بی پی)’ کے مطابق، درآمد کنندگان اور ان کے ایجنٹ پیر کی صبح آٹھ بجے سے ایک آن لائن پورٹل کے ذریعے ریفنڈ کے دعوے جمع کرا سکتے ہیں۔ یہ عمل ان کمپنیوں کے لیے ہے جنہوں نے پہلے محصولات کی ادائیگی کی تھی۔ سی بی پی نے بتایا کہ منظور شدہ دعووں پر ریفنڈ جاری ہونے میں 60 سے 90 دن لگ سکتے ہیں۔ یہ عمل مرحلہ وار مکمل کیا جائے گا، جس میں پہلے حالیہ ادائیگیوں کو شامل کیا جائے گا۔

اس فیصلے کے بعد کچھ معاملات میں صارفین کو بھی بالواسطہ فائدہ پہنچنے کا امکان ہے، تاہم یہ عمل بتدریج آگے بڑھے گا۔ عدالت نے قرار دیا کہ ٹرمپ نے ہنگامی اختیارات کا غلط استعمال کرتے ہوئے محصولات عائد کیے، جس سے امریکی کانگریس کے ٹیکس عائد کرنے کے اختیار کی خلاف ورزی ہوئی۔ سی بی پی کے مطابق تقریباً 3,30,000 درآمد کنندگان نے تقریباً 166 ارب ڈالر کے محصولات ادا کیے تھے۔ ان میں سے صرف چند معاملات کو فی الحال ریفنڈ کے پہلے مرحلے میں شامل کیا گیا ہے۔