اربیل (عراق): ایران نے جمعہ کے روز خلیج فارس کے اطراف امریکی فوجی اڈوں کو نشانہ بنایا، جبکہ امریکہ نے ایران کے متعدد فوجی ٹھکانوں پر بمباری کی۔ مسلسل تیرہویں رات بھی دونوں ممالک کے درمیان حملوں کا سلسلہ جاری رہا اور کسی بھی فریق کی جانب سے پسپائی کے آثار نظر نہیں آئے۔
جنگ میں شدت آنے کے ساتھ سفارتی کوششیں بھی غیر یقینی کا شکار ہیں۔ مشرق وسطیٰ میں امریکی سفارت خانوں نے اپنے شہریوں کو خبردار کیا ہے کہ خطے سے انخلا کے مواقع محدود ہو سکتے ہیں، جبکہ ایران کی پاسدارانِ انقلاب نے پڑوسی ممالک کے شہریوں کو امریکی فوجی اڈوں سے دور رہنے کا مشورہ دیا ہے۔ ایرانی وزیر خارجہ عباس عراقچی نے کہا کہ ایران "امریکی دھونس کے سامنے نہیں جھکے گا"۔ انہوں نے چین اور روس کے ساتھ جاری رابطوں کا ذکر کرتے ہوئے کہا کہ اسلامی جمہوریہ ایران نہ دھمکیوں سے خوفزدہ ہوگا اور نہ ہی دباؤ کے سامنے سر جھکائے گا۔
🚨 BREAKING:
— John F Kennedy Jr (@John_F_kJr) July 24, 2026
According to reports, about an hour ago, Iran launched a massive missile and drone attack on a US aircraft carrier, resulting in the immediate deaths of approximately 200 people, including soldiers and personnel.
The situation is extremely serious. pic.twitter.com/YhBOrYTjNP
دوسری جانب امریکی صدر ڈونلڈ ٹرمپ نے کہا کہ ایران کے ساتھ جاری مذاکرات اب تک کے سب سے سنجیدہ ہیں، حالانکہ امریکی حملے روزانہ جاری ہیں۔ انہوں نے کہا، "ہم مکمل طور پر تیار ہیں، لیکن بات چیت بھی جاری ہے۔ مجھے جنگ ختم کرنے کی کوئی جلدی نہیں۔" اس تنازع کا مرکز آبنائے ہرمز ہے، جو دنیا کی توانائی کی ترسیل کا ایک انتہائی اہم راستہ ہے۔
ایرانی حملوں کے باعث اس راستے پر شدید خلل پیدا ہوا ہے، جس سے تیل کی قیمتیں بڑھ گئی ہیں اور عالمی معیشت پر منفی اثرات مرتب ہو رہے ہیں۔ عراق کے شہر اربیل میں، جہاں امریکی فوجی مشیر تعینات ہیں، سکیورٹی حکام نے بتایا کہ امریکہ کی قیادت میں اتحادی افواج نے دھماکا خیز مواد سے بھرے پانچ ڈرون مار گرائے۔ شہر میں متعدد دھماکوں کی آوازیں سنی گئیں اور ہوائی اڈے کے قریب دھوئیں کے بادل بھی دیکھے گئے، جہاں امریکی فوج کا اڈہ موجود ہے۔ ادھر ایران کی پاسدارانِ انقلاب نے دعویٰ کیا کہ انہوں نے کویت میں واقع امریکی فوجی اڈے ادیری کو نشانہ بنایا، جہاں تین اسلحہ اور گوداموں کی عمارتیں تباہ ہو گئیں۔
ایران نے یہ بھی دعویٰ کیا کہ بحرین میں امریکی بحریہ کے پانچویں بیڑے کے واچ ٹاور کو بھی نقصان پہنچایا گیا ہے۔ تاہم امریکی سینٹرل کمانڈ نے ان دعوؤں پر کوئی تبصرہ نہیں کیا۔ بحرین اور اردن نے بھی تصدیق کی کہ انہوں نے جمعہ کے روز ایران کی جانب سے داغے گئے فضائی حملوں کو ناکام بنا دیا۔ دوسری طرف امریکہ نے شمالی ایران میں پاسدارانِ انقلاب کے بحری اڈے، قشم جزیرے، اصفہان، خوزستان اور فارس صوبوں میں متعدد فوجی اہداف پر حملے کیے۔ امریکی سینٹرل کمانڈ نے کہا کہ ان کارروائیوں کا مقصد ایران کی اس صلاحیت کو کمزور کرنا ہے جس کے ذریعے وہ آبنائے ہرمز سے گزرنے والے تجارتی اور شہری بحری جہازوں کو خطرہ پہنچا سکتا ہے
اسی دوران عمان کا ایک سفارتی وفد تہران پہنچا، جہاں آبنائے ہرمز میں بحری آمد و رفت کو معمول پر لانے کے حوالے سے بات چیت کی گئی۔ ادھر ایران کے اتحادی حوثیوں نے جمعرات کو بحیرۂ احمر میں دو سعودی آئل ٹینکروں کو نشانہ بنایا، جس سے باب المندب کی آبی گزرگاہ پر بھی خطرات بڑھ گئے۔ یہ راستہ عالمی تجارت اور مشرق وسطیٰ کے تیل کی ترسیل کے لیے نہایت اہم سمجھا جاتا ہے۔ امریکی صدر ٹرمپ نے خبردار کیا ہے کہ اگر حوثیوں نے بحری جہازوں پر حملے جاری رکھے تو انہیں "سخت فوجی سزا" دی جائے گی۔ جنگ کے معاشی اثرات بھی نمایاں ہو رہے ہیں۔ برینٹ خام تیل کی قیمت معمولی کمی کے بعد تقریباً 96 امریکی ڈالر فی بیرل رہی، جو جنگ سے پہلے تقریباً 72 امریکی ڈالر تھی۔
امریکہ میں پیٹرول کی اوسط قیمت 4.11 امریکی ڈالر فی گیلن تک پہنچ گئی ہے۔ انسانی نقصان بھی مسلسل بڑھ رہا ہے۔ ایران کی وزارتِ صحت کے مطابق جنگ شروع ہونے کے بعد سے 3,434 افراد ہلاک ہو چکے ہیں۔ عالمی بحری تنظیم (IMO) نے بتایا کہ آبنائے ہرمز کے اطراف تقریباً 400 جہازوں پر سوار 6,000 سے زائد ملاح پھنسے ہوئے ہیں۔ اقوام متحدہ کے انسانی حقوق کے سربراہ وولکر ترک نے ان کی فوری مدد کا مطالبہ کرتے ہوئے کہا کہ کئی ملاح خوراک، پانی، ایندھن، طبی سہولت، بجلی اور اپنے اہل خانہ سے رابطے کی سہولت سے بھی محروم ہیں۔
ادھر پاکستان کے وزیر خارجہ اسحاق ڈار نے تہران میں اپنے ایرانی ہم منصب عباس عراقچی سے ملاقات کی، تاہم عراقچی نے کہا کہ انہیں مزید ثالثوں کی ضرورت محسوس نہیں ہوتی اور مسئلے کے حل کے لیے امریکہ کو اپنا مؤقف تبدیل کرنا ہوگا۔ یاد رہے کہ امریکہ اور اسرائیل نے 28 فروری کو ایران پر حملے شروع کیے تھے اور ان کا کہنا ہے کہ اس کارروائی کا مقصد ایران کے جوہری پروگرام کو ختم کرنا اور تہران کی حکومت پر دباؤ بڑھانا ہے۔
