واشنگٹن: امریکی افواج نے ہفتہ کو وینزویلا کے ساحل کے قریب ایک تیل کے ٹینکر کو روک لیا۔ اس قسم کی کارروائی دو ہفتوں سے بھی کم عرصے میں دوسری مرتبہ کی گئی ہے۔ یہ اقدام ایسے وقت میں اٹھایا گیا جب امریکی صدر ڈونلڈ ٹرمپ نے وینزویلا کے صدر نیکولس مادورو پر دباؤ بڑھانے کے لیے تیل کے ٹینکرز کو ضبط کرنے کا حال ہی میں اعلان کیا تھا۔

ٹرمپ نے کہا تھا کہ جنوبی امریکی ملک وینزویلا میں آنے جانے والے تمام ممنوعہ تیل کے ٹینکرز کو روکا جائے گا۔ اس سے قبل امریکی افواج نے 10 دسمبر کو بھی وینزویلا کے ساحل کے قریب ایک تیل کے ٹینکر کو ضبط کیا تھا۔

امریکی سیکریٹری ہوم کرسٹی نویم نے امریکی کوسٹ گارڈز کی جانب سے محکمہ دفاع کی مدد سے ٹینکر کو روکے جانے کی تصدیق کی۔ انہوں نے سوشل میڈیا پر ایک ویڈیو بھی شیئر کی جس میں ایک امریکی ہیلی کاپٹر عملے کو "سینچریز" نامی جہاز پر اتارتا دکھایا گیا ہے۔

نویم نے سوشل میڈیا پلیٹ فارم ‘ایکس’ پر لکھا، "امریکہ اس ممنوعہ تیل کی غیر قانونی نقل و حمل کے خلاف کارروائی جاری رکھے گا، جس کا استعمال اس خطے میں منشیات سے متعلق دہشت گردی کو مالی مدد فراہم کرنے کے لیے کیا جاتا ہے۔ ہم آپ کو تلاش کریں گے اور آپ کو روکیں گے۔

وینزویلا حکومت نے ہفتہ کو ایک بیان میں امریکی افواج کی کارروائی کو "جرم" قرار دیا اور کہا کہ اسے "سزا کے بغیر نہیں چھوڑا جائے گا"۔ اس نے اقوام متحدہ کی سیکیورٹی کونسل میں شکایت درج کرنے سمیت مختلف قانونی اقدامات اٹھانے کا عزم ظاہر کیا۔