نیو یارک/واشنگٹن، (پی ٹی آئی)امریکہ کے وزیر خارجہ مارکو روبیو نے جمعرات کو کہا کہ واشنگٹن جنوبی ایشیا کی صورتحال پر گہری نظر رکھے ہوئے ہے اور انہوں نے ہندوستان اور پاکستان سے کشیدگی کم کرنے کی اپیل کی ہے۔خبر کے مطابق، روبیو نے کہا کہ امریکہ جنوبی ایشیا کی صورتحال پر قریبی نظر رکھے ہوئے ہے، کیونکہ وہ اس خطے میں امن اور استحکام کو فروغ دینے کے لیے پُرعزم ہے۔ خبر میں کہا گیا ہے: روبیو نے اس بات پر بھی زور دیا کہ پاکستان اور ہندوستان، دونوں کو کشیدگی کم کرنے کے لیے مل کر کام کرنا چاہیے۔ اس میں یہ بھی کہا گیا ہے کہ وزیراعظم شہباز شریف نے ہر قیمت پر پاکستان کی خودمختاری اور علاقائی سالمیت کے دفاع کے عزم کی توثیق کی۔ ۔ ‘ریڈیو پاکستان’ کی خبر کے مطابق، روبیو نے وزیراعظم شہباز شریف کو فون کیا اور جنوبی ایشیا کے خطے میں ابھرتی ہوئی صورتحال پر تبادلہ خیال کیا۔

پاکستان کے زیر قبضہ کشمیر (پی او کے) اور پاکستان کے صوبہ پنجاب میں ہندوستانی فوج کی کارروائی کے بعد، امریکی فوج کے ایک اعلیٰ کمانڈر نے کہا ہے کہ امریکہ صورتحال پر نہایت قریب سے نظر رکھے ہوئے ہے۔۔

22 اپریل کو جموں و کشمیر کے پہلگام میں ہونے والے دہشت گرد حملے کا بدلہ لیتے ہوئے، ہندوستانی مسلح افواج نے منگل کی رات دیر گئے ’آپریشن سیندور‘ کے تحت پاکستان اور پی او کے میں نو دہشت گرد ٹھکانوں پر میزائل حملے کیے۔ اس دہشت گرد حملے میں 26 افراد ہلاک ہوئے تھے، جن میں سے زیادہ تر سیاح تھے۔

امریکی فوج کے بحرالکاہل کے علاقائی کمانڈر، جنرل رونالڈ کلارک نے بدھ کے روز ڈیجیٹل میڈیا کے ذریعے صحافیوں سے بات کرتے ہوئے کہا: ابھی اس بارے میں کچھ بھی کہنا قبل از وقت ہو گا۔ ہم اس صورتحال پر انتہائی قریب سے نظر رکھے ہوئے ہیں۔ ہم اپنے ہیڈکوارٹر اور یو ایس انڈو پیسفک کمانڈ سے رابطے میں ہیں کیونکہ ان حملوں سے متعلق معلومات مزید واضح ہو رہی ہیں۔

یو ایس انڈو پیسفک کمانڈ، امریکی مسلح افواج کی چھ مشترکہ جنگی کمانڈز میں سے ایک ہے، جس کا مرکزی دفتر ہوائی میں واقع ہے۔ جنرل کلارک یہ بات بھارت کی جانب سے کی گئی کارروائیوں کے بعد پیدا ہونے والی صورتحال پر امریکی مؤقف کے بارے میں پوچھے گئے سوال کے جواب میں کہہ رہے تھے۔

اس سے پہلے بدھ کو امریکی صدر ڈونالڈ ٹرمپ نے کہا کہ وہ چاہتے ہیں کہ ہندوستان اور پاکستان کے درمیان بڑھتا ہوا تنازعہ "رُک جائے"، اور اگر وہ کچھ مدد کر سکتے ہیں تو وہ ضرور کریں گے۔

ہندوستان اور پاکستان کے درمیان جنگ سے متعلق ایک سوال کے جواب میں ٹرمپ نے کہا: یہ بہت ہولناک ہے۔ میری خواہش ہے کہ میں دونوں کو ساتھ لے کر بیٹھوں۔ میں دونوں کو بہت اچھی طرح جانتا ہوں، اور میں انہیں اس (تنازع) کو حل کرتے ہوئے دیکھنا چاہتا ہوں۔ میں چاہتا ہوں کہ وہ رُک جائیں، اور امید ہے کہ وہ اب رک سکتے ہیں۔

انہوں نے مزید کہا: انہوں نے ایک دوسرے کے خلاف 'جیسے کو تیسا' والا رویہ اختیار کیا ہے، اس لیے اب امید ہے کہ وہ رک سکتے ہیں۔ میں دونوں ممالک کو جانتا ہوں، اور ہم دونوں کے ساتھ بہت اچھے تعلقات رکھتے ہیں۔ اگر میں کوئی مدد کر سکتا ہوں تو ضرور کروں گا۔