واشنگٹن/ آواز دی وائس
امریکہ کی ایک وفاقی عدالت نے بدھ کے روز سابق صدر ڈونلڈ ٹرمپ کے اُس حکم پر روک لگا دی ہے جس کے تحت انہوں نے ہنگامی اختیارات کے قانون کے تحت درآمدات پر بھاری ٹیکس عائد کیے تھے۔
اس عدالتی فیصلے سے ٹرمپ کی اُن اقتصادی پالیسیوں پر سوالات کھڑے ہو گئے ہیں جنہوں نے عالمی مالیاتی منڈیوں میں ہلچل مچا دی تھی، تجارتی شراکت داروں کو ناراض کیا تھا، مہنگائی میں اضافے اور معاشی سست روی کے خدشات کو ہوا دی تھی۔
نیویارک میں واقع امریکی بین الاقوامی تجارتی عدالت کی تین رکنی بینچ نے یہ فیصلہ سنایا۔ عدالتی کارروائی میں مؤقف اختیار کیا گیا تھا کہ ٹرمپ نے اپنے اختیارات کا ناجائز استعمال کرتے ہوئے ملک کی تجارتی پالیسی اپنی مرضی سے طے کی۔
ٹرمپ نے کئی بار کہا تھا کہ درآمدی ٹیکس کی وجہ سے کارخانے امریکہ واپس آئیں گے اور مقامی لوگوں کو روزگار ملے گا۔ اُن کا یہ بھی دعویٰ تھا کہ اس اقدام سے وفاقی بجٹ خسارہ کم کرنے کے لیے خاطرخواہ آمدنی حاصل ہوگی۔
تین ججوں میں شامل تھے: ٹرمپ کے مقرر کردہ ٹموتھی ریف، سابق صدر ریگن کے مقرر کردہ جین ریسٹانی، اور سابق صدر اوباما کے مقرر کردہ گیری کیٹز مین۔ عدالتی فیصلے میں کہا گیا کہ صدر نے بین الاقوامی ہنگامی اقتصادی اختیارات ایکٹ 1977 کے تحت اپنے اختیارات سے تجاوز کرتے ہوئے عالمی سطح پر جوابی محصولات عائد کرنے کا حکم دیا۔
یہ کیس امریکی بین الاقوامی تجارتی عدالت میں دائر کیا گیا تھا، جو خاص طور پر بین الاقوامی تجارتی قوانین سے متعلق مقدمات کی سماعت کرتی ہے۔ عام طور پر درآمدی محصولات کے لیے کانگریس کی منظوری ضروری ہوتی ہے، لیکن ٹرمپ کا دعویٰ تھا کہ تجارتی خسارہ ختم کرنے کے لیے انہیں کارروائی کا اختیار حاصل ہے۔
ٹرمپ کے اس فیصلے کے خلاف کم از کم سات مقدمات دائر کیے گئے ہیں۔ انہوں نے کینیڈا، چین، اور میکسیکو سمیت دنیا کے متعدد ممالک سے درآمدات پر بھاری محصولات لگائے تھے تاکہ امریکہ کے دیرینہ تجارتی خسارے کو کم کیا جا سکے۔
.webp "ٹرمپ کے درآمدی ٹیکس حکم پر امریکی عدالت کی روک")
