اسلام آباد: اقوام متحدہ نے جمعرات کے روز پاکستان اور افغانستان سے اپیل کی کہ وہ شہریوں کے تحفظ کو یقینی بنانے کے لیے دشمنی کو مستقل طور پر ختم کریں۔ یہ اپیل اس وقت سامنے آئی ہے جب حالیہ جھڑپوں میں دونوں ممالک میں درجنوں افراد ہلاک اور سیکڑوں زخمی ہو چکے ہیں۔ یہ بحران 2021 میں اس وقت کے بعد سب سے سنگین قرار دیا جا رہا ہے جب طالبان نے مغرب کی حمایت یافتہ حکومت کے خاتمے کے بعد افغانستان میں اقتدار سنبھالا تھا۔

قابل ذکر ہے کہ 10 اکتوبر کے بعد سے سرحد پار پرتشدد جھڑپوں میں اضافہ ہوا ہے، اور دونوں ممالک ایک دوسرے پر مسلح اشتعال انگیزی کے الزامات لگاتے ہوئے جوابی حملے کر چکے ہیں۔ بدھ کے روز دونوں فریقین نے جنگ بندی پر رضامندی ظاہر کی۔ یہ سمجھوتہ علاقائی طاقتوں کی اپیل کے بعد ممکن ہوا، کیونکہ یہ جھڑپیں اس خطے کے استحکام کے لیے خطرہ بن رہی تھیں جہاں داعش اور القاعدہ جیسے دہشتگرد گروہ دوبارہ سرگرم ہونے کی کوشش کر رہے ہیں۔

جمعرات کو کسی بڑی جھڑپ کی اطلاع نہیں ملی، لیکن اہم سرحدی چوکیاں بند رہیں۔ افغانستان میں اقوام متحدہ کا امدادی مشن (یوناما) نے اس جنگ بندی کا خیرمقدم کیا اور کہا کہ وہ ہلاکتوں کی تعداد کا جائزہ لے رہا ہے۔ مشن کے مطابق، بدھ کو جنوبی علاقوں میں سب سے زیادہ جانی نقصان ہوا۔

یوناما نے بتایا: "موجودہ معلومات سے پتا چلتا ہے کہ افغان سرحدی علاقے سپن بولدک میں کم از کم 17 شہری ہلاک اور 346 زخمی ہوئے۔" یوناما نے مزید کہا کہ اس نے پہلے کی جھڑپوں میں افغانستان کے کئی صوبوں میں کم از کم 16 شہریوں کی ہلاکت کی بھی تصدیق کی ہے۔ مشن نے تمام فریقین سے اپیل کی: "شہریوں کے تحفظ اور مزید جانی نقصان کو روکنے کے لیے دشمنی کو مستقل طور پر ختم کیا جائے۔"

پاکستان نے اپنی طرف سے شہری ہلاکتوں کے اعداد و شمار جاری نہیں کیے ہیں، لیکن وہ مسلسل افغانستان پر الزام عائد کرتا رہا ہے کہ وہ شدت پسندوں کو پناہ دے رہا ہے، جسے طالبان مسترد کرتے ہیں۔ 2021 کے بعد سے پاکستان میں دہشتگرد حملوں میں نمایاں اضافہ دیکھا گیا ہے۔ دونوں ممالک کے درمیان 2,611 کلومیٹر طویل سرحد ہے، جسے ڈیورنڈ لائن کہا جاتا ہے، لیکن افغانستان نے اسے آج تک باضابطہ طور پر تسلیم نہیں کیا ہے۔