اقوام متحدہ: اقوامِ متحدہ کے سیکریٹری جنرل انتونیو گوتریس نے بنگلہ دیش میں ایک ہندو شخص کے قتل اور دیگر پرتشدد واقعات پر تشویش کا اظہار کیا ہے۔ سیکریٹری جنرل کے ترجمان اسٹیفن دوجارک نے روزانہ کی پریس بریفنگ میں کہا، "جی ہاں، بنگلہ دیش میں جو تشدد ہم نے دیکھا ہے اس پر ہمیں شدید تشویش ہے۔

وہ بنگلہ دیش میں اقلیتوں پر حملوں، خصوصاً گزشتہ چند دنوں میں ہندوؤں کی پیٹ پیٹ کر ہلاکت کے واقعات پر سیکریٹری جنرل کے ردِعمل سے متعلق ایک سوال کا جواب دے رہے تھے۔ انہوں نے کہا، چاہے بنگلہ دیش ہو یا کوئی اور ملک، یہ ضروری ہے کہ وہ لوگ جو ’اکثریتی‘ طبقے سے باہر ہیں، خود کو محفوظ محسوس کریں، اور تمام بنگلہ دیشی شہری بھی محفوظ محسوس کریں۔ ہمیں یقین ہے کہ حکومت ہر بنگلہ دیشی کی سلامتی کو یقینی بنانے کے لیے ہر ممکن کوشش کرے گی۔

گزشتہ ہفتے بالوکا میں توہینِ مذہب کے الزام میں ایک کپڑا فیکٹری میں کام کرنے والے مزدور دیپو چندر داس (25) کو ہجوم نے پیٹ پیٹ کر قتل کر دیا تھا اور بعد ازاں اس کی لاش کو آگ لگا دی گئی تھی۔ داس کے قتل کے سلسلے میں اتوار کو مزید دو افراد کو گرفتار کیا گیا۔

اخبار ’ڈیلی اسٹار‘ نے پولیس اور ریپڈ ایکشن بٹالین (آر اے بی) کے ذرائع کے حوالے سے بتایا کہ ان گرفتاریوں کے ساتھ اب تک قتل میں مبینہ طور پر ملوث ہونے کے الزام میں 12 افراد کو حراست میں لیا جا چکا ہے۔ ادھر، اقوامِ متحدہ کے انسانی حقوق کے سربراہ وولکر ٹرک نے کہا ہے کہ وہ بنگلہ دیش میں گزشتہ سال ہونے والے احتجاجی مظاہروں کے رہنما شریف عثمان بن ہادی کے قتل پر نہایت تشویش میں مبتلا ہیں۔

ہادی کو چند روز قبل بدمعاشوں نے گولی مار دی تھی، جس سے وہ شدید زخمی ہو گئے تھے اور بعد میں ان کا انتقال ہو گیا۔ ٹرک نے امن برقرار رکھنے اور سبھی سے تشدد سے دور رہنے کی اپیل کی۔ انہوں نے کہا، انتقام صرف تقسیم کو مزید گہرا کرے گا اور سب کے حقوق کو کمزور کرے گا۔

انہوں نے مزید کہا، میں حکام سے اپیل کرتا ہوں کہ ہادی کی موت کا سبب بننے والے حملے کی فوری، غیر جانبدار، جامع اور شفاف طریقے سے تحقیقات کی جائیں اور واقعے کے ذمہ دار افراد کے لیے مناسب قانونی عمل اور جوابدہی کو یقینی بنایا جائے۔ ملک میں فروری میں پارلیمانی انتخابات مجوزہ ہیں، ایسے میں ٹرک نے کہا کہ ایسا ماحول یقینی بنانا انتہائی اہم ہے جس میں تمام افراد پرامن طور پر حصہ لے سکیں اور آزادانہ طور پر ووٹ ڈال سکیں۔ انہوں نے کہا، میں حکام سے اپیل کرتا ہوں کہ اس نازک وقت میں اظہارِ رائے کی آزادی، پرامن اجتماع اور صحافیوں کے تحفظ کے حقوق کو برقرار رکھا جائے اور کسی بھی قسم کے تشدد کو روکا جائے۔