واشنگٹن: امریکی صدر ڈونلڈ ٹرمپ نے ہفتے کے روز کینیڈا کو دھمکی دی کہ اگر اونٹاریو صوبے کی جانب سے نشر کیے جانے والے "ٹیکس مخالف" ٹی وی اشتہار کو ہٹایا نہ گیا تو کینیڈا کی اشیاء پر درآمدی ٹیکس میں 10 فیصد کا مزید اضافہ کیا جائے گا۔

اشتہار میں امریکہ کے سابق صدر رونالڈ ریگن کے الفاظ کا استعمال کرتے ہوئے امریکی محصولات (ٹیکسوں) پر تنقید کی گئی تھی، جس پر ٹرمپ ناراض ہوگئے۔ انہوں نے کہا کہ وہ کینیڈا کے ساتھ تجارتی مذاکرات ختم کر دیں گے۔ اونٹاریو کے وزیرِاعلیٰ ڈگ فورڈ نے کہا تھا کہ وہ اختتامِ ہفتہ کے بعد اشتہار ہٹا دیں گے۔ یہ اشتہار جمعہ کی رات ورلڈ سیریز کے پہلے میچ کے دوران نشر ہوا تھا۔

ٹرمپ نے "ایئر فورس ون" سے ملائیشیا جاتے ہوئے اپنے "ٹرتھ سوشل" پلیٹ فارم پر لکھا: "یہ اشتہار فوراً ہٹا دینا چاہیے تھا، لیکن انہوں نے کل رات ورلڈ سیریز کے دوران اسے نشر ہونے دیا، حالانکہ وہ جانتے تھے کہ یہ جھوٹ ہے۔" انہوں نے مزید کہا، "حقائق کو غلط انداز میں پیش کرنے اور دشمنانہ رویے کے باعث میں کینیڈا پر اس وقت عائد محصولات میں 10 فیصد اضافہ کر رہا ہوں۔"

یہ واضح نہیں ہے کہ ٹرمپ اس اضافی ٹیکس کو نافذ کرنے کے لیے کس قانونی اختیار کا استعمال کریں گے۔ وائٹ ہاؤس نے اس سوال پر کوئی فوری تبصرہ نہیں کیا کہ 10 فیصد کا اضافہ کب نافذ ہوگا اور کیا یہ تمام کینیڈین اشیاء پر لاگو ہوگا یا نہیں۔ ٹرمپ کے محصولات سے کینیڈا کی معیشت کو شدید نقصان پہنچا ہے۔

کینیڈین وزیرِاعظم مارک کارنی ٹرمپ کے ساتھ مذاکرات کے ذریعے ان محصولات میں کمی کی کوشش کر رہے ہیں۔ کینیڈا کی 75 فیصد سے زیادہ برآمدات امریکہ جاتی ہیں، اور تقریباً 3.6 ارب کینیڈین ڈالر (2.7 ارب امریکی ڈالر) مالیت کی اشیاء اور خدمات روزانہ سرحد پار ہوتی ہیں۔ کارنی کے ترجمان نے اس معاملے پر کوئی تبصرہ نہیں کیا۔

کئی کینیڈین مصنوعات پر 35 فیصد ٹیکس عائد ہے، جبکہ اسٹیل اور ایلومینیم پر 50 فیصد۔ توانائی کی مصنوعات پر 10 فیصد محصول ہے، حالانکہ بیشتر اشیاء امریکہ۔کینیڈا۔میکسیکو معاہدے (USMCA) کے تحت محصولات سے مستثنیٰ ہیں۔

ٹرمپ اور کارنی دونوں ملائیشیا میں جنوب مشرقی ایشیائی ممالک کی تنظیم (آسیان) کے سربراہ اجلاس میں شرکت کریں گے، لیکن ٹرمپ نے اپنے ہمراہ سفر کرنے والے صحافیوں سے کہا کہ ان کی کارنی سے ملاقات کا کوئی منصوبہ نہیں ہے۔ ٹرمپ نے کہا کہ سابق صدر ریگن کے مؤقف کو اشتہار میں "غلط طریقے سے پیش" کیا گیا ہے۔