واشنگٹن: روسی صدر ولادیمیر پوتن کے ہندوستان دورے کے دوران امریکہ نے اپنی قومی سلامتی حکمتِ عملی جاری کر دی ہے۔ اس حکمتِ عملی میں ہندوستان کے ساتھ تعلقات کو مضبوط بنانے پر زور دیا گیا ہے۔ ساتھ ہی یہ بھی کہا گیا ہے کہ جنوبی بحیرۂ چین میں چین کے خلاف اکیلے محاذ سنبھالنے کے بجائے ہندوستان، جاپان جیسے ممالک کے ساتھ تعاون کو ترجیح دی جائے۔

ٹرمپ انتظامیہ کی جانب سے جاری 33 صفحات پر مشتمل نیشنل سیکیورٹی اسٹریٹجی میں یورپی ممالک پر سخت تنقید کی گئی ہے۔ اس میں کہا گیا ہے کہ: یورپی ممالک جمہوریت کو تباہ کر رہے ہیں اور یوکرین میں امن میں رکاوٹ بن رہے ہیں۔ یوکرین میں جنگ ختم کرنے کی امریکی کوششوں کو وہاں کے حکام ناکام بنا رہے ہیں۔

اس دستاویز کے مطابق یورپی معیشتوں کو مستحکم کرنے، یوکرین جنگ کو روکنے اور روس کے ساتھ اسٹریٹجک استحکام کو بحال کرنے کے لیے دشمنی ختم کرنا ضروری ہے۔ اس میں ایشیا اور مڈل ایسٹ کے ساتھ امریکی تعلقات کو بھی سیکیورٹی تناظر میں شامل کیا گیا ہے۔

ٹرمپ انتظامیہ نے کہا ہے کہ وہ ’بردن شفٹنگ‘ کی پالیسی اختیار کرے گا، جس کا مقصد یورپ کو اپنے پیروں پر کھڑا کرنا اور اتحادی خود مختار ممالک کے ایک فعال گروہ کے طور پر کام کرنے میں مدد دینا ہے۔ اس میں امریکی فوجی موجودگی کو دوبارہ ترتیب دینے کا بھی ذکر ہے تاکہ ایسے علاقوں سے دور رہا جائے جن کی امریکہ کی قومی سلامتی کے لیے اہمیت حالیہ برسوں میں کم ہو گئی ہے، اور فوری خطرات کے مطابق توجہ مرکوز کی جا سکے۔

نیشنل سیکیورٹی اسٹریٹجی میں چین کو ایک معاشی چیلنج بتایا گیا ہے۔ اس میں کہا گیا ہے کہ واشنگٹن، چین کے ساتھ معاشی تعلقات کو از سرِ نو متوازن کرے گا اور امریکی معاشی خودمختاری کی بحالی کے لیے باہمیّت اور انصاف کو ترجیح دے گا۔ اس میں یہ بھی کہا گیا ہے کہ ہند-بحرالکاہل (انڈو پیسفک) خطے میں جنگ روکنے سے متعلق اقدامات پر مسلسل اور مؤثر توجہ ضروری ہے۔