واشنگٹن ڈی سی: امریکی صدر ڈونلڈ ٹرمپ کا نام جان ایف کینیڈی سینٹر فار دی پرفارمنگ آرٹس کی عمارت سے ہٹانے کا کام ہفتے کی صبح (مقامی وقت کے مطابق) شروع کر دیا گیا، جب ایک وفاقی جج نے اس تاریخی ثقافتی ادارے کی نئی برانڈنگ کو غیر قانونی قرار دیا۔

نیویارک ٹائمز کے مطابق واشنگٹن میں شدید طوفانی بارشوں اور جاری قانونی تنازعات کے باوجود کارکنوں نے ہفتے کی صبح تین بجے کے بعد کینیڈی سینٹر کی سفید سنگِ مرمر کی بیرونی دیوار سے ٹرمپ کے نام والے حروف اتارنے کا کام شروع کیا۔ رپورٹ کے مطابق کینیڈی سینٹر نے عدالتی حکم پر عمل درآمد کے لیے مقررہ آدھی رات کی ڈیڈ لائن میں 12 گھنٹے کی توسیع کی درخواست کی تھی۔

سینٹر کے ایگزیکٹو ڈائریکٹر میٹ فلوکا نے وفاقی ضلعی عدالت کو بتایا کہ خراب موسم کی وجہ سے کام میں تاخیر ہوئی۔ اطلاعات کے مطابق کارکنوں نے جمعہ کو تقریباً آٹھ گھنٹے صرف اس حصے کے سامنے اسکیفولڈنگ (عارضی ڈھانچہ) نصب کرنے میں گزارے جہاں ٹرمپ کا نام آویزاں تھا۔ بعد میں اس ڈھانچے کو سفید چادروں سے ڈھانپ دیا گیا تاکہ نام ہٹانے کا عمل نظروں سے اوجھل رہے۔

نیویارک ٹائمز نے اس اقدام کو کینیڈی سینٹر پر ٹرمپ کے کنٹرول اور اس کی نئی برانڈنگ کے ناقدین کے لیے ایک بڑی علامتی فتح قرار دیا۔ سی این این کے مطابق جمعہ کو ایک وفاقی اپیل عدالت نے کینیڈی سینٹر کی وہ ہنگامی درخواست مسترد کر دی جس میں نچلی عدالت کے فیصلے پر عمل درآمد روکنے کی استدعا کی گئی تھی۔ یہ فیصلہ تین ججوں پر مشتمل بینچ — گریگوری کاتساس، پیٹریشیا ملیٹ اور رابرٹ ولکنز — نے دیا۔

عدالت نے اپنے فیصلے کی وجوہات بیان نہیں کیں، تاہم دونوں فریقوں کو ہدایت دی کہ وہ اس ماہ کے آخر میں مزید تحریری دلائل جمع کرائیں۔ اگرچہ کینیڈی سینٹر کی ویب سائٹ اور تشہیری مواد سے ٹرمپ کے کئی حوالہ جات پہلے ہی ہٹا دیے گئے تھے، تاہم عمارت کے باہر نصب بڑا بورڈ، جس پر "The Donald J. Trump and" درج تھا، قانونی چارہ جوئی جاری رہنے کے باعث برقرار رکھا گیا تھا۔

سی این این کے مطابق امریکی محکمۂ انصاف کے وکلا نے اپنی 22 صفحات پر مشتمل درخواست میں مؤقف اختیار کیا کہ اگر حکومت اپیل میں کامیاب ہو جاتی ہے تو سینٹر کا پرانا نام بحال کرنے سے عوام میں الجھن پیدا ہو سکتی ہے۔ درخواست میں مالی خدشات کا بھی ذکر کیا گیا۔

محکمۂ انصاف کے وکلا نے کہا کہ اگر ٹرمپ کا نام عمارت، تشہیر، برانڈنگ یا کسی بھی متعلقہ مقام سے ہٹا دیا جاتا ہے تو عطیہ دہندگان کے ساتھ کیے گئے معاہدے متاثر ہو سکتے ہیں۔ وکلا کے مطابق سینٹر کے ضوابط کے تحت ایسی صورت میں کروڑوں ڈالر کے عطیات واپس کرنا پڑ سکتے ہیں یا متوقع رقوم موصول نہیں ہوں گی، جس سے ادارے کو بڑا مالی نقصان پہنچ سکتا ہے۔