واشنگٹن: امریکی صنعتوں کے لیے ضروری نایاب زمینی معدنیات (Rare Earth Minerals) کی برآمد پر چین کی پابندی کے بعد دونوں ممالک کے درمیان کشیدگی مزید بڑھ گئی ہے۔ سابق امریکی صدر ڈونلڈ ٹرمپ نے اسے چین کا جارحانہ رویہ قرار دیتے ہوئے چینی مصنوعات پر مزید ٹیرف (محصولات) عائد کرنے کا اعلان کر دیا ہے۔

ٹرمپ نے کہا کہ یکم نومبر 2025 سے امریکہ، چین سے درآمد کی جانے والی تمام مصنوعات پر 100 فیصد اضافی ٹیرف عائد کرے گا۔ یہ محصولات پہلے سے نافذ ٹیرف کے علاوہ ہوں گے۔ اس کے علاوہ، امریکہ اسی دن سے تمام اہم سافٹ ویئرز پر برآمدی کنٹرول بھی نافذ کرے گا۔ ٹرمپ نے یہ اعلان اپنے سوشل میڈیا پلیٹ فارم "ٹروتھ سوشل" پر ایک پوسٹ کے ذریعے کیا۔

انہوں نے لکھا: یکم نومبر 2025 سے (یا اس سے پہلے، اگر چین کوئی نئی کارروائی کرتا ہے) امریکہ، چین سے تمام درآمدات پر 100فیصد ٹیرف لگائے گا، جو کہ پہلے سے موجود ٹیرف کے اوپر ہو گا۔ ٹرمپ نے کہا کہ چین کے حالیہ اقدامات نے امریکہ کو مجبور کیا کہ وہ سخت فیصلے لے، جن میں اہم سافٹ ویئرز پر برآمدی کنٹرول اور اضافی محصولات شامل ہیں۔

انہوں نے واضح کیا کہ یہ اقدامات صرف امریکی مفادات کے تحفظ کے لیے کیے جا رہے ہیں، دیگر ممالک کے لیے علیحدہ فیصلے کیے جائیں گے۔ ماہرین کے مطابق، فی الحال بھی امریکہ چین سے درآمد ہونے والی تقریباً ہر چیز پر بھاری ٹیرف نافذ کر چکا ہے۔ اس وقت اوسط مؤثر ٹیرف شرح تقریباً 40فیصد ہے، جس میں سٹیل اور ایلومینیم پر 50فیصد اور صارفین کی مصنوعات پر 7.5فیصد تک کے محصولات شامل ہیں۔

اس سے پہلے ٹرمپ نے اپنی آئندہ جنوبی کوریا کی دورے کے دوران چینی صدر شی جن پنگ سے ملاقات کرنے سے انکار کر دیا تھا۔ انہوں نے کہا کہ اب اس ملاقات کی کوئی وجہ نظر نہیں آتی۔ ٹرمپ نے خبردار کیا کہ اگر چین نے نایاب معدنیات پر پابندی برقرار رکھی تو امریکہ مزید سخت اقدامات کرے گا۔ انہوں نے مزید کہا: "ہم کئی پالیسیوں پر غور کر رہے ہیں، جن میں ایک ہے چین سے آنے والی مصنوعات پر ٹیرف میں زبردست اضافہ۔

کئی دیگر جوابی اقدامات پر بھی سنجیدگی سے غور ہو رہا ہے۔ ٹرمپ نے الزام لگایا کہ چین بہت جارح ہو چکا ہے۔ وہ الیکٹرانکس، کمپیوٹر چِپس، لیزر اور دیگر ٹیکنالوجیز میں استعمال ہونے والی دھاتوں اور نایاب میگنیٹس تک رسائی کو محدود کر کے دنیا کو یرغمال بنا رہا ہے۔ انہوں نے مزید کہا: میں نے صدر شی سے بات نہیں کی، کیونکہ اس کی کوئی وجہ نہیں تھی۔ یہ نہ صرف میرے لیے بلکہ آزاد دنیا کے تمام رہنماؤں کے لیے بھی ایک بڑا انکشاف ہے۔

واضح رہے کہ چین نے دو دن پہلے ہی نایاب معدنیات اور ان سے متعلق ٹیکنالوجیز کی برآمد پر نئے ضوابط کا اعلان کیا تھا۔ یہ اقدام اس ملاقات سے پہلے اٹھایا گیا، جو اس مہینے کے آخر میں ٹرمپ اور شی جن پنگ کے درمیان متوقع تھی۔

چینی وزارت تجارت کے مطابق: اب غیر ملکی کمپنیاں کسی بھی ایسی مصنوعات کی برآمد سے پہلے خصوصی اجازت لیں گی، جن میں چین سے حاصل شدہ نایاب زمینی عناصر شامل ہوں۔ چین، نایاب معدنیات کی کانکنی، پگھلانے، ری سائیکلنگ اور مقناطیس بنانے والی ٹیکنالوجی کی برآمد پر بھی اجازت کی شرط عائد کرے گا۔

چین کا مؤقف: قومی سلامتی کے لیے ضروری چینی وزارت تجارت نے کہا کہ یہ نئے ضوابط قومی سلامتی کے تحفظ اور فوجی یا حساس استعمال سے بچاؤ کے لیے ضروری ہیں۔ ان کے مطابق، کچھ نامعلوم غیر ملکی ادارے اور افراد نایاب معدنیات اور ٹیکنالوجیز کو فوجی استعمال کے لیے بیرونِ ملک منتقل کر رہے ہیں، جس سے چین کی سلامتی کو خطرہ لاحق ہو رہا ہے۔ دنیا کے تقریباً 70فیصد نایاب زمینی عناصر کی کانکنی چین میں ہوتی ہے۔

عالمی پروسیسنگ کا 90فیصد بھی چین کے کنٹرول میں ہے۔ یہ مواد جدید امریکی ٹیکنالوجیز کی طویل فہرست کے لیے ناگزیر ہے، اور اسی وجہ سے امریکہ اور چین کے درمیان تجارتی مذاکرات میں مستقل تنازع کی جڑ ہے۔ سال کے آغاز میں اعلان کردہ درآمدی محصولات کے بعد، دونوں ممالک نے کئی مرحلوں میں بات چیت کی۔ سوئٹزرلینڈ اور برطانیہ میں مذاکرات کے بعد اگرچہ کچھ معاملات پر اتفاق ہوا، لیکن چین کی جانب سے امریکی رسائی پر نئی پابندیوں نے کشیدگی کو بڑھا دیا۔