واشنگٹن/ آواز دی وائس
امریکی محکمہ خارجہ نے بین الاقوامی طلبہ کے لیے نئے ویزا انٹرویوز عارضی طور پر روک دیے ہیں۔ یہ فیصلہ سوشل میڈیا سرگرمیوں کی سخت جانچ کی تیاری کے تحت لیا گیا ہے۔ حکم نامے میں کہا گیا ہے کہ جب تک تفصیلی رہنما ہدایات جاری نہیں کی جاتیں، تب تک امریکی سفارت خانے اور قونصل خانے نئے اسٹوڈنٹ (ایف)، پیشہ ورانہ (ایم) اور تبادلہ پروگرام (جے) ویزا انٹرویوز کے لیے نئی اپائنٹمنٹس نہیں لیں گے۔
تاہم، جن درخواست گزاروں کے انٹرویوز پہلے سے طے ہیں، وہ معمول کے مطابق جاری رہیں گے۔ یہ قدم ٹرمپ انتظامیہ کی وسیع "ایکسٹریم ویٹنگ" پالیسی کا حصہ ہے، جس کا مقصد ویزا درخواست دہندگان کی سوشل میڈیا سرگرمیوں کی گہرائی سے جانچ کرنا ہے۔ اس میں انسٹاگرام، ایکس (سابقہ ٹوئٹر)، ٹک ٹاک اور فیس بک جیسے پلیٹ فارمز پر کی گئی پوسٹس، لائکس، کمنٹس اور شیئرز کا جائزہ شامل ہے۔
اس پالیسی کے تحت خاص طور پر ان طلبہ پر توجہ دی جا رہی ہے، جنہوں نے امریکہ مخالف یا ٹرمپ مخالف خیالات کا اظہار کیا ہے، یا جو فلسطین کی حمایت میں مظاہروں میں شامل ہوئے ہیں۔ ایسے طلبہ کی ویزا حیثیت کا جائزہ لیا جا رہا ہے اور بعض صورتوں میں ویزے منسوخ بھی کیے گئے ہیں۔
تعلیمی ماہرین کا ماننا ہے کہ یہ عارضی پابندی بین الاقوامی طلبہ کے امریکہ میں تعلیم حاصل کرنے کے منصوبوں کو متاثر کر سکتی ہے۔ امریکی جامعات میں تقریباً 11 لاکھ بین الاقوامی طلبہ زیر تعلیم ہیں، جو امریکی معیشت میں سالانہ 40 ارب ڈالر سے زائد کا حصہ ڈالتے ہیں۔
