اس کافی کے لیے ایک خاص قسم کے بیج استعمال کیے جا رہے ہیں جنہیں "نِڈو 7 گیشا" کہا جاتا ہے۔ یہ بیج پاناما میں بہت محدود مقدار میں پیدا کیے جاتے ہیں۔ بین الاقوامی سطح پر کافی کے ماہرین اس کی منفرد کوالٹی کے قائل ہیں اور یہ قیمت اس لیے نہیں ہے کہ کافی کو کسی سونے کے کپ میں پیش کی جاتی ہے یا اس میں سونے کا پانی ملایا جاتا ہے، بلکہ اس قیمت کی اصل وجہ اس کافی کی نایابیت اور خالصتاً قدرتی معیار ہے۔ یہ کافی ان لوگوں کے لیے تیار کی گئی ہے جن کے لیے کافی صرف ایک مشروب نہیں بلکہ ایک تجربہ اور احساس ہے ۔ ایک ایسا ذائقہ جسے زندگی میں ایک بار چکھ کر یادگار بنا لینا چاہتے ہیں۔

یہ کافی کے بیج خاص کیوں ہیں؟

نِڈو 7 گیشا دنیا کی سب سے نایاب کافی میں شمار ہوتی ہے۔ یہ بیج پاناما کے بارُو آتش فشاں کے قریب واقع ایک مخصوص باغ میں اُگائے جاتے ہیں۔ ان بیجوں کی صرف 20 کلوگرام مقدار ہی دستیاب تھی، اور پاناما میں ہونے والی ایک نیلامی میں جولیتھ کیفے نے اس کی پوری کھیپ تقریباً 2.2 ملین درہم (یعنی 5.3 کروڑ روپے) میں خریدی۔ جن لوگوں نے اس کا ذائقہ چکھا ہے، ان کے مطابق اس کافی میں چمیلی، پھل اور شہد  کے ذائقے محسوس ہوتے ہیں۔