ٹوکیو: جاپان نے 2027 میں ہندوستان اور جاپان کے درمیان سفارتی تعلقات کے قیام کی 75ویں سالگرہ کے موقع پر دونوں ممالک کے شہریوں سے لوگو ڈیزائن جمع کرانے کی اپیل کی ہے۔ جاپانی وزارت خارجہ کی جانب سے جاری ایک سرکاری بیان میں یہ اطلاع دی گئی۔ 2027 میں ہندوستان اور جاپان کے درمیان سفارتی تعلقات کے قیام کو 75 سال مکمل ہوں گے۔
اس تاریخی موقع کی مناسبت سے مختلف پروگرام منعقد کیے جائیں گے، جن کا مقصد دونوں ممالک کے درمیان پہلے سے موجود مثبت تعلقات کو مزید مضبوط بنانا ہے۔ جاپانی وزارت خارجہ نے سالگرہ کی تقریبات کے لیے سرکاری لوگو کے انتخاب کی خاطر ایک عوامی ڈیزائن مقابلہ شروع کیا ہے۔
وزارت نے کہا، ’’ہندوستان اور جاپان کے درمیان سفارتی تعلقات کے قیام کی 75ویں سالگرہ کی یاد میں لوگو جمع کرائیں۔‘‘ اس مقابلے میں ہندوستان اور جاپان کے شہری عمر یا موجودہ رہائش کی جگہ سے قطع نظر حصہ لے سکتے ہیں۔ جاپان میں مقیم OCI اور PIO کارڈ ہولڈرز بھی درخواست دینے کے اہل ہیں۔
لوگو ڈیزائن جمع کرانے کی آخری تاریخ 15 ستمبر 2026 مقرر کی گئی ہے۔ ڈیزائن جاپان کی وزارت خارجہ کے ایشیائی و اوشیانی امور کے بیورو کے ساؤتھ ویسٹ ایشیا ڈویژن کو ای میل کے ذریعے بھیجے جا سکتے ہیں: [email protected] جمع کرائے گئے ڈیزائنوں کا متعلقہ حکام جائزہ لیں گے اور ایک ڈیزائن کو ہندوستان-جاپان سفارتی تعلقات کی 75ویں سالگرہ کے سرکاری لوگو کے طور پر منتخب کیا جائے گا۔ نتائج دسمبر 2026 کے اوائل میں ہندوستان اور جاپان کی جانب سے بیک وقت جاری کیے جانے کی توقع ہے، تاہم اس میں تبدیلی ممکن ہے۔
ہندوستان کی وزارت خارجہ کے مطابق، دونوں ممالک کی حکومتیں 2027 کو ’’انڈیا-جاپان ایئر آف شیئرڈ ہورائزنز‘‘ یعنی ’’ہندوستان-جاپان مشترکہ افق کا سال‘‘ کے طور پر منائیں گی۔ سال بھر دونوں ممالک میں تقریباً 10 یادگاری پروگرام منعقد کیے جائیں گے، جن میں دونوں ملکوں کے نوجوانوں کی خصوصی شرکت ہوگی۔ وزیر خارجہ وکرم مصری نے کہا کہ 2027 میں سفارتی تعلقات کے قیام کی 75ویں سالگرہ کے موقع پر دونوں ممالک نے نوجوانوں پر خصوصی توجہ کے ساتھ مختلف یادگاری پروگراموں کی فہرست تیار کی ہے۔ انہوں نے کہا کہ وزیراعظم سانے تاکائیچی نے وزیراعظم نریندر مودی کو اگلے سال سالانہ سربراہ ملاقات کے لیے جاپان آنے کی دعوت بھی دی ہے۔
وزارت خارجہ کے مطابق 28 اپریل 2027 سے شروع ہونے والے ہفتے کو ’’انڈیا-جاپان ویک‘‘ کے طور پر منایا جائے گا۔ اس دوران دونوں ممالک کے عوام کو ہندوستان-جاپان خصوصی اسٹریٹجک اور عالمی شراکت داری کے مستقبل کا تصور پیش کرنے کے لیے لوگو اور تھیم مقابلہ بھی منعقد کیا جائے گا۔
